1 Inaha rā, ’ia tae i te mau mahana hope’a ra, i te mau mahana o te mau ’Ētene—’oia ïa, inaha e ta’ero te mau nūna’a ato’a o te mau ’Ētene, ’e te mau ’āti Iuda ato’a ho’i ’o tē tae mai i ni’a iho i teie nei fenua, ’e ’o tē pārahi ho’i i ni’a iho i te mau fenua ’ē ra, ’oia ïa, i te mau fenua ato’a o teie nei ao, inaha, e ta’ero ïa rātou i te mau ’ohipa ’ī’ino ’e te mau huru ’ohipa vi’ivi’i ato’a ra—

2 ’E ’ia tae i taua mahana ra, e tā’iri mai ai te Fatu Sabaota ia rātou i te pātiri ’e te ’āueuera’a fenua, ’e te haruru rahi, ’e te vero, ’e te mata’i ’ū’ana, ’e te auahi ura ’ama rahi ra.

3 E te mau nūna’a ato’a e tama’i atu ia Ziona ra, ’e ’o tē ha’ape’ape’a ho’i iāna, e riro ïa rātou mai te moemoeā nō te ’ōrama i te pō ra ; ’oia ïa, e riro ïa rātou mai te ta’ata po’ia ’o tē moemoeā ra, ’E inaha, tē mana’o ra ’oia ē, tē ’amu ra ’oia i te mā’a ; ’ia ara mai ra rā ’oia, ’aita tōna vārua i pa’ia ; e mai te ta’ata i pohe i te po’ihā ’o tē moemoeā ra, ’E inaha, tē mana’o ra ’oia ē, te inu ra ’oia i te pape ; ia ara mai ra rā ’oia, inaha, te vai po’ihā noa ra, ’e te pa’ia ’ore ho’i tōna vārua ; ’oia ïa, mai te reira ato’a te pupu ta’ata o te mau nūna’a ato’a ’o tē tama’i mai i te Mou’a ra ia Ziona.

4 Inaha ho’i, ’o ’outou pā’āto’a ’o tē rave i te mau ’ohipa ’ī’ino, ’a tāpe’a na ia ’outou iho ’a māere ai, nō te mea e ’oto ’outou, ma te pi’i rahi te reo ; ’oia ïa, e ta’ero ’outou, e ’ere rā i te ta’ero uaina ; ’e e turori ’outou, e ’ere rā i te turori ta’ero ’ava.

5 Inaha ho’i, ’ua nīni’i mai te Fatu i te vārua ta’oto rahi i ni’a iho ia ’outou. Inaha ho’i, ’ua tāpiri ’outou i tō ’outou mata, ’e ’ua pāto’i ho’i ’outou i te mau peropheta ; ’e nō tā ’outou ra mau ’ohipa ’ī’ino i tāpo’i ai ’oia i tō ’outou mau tāvana ’e tō ’outou mau hi’o.

6 ’E a muri a’era, e fa’atae mai te Fatu te Atua ia ’outou i te parau nō te hō’ē buka, ’o te parau ïa a te feiā i ta’oto ra.

7 ’E inaha e tāpirihia taua buka ra ; ’e tei roto ho’i i taua buka ra te mau heheura’a nō ’ō mai i te Atua ra, mai te ha’amatara’a mai ā o teie nei ao ē tae noa atu i te hope’a ra.

8 Nō reira, nō te mau mea i tāpirihia ra, e ’ore roa te mau mea i tāpirihia e hōro’ahia atu i te mahana nō te mau ’ohipa ’ī’ino ’e te mau ’ohipa vi’ivi’i a te ta’ata nei. Nō reira, e tāpe’ahia mai te buka ia rātou.

9 E hōro’ahia atu rā taua buka ra i te hō’ē ta’ata, ’e nāna ho’i e hōro’a atu i te mau parau nō taua buka ra, ’oia ho’i te mau parau a te feiā i ta’oto i raro i te repo ra ; ’e nāna ho’i e hōro’a atu i te parau o taua buka ra i te tahi atu ;

10 E’ita rā ’oia e hōro’a atu i te mau parau i tāpirihia ra, e’ita ato’a ’oia e hōro’a atu i te buka. ’E e tāpirihia ho’i taua buka ra e te mana o te Atua, ’e e vaiiho-noa-hia te heheura’a i tāpirihia i roto i te buka ē tae noa atu i te tau mau o te Fatu ra, ’ei reira e fa’aho’ihia mai ai ; inaha ho’i, nā te reira e fa’a’ite mai i te mau mea ato’a mai te ha’amatara’a mai ā o te ao nei ē tae roa atu i te hope’a.

