1 ’E i teienei, e Iakoba, tē parau atu nei au ia ’oe na : ’O ’oe tā’u matahiapo i te mahana o tō’u ra ’ati i te mēdēbara ra. ’E inaha, i tō ’oe tamari’ira’a ’ua fāri’i ’oe i te mau ’ati ’e te ’oto rahi nō te ’ohipa ’ī’ino a tō ’oe ra nā taea’e.

2 ’Āre’a rā, e Iakoba, tā’u matahiapo i te mēdēbara, ’ua ’ite ’oe i te mana rahi o te Atua ; ’e e ha’amo’a ’oia i tō ’oe mau ’ati ’ei maita’i nō ’oe.

3 Nō reira, e ha’amaita’ihia tō ’oe vārua, ’e e pārahi ’oe ma te ora maita’i i pīha’i iho i tō ’oe ra taea’e, ia Nephi ; ’e e fa’a’ohipa ’oe i tō ’oe ra mau mahana nō te tāvini i tō ’oe Atua. Nō reira, ’ua ’ite au ē, ’ua fa’aorahia ’oe, nō te parauti’a o tō ’oe ra Tāra’ehara ; ’e ’ua ’ite ho’i ’oe ē, i te ’īra’a mau o te tau e haere mai ai ’oia nō te ’āfa’i mai i te fa’aorara’a o te ta’ata nei.

4 ’E ’ua ite ’oe i tōna hanahana i tō ’oe ’āpīra’a ; nō reira, ’ua ha’amaita’ihia ’oe mai ia rātou ’o tāna e poihere i te tino nei ; nō te mea hō’ē ā tō te Vārua huru i nanahi ra, i teie nei mahana, ē a muri noa atu. ’E ’ua fa’aineinehia te ’ē’a e ora ai te ta’ata nei i te hi’ara’a, ’e e mea hōro’a-noa-hia te fa’aorara’a.

5 ’E ’ua nava’i tō te ta’ata nei ha’api’ira’ahia, ’ia ’ite rātou i te maita’i ’e te ’ino. ’E ’ua hōro’ahia mai te ture i te ta’ata nei. ’E nā roto i te ture ’aita roa e ti’a i te ta’ata ’ia vai hara ’ore noa ; ’oia ho’i, nā roto i te ture ’ua tāpū-’ē-hia te ta’ata nei. ’Oia ïa, nā roto i te ture pae tino nei ’ua tāpū-’ē-hia rātou ; ’e ’oia ato’a, nā roto i te ture pae vārua ’ua tāpū-’ē-hia rātou i te mea maita’i, ’e ’ua riro ’ei mea ’ati ē a muri noa atu.

6 Nō reira, e tae mai te fa’aorara’a nā roto i te Mesia Mo’a ; ’e ’ua ’ī ho’i ’oia i te maita’i ’e te parau mau.

7 Inaha, ’ua pūpū ’oia iāna iho ’ei tusia nō te hara, nō te fa’atupu i te mau tītaura’a a te ture i ni’a ia rātou ato’a ’o tei fāri’i i te ’ā’au ’oto ’e te vārua tātarahapa ; ’e ’aita roa te mau tītaura’a a te ture e tae mai i ni’a ia vetahi ’ē atu ā.

8 Nō reira, e mea faufa’a roa ’ia fa’a’itehia teie nei mau mea i tō te ao nei, ’ia ’ite rātou ē, e ’ore roa e ti’a i te hō’ē ta’ata ’ia pārahi i mua i te aro o te Atua, maori rā nā roto i te mau maita’i rahi, ’e te aroha, ’e te maita’i o te Mesia Mo’a, ’o tē hōro’a i tōna ora i te tino nei, ’e ’o tē rave fa’ahou i te reira nā roto i te mana o te Vārua, ’ia ti’a iāna ’ia fa’atupu i te ti’afa’ahoura’a o tei pohe, ’e ’o ’oia te ti’a mātāmua mai.

9 Nō reira, ’o te oho mātāmua ’oia nā te Atua, i te mea e riro ’oia ’ei ārai nō te mau tamari’i ato’a a te ta’ata nei ; ’e e fa’aorahia rātou ’o tei ti’aturi iāna ra.