11 E tae mai ho’i te mahana e tai’ohia ai te mau parau nō taua buka i tāpirihia ra i ni’a i te tāpo’i fare ; ’e e tai’ohia ho’i nā roto i te mana o te Mesia ra ; ’e e heheuhia mai te mau mea ato’a i te mau tamari’i a te ta’ata nei, te mau mea i vai na i rotopū i te mau tamari’i a te ta’ata nei, ’e te mau mea ato’a ho’i e tupu a muri atu, ē tae noa atu i te hope’a o teie nei ao.

12 Nō reira, i te mahana e hōro’ahia atu ai te buka i te ta’ata ’o tā’u i parau na, e hunahia taua buka ra i te mata o tō te ao nei, ’ia ’ore te mata o te ta’ata ’ia ’ite i te reira, maori rā ’o nā ’ite to’otoru tē ’ite i te reira nā roto i te mana o te Atua i pīha’i iho i te ta’ata ’o tei hōro’ahia atu te buka ; ’e e fa’a’ite pāpū rātou i te parau mau nō taua buka ra ’e te mau mea ho’i i pāpa’ihia i roto ra.

13 ’E ’aita atu e ta’ata e ’ite i te reira, maori rā e to’ofanu pu’e ta’ata mai te au i te hina’aro o te Atua, nō te fa’a’ite pāpū i tāna ra parau i te mau tamari’i a te ta’ata nei ; ’ua parau mai ho’i te Fatu te Atua ē, e parau mai te mau parau a te feiā parauti’a mai te mea ra ē nō tei pohe mai ra.

14 Nō reira, e hōpoi mai ai te Fatu te Atua i te mau parau o taua buka ra ; ’e nā roto i te vaha o te mau ’ite e rave rahi mai te au i tōna ra mana’o e fa’ati’a ai ’oia i tāna ra parau ; e ’auē ho’i te ta’ata e pāto’i i te parau a te Atua.

15 ’E inaha, a muri a’era, e parau atu te Fatu te Atua i te ta’ata o tāna e hōro’a atu te buka : ’A rave i teie nei mau parau tei ’ore i tāpirihia ’e ’a hōro’a atu i te tahi atu ta’ata, ’ia fa’a’ite atu ’oia i te reira i te ta’ata ’ite i te tai’o, i te nā-’ō-ra’a atu ē : ’A tai’o na ’oe i teie, tē ani ha’eha’a atu nei au ia ’oe. ’E e parau mai te ta’ata ’ite i te tai’o ē : ’A hōpoi mai i te buka, ’e e tai’o vau i te reira.

16 ’E i teienei, nō te hanahana o teie nei ao ’e nō te moni ho’i e roa’a ia rātou, e nā reira mai ai rātou i te parau, e ’ere ho’i nō te hanahana o te Atua ra.

17 E parau atu ho’i te ta’ata ra ē : ’Aita e ti’a iā’u ’ia hōpoi mai i te buka, nō te mea ’ua tāpirihia te reira.

18 E i reira te ta’ata ’ite i te tai’o e parau mai ai ē : ’Aita e ti’a iā’u ’ia tai’o i te reira.

19 Nō reira, ’e a muri a’era, e hōro’a fa’ahou atu te Fatu te Atua i te buka ’e te mau parau i roto ra i te ta’ata ’ite ’ore i te tai’o ; ’e e parau mai te ta’ata ’ite ’ore i te tai’o : ’Aita vau i ’ite i te tai’o.

20 ’E i reira te Fatu te Atua e parau mai ai iāna ra ē : ’Aita roa te ta’ata ’ite i te tai’o e tai’o i te reira, nō te mea ’ua pāto’ihia te reira e rātou, ’e e ti’a ho’i iā’u ’ia rave i tā’u ihora ’ohipa ; nō reira e tai’o ’oe i te mau parau ’o tā’u e hōro’a atu ia ’oe na.

21 ’A vaiiho i te mau mea i tāpirihia ra, e fa’atupu ho’i au i te reira i tō’u ihora tau ; ’e e fa’a’ite ho’i au i te mau tamari’i a te ta’ata nei ē e ti’a iā’u ’ia rave i tā’u ihora ’ohipa.

22 Nō reira, ’ia oti ia ’oe te tai’o i te mau parau o tā’u i fa’aue atu ia ’oe ra, ’e ’ua roa’a ho’i ia ’oe te mau ’ite o tā’u i fafau ia ’oe ra, ’ei reira ’oe e tāpiri fa’ahou ai i taua buka ra, ’e e huna fa’ahou ai iā’u ra, ’ia ti’a iā’u ’ia fa’aherehere i te mau parau i tai’o-’ore-hia e ’oe ra, ē tae noa atu i te tau e ti’a ai iā’u, i tō’u ra pa’ari, ’ia fa’a’ite atu i te mau mea ato’a i te mau tamari’i a te ta’ata nei.