10 ’E nō te mea e riro ’oia ’ei ārai nō te mau ta’ata ato’a, e hope te mau ta’ata ato’a i te haere mai i te Atua ; nō reira, e ti’a rātou i mua i tōna aro, ’ia ha’avāhia e ana mai te au i te parau mau ’e te huru mo’a i roto iāna ra. Nō reira, tei te tītaura’a a te ture tā Tei Mo’a i hōro’a mai ra, e tāho’ohia ai te ta’ata i te utu’a i fa’aauhia ra, e taua utu’a i fa’aauhia ra, e mea ’ē roa te reira i te ’oa’oa i fa’aauhia ra, nō te fa’ati’a roa i te mau tītaura’a nō te tāra’ehara—

11 ’E e mea ti’a roa ho’i ’ia vai nā pae e piti i te mau mea ato’a ra. ’Āhiri ’aita te reira, e tā’u matahiapo i te mēdēbara ē, ’aore ïa e ti’a ’ia fa’atupu i te parauti’a, ’e ’aore ato’a i te ’ohipa ’ī’ino, ’e ’aore ato’a i te parau mo’a ’e te mamae, ’e ’aore ato’a i te maita’i ’e te ’ino. Nō reira, e mea ti’a roa ïa i te mau mea ato’a ’ia riro ’ei mea hō’ē ; nō reira, ’āhiri ho’i e mea hō’ē ana’e ra, e mea pohe ïa, ’aita ho’i tō te reira e ora, ’aita ho’i e pohe, e ’ere ïa i te mea tāhuti noa, e ’ere ato’a i te mea tāhuti ’ore, ’aita tōna e ’oa’oa, ’aita e mamae, ’aita e ’ite, ’aita ato’a e ’ite ’ore.

12 Nō reira, ’ua hāmani-mau-hia ïa te reira nō te hō’ē mea faufa’a ’ore ; nō reira ’āhiri mai te reira, ’aore ïa e faufa’a nō te hope’a o tōna ra hāmanira’ahia. Nō reira, ’ua fa’a’ore mau ïa te reira i te pa’ari o te Atua ’e tāna ra mau ’ōpuara’a mure ’ore ; ’e ’oia ato’a te mana, ’e te aroha, ’e te parauti’a o te Atua.

13 E mai te mea e parau mai ’oe ē, aita e ture, tē parau ato’a ra ïa ’oe ē, ’aita e hara. ’E mai te mea e parau mai ’oe ē, ’aita e hara, tē parau ato’a ra ïa ’oe ē, ’aita e parauti’a. ’E mai te mea ē ’aita e parauti’a, ’aita ato’a ïa e ’oa’oa. ’E mai te mea ’aita e parauti’a ’e ’aita e ’oa’oa, ’aita ato’a ïa e utu’a ’e ’aita ato’a e mamae. ’E mai te mea ’aita teie nei mau mea, ’aita ato’a ïa e Atua. ’E mai te mea ’aita e Atua, ’aita ato’a ïa tātou ’e ’aita ato’a te fenua nei ; nō te mea ’āhiri ē ’aita e Atua ’aita ïa te hō’ē a’e mea i hāmanihia, ’aita ïa e mea ’ia ’ohipa, ’e ’ia ’ohipahia ; nō reira’ia ’ore ïa te mau mea ato’a e ti’a ai.

14 ’E i teienei, e tā’u mau tamari’i tamāroa ē, tē parau atu nei au ia ’outou i teie nei mau mea ’ei faufa’a ’e ’ei ha’api’ira’a ho’i nō ’outou ; nō te mea tē vai nei te Atua, ’e nāna i hāmani i te mau mea ato’a ra, i te mau ra’i ’e te fenua nei, ’e te mau mea ato’a i roto ra, te mau mea ’ia ’ohipa, ’e te mau mea ’ia ’ohipahia.

15 ’E ’ia fa’atupu i tāna ra mau ’ōpuara’a mure ’ore i te hope’a o te ta’ata nei, i muri a’e i tōna hāmanira’a i tō tātou nā metua mātāmua, ’e te mau ’ānimara o te fenua, ’e te mau manu o te reva, ’oia ho’i te mau mea ato’a i hāmanihia ra, i tītauhia ho’i ’ia vai nā pae e piti ; ’oia ho’i te mā’a i rāhuihia ra i te tahi pae, ’e i te tahi pae, ’o te tumu rā’au ïa nō te ora ; e mea monamona te tahi, ’e e mea ’ava’ava te tahi.

16 Nō reira, ’ua fa’ati’a te Fatu te Atua i te ta’ata nei ’ia rave mai te au i tōna iho hina’aro. Nō reira, ’aita e ti’a i te ta’ata nei ’ia rave mai te au i tōna iho hina’aro, maori rā ’ua hia’ai ’oia i te tahi ’e ’aore rā i te tahi atu.