23 Inaha ho’i, ’o vau nei te Atua ; e Atua ho’i au nō te mau semeio ; ’e e fa’a’ite ho’i au i tō te ao nei ē, hō’ē ā tō’u huru i nanahi ra, i teie nei mahana, ē a muri noa atu ; ’e ’aore ho’i au e ’ohipa i rotopū i te mau tamari’i a te ta’ata nei, maori rā nā roto i tō rātou fa’aro’o.

24 ’E teie fa’ahou ā, ’e a muri a’era, e parau atu te Fatu iāna ’ia tai’o i te mau parau ’o tē hōro’ahia atu iāna ra :

25 Mai te mea e ha’afātata mai teie feiā iā’u nei i tō rātou vaha, ’e e fa’ahanahana mai ho’i iā’u nei i tō rātou ra ’utu, tei te ātea ’ē rā tō rātou ’ā’au iā’u nei, ’e tō rātou mata’u iā’u e mea ha’api’i-noa-hia ho’i ïa e te mau parau a te ta’ata ana’e ra—

26 Nō reira, e rave au i te hō’ē ’ohipa māere i rotopū i teie nei feiā, ’oia ïa, te hō’ē ’ohipa māere ’e te ’ūmere ; e mou atu ho’i te ’aravihi o te feiā ’aravihi ’e te feiā ’ite ra, ’e e mo’e ’ē te māramarama o te feiā ’ite ra.

27 ’E ’auē ho’i te feiā i ’imi māite i te huna i tā rātou ’ōpuara’a i te Fatu ! ’E tei roto i te pōiri tā rātou mau ’ohipa ; ’e tē parau nei rātou ē : Nā vai tātou e hi’o mai, ’e ’o vai tei ’ite ia tātou ? ’E tē parau ato’a nei ho’i rātou ē : ’Oia mau roa, tā ’outou fa’atahurira’a i te mau mea ato’a mai te ’araea ïa a te potera ra. Inaha rā, e fa’a’ite atu vau ia rātou ē ’ua ’ite au i tā rātou mau ’ohipa ato’a, tē nā reira mai ra te Fatu Sabaota ra. E parau ānei ho’i te ’ohipa i te ta’ata i rave ē, e ’ere nāna i hāmani iā’u ? ’E ’aore rā e parau ānei ho’i tei hāmanihia i tei hāmani iāna ē, ’aita ’oia i ’ite ?

28 Inaha rā, tē nā ’ō mai ra te Fatu Sabaota ra : E fa’a’ite atu vau i te mau tamari’i a te ta’ata ē, nō te hō’ē taime iti poto e riro mai Lebanona ’ei ’āua hotu rahi ; ’e e mana’ohia ai ho’i te ’āua hotu rahi ’ei fenua uru rā’au ra.

29 ’E ’ia tae i taua mahana ra e fa’aro’o ai te ta’ata tari’a turi i te parau o te buka, ’e e ’ite ai ho’i te mata o te matapō nā roto mai i te mohimohi ’e te pōiri.

30 ’E e tupu rahi te maita’i o te feiā ha’eha’a, ’e e ’oa’oa rātou i roto i te Fatu, ’e e ’oa’oa ho’i te feiā veve i rotopū i Tei Mo’a i ’Īserā’ela nei.

31 ’E ’oia mau, mai te Fatu e ora nei, e ’ite rātou ē, e ha’afaufa’a-’ore-hia te feiā ha’amata’u, e ha’amouhia te feiā tāhitohito, ’e e tāpū-’ē-hia te feiā ato’a i tītau i te mau ’ohipa ’ī’ino.

32 ’E ’o rātou ato’a ’o tei fa’ahapa i te ta’ata nō tāna parau, ’e rātou ’o tei tu’u i te mārei nō te ta’ata a’o i te pae ’ūputa ra, ’e ’o rātou ato’a ’o tei ha’api’o ’ē i te feiā parauti’a nō te aore.

33 Nō reira, tē parau mai ra te Fatu, ’o tei fa’aora ia Aberahama, nō ni’a i te ’utuāfare o Iakoba ra : E ’ore roa Iakoba e ha’amā fa’ahou, e ’ore ho’i e māhe’ahe’a fa’ahou tōna mata.

34 ’Āre’a rā ’ia ’ite ’oia i tāna mau tamari’i, te ’ohipa i ravehia e tō’u nei rima, i rotopū iāna ra, e riro rātou i te ha’amo’a i tō’u nei i’oa, ’e i te ha’amo’a i Tei Mo’a nō Iakoba ra, ’e i te mata’u ho’i i te aro o te Atua nō ’Īserā’ela ra.

35 ’E te feiā i hapa i te pae vārua ra, e noa’a te ’ite i reira, ’e te feiā amuamu ra, e māramarama ïa i te mau ha’api’ira’a tumu i reira.