17 ’E nō te mau mea tā’u i tai’o ra, ’ua mana’o ihora vau, ’o Lehi ē, ’ua ma’iri mai te hō’ē melahi a te Atua mai te ra’i mai, mai te au i tei pāpa’ihia ra ; nō reira, ’ua riro mai ’oia ’ei diabolo, ’e ’ua tītau ho’i ’oia i te mea ’ino i mua i te aro o te Atua.

18 ’E nō te mea ’ua ma’iri mai ’oia mai te ra’i mai, ’e ’ua ro’ohia ’oia i te ’ati ē a muri noa atu, ’ua tītau ato’a atu ra ’oia ’ia mamae te mau ta’ata ato’a. Nō reira, ’ua parau atu ra ’oia, ’oia ho’i taua ’ōphī tahito ra, ’o te diabolo, ’oia te metua o te mau parau ha’avare ato’a ra, ia Eva i te nā-’ō-ra’a ē : ’A ’amu i te mā’a o te rā’au i rāhuihia ra, ’e ’aita ’oe e pohe, e riro rā ’oe mai te Atua ra te huru, i te itera’a i te maita’i ’e te ’ino.

19 ’E i muri a’e i tō Adamu rāua ’o Eva ’amura’a i te mā’a o te rā’au i rāhuihia ra, ’ua ti’avaruhia rāua i rāpae’au i te ’ō i Edene, nō te fa’a’apu i te fenua.

20 ’E ’ua fānau mai rāua i te mau tamari’i, ’oia ïa, ’oia ho’i te ’utuāfare o te ao ato’a nei.

21 ’E ’ua ha’amaorohia te pu’e mahana o te mau tamari’i a te ta’ata nei, mai te au i te hina’aro o te Atua, ’ia ti’a ia rātou ’ia tātarahapa ’a vai ai rātou i te tino nei ; nō reira, ’ua riro tō rātou orara’a ’ei tāmatara’a, ’e ’ua ha’amaorohia tō rātou pu’e mahana mai te au i te mau fa’auera’a tā te Fatu te Atua i hōro’a i te mau tamari’i a te ta’ata nei. ’Ua hōro’a mai ho’i ’oia i te fa’auera’a ’ia tātarahapa te mau ta’ata ato’a e ti’a ai ; ’e ’ua fa’a’ite mai ho’i ’oia i te mau ta’ata ē ’ua mo’e rātou, nō te ture i ’ōfatihia e tō rātou ra nā metua.

22 ’E i teienei, inaha, ’āhiri ’aita Adamu i ’ōfati i te ture ’aita ato’a ïa ’oia e hi’a, e vai noa rā ïa ’oia i roto i te ’ō i Edene. ’E te mau mea ato’a i hāmanihia na e mea ti’a ïa ’ia vai noa i roto i tō rātou huru mau mai te au i tō rātou hāmanira’ahia i muta’a ihora ; ’e ’ia vai noa te reira ē a muri noa atu e ti’a ai, ’e ’aore e hope’a.

23 ’E ’aita i ti’a ia rāua ’ia fānau i te tamari’i i reira, nō reira i vai ai rā rāua ma te hara ’ore, ’e ’aore o rāua e ’oa’oa, nō te mea ’aita rāua i ’ite i te mamae ; ’aore a rāua e ha’apa’ora’a i tei maita’i, nō te mea ’aita rāua i ’ite i te hara.

24 Inaha rā, ’ua ravehia te mau mea ato’a nā roto i te pa’ari nōna ’o tei ’ite i te mau mea ato’a.

25 ’Ua hi’a Adamu ’ia vai te mau ta’ata, ’e tē vai nei te mau ta’ata ’ia noa’a tō rātou ’oa’oa.

26 ’E e haere mai te Mesia i te ’īra’a mau o te tau, ’ia ti’a iāna ’ia fa’aora i te mau tamari’i a te ta’ata i te hi’ara’a ra. ’E nō te mea ’ua fa’aorahia rātou i te hi’ara’a, ’ua riro ïa rātou ’ei mea ti’amā ē a muri noa atu, i te ’itera’a i te maita’i ’e te ’ino ; ’ia rave rātou i tei au i tō rātou iho hina’aro, ’e ’ia ’ore rātou ’ia ha’avīhia, maori rā nā roto i te fa’autu’ara’a a te ture i te mahana rahi ’e te hope’a ra, mai te au i te mau fa’auera’a tā te Atua i hōro’a mai.

27 Nō reira, e mea ti’amā te mau ta’ata i te pae tino nei ; ’e ’ua hōro’ahia mai te mau mea ato’a ia rātou ’o tē tano nō te ta’ata nei. ’E e ti’amā tō rātou ’ia mā’iti i te ti’amāra’a ’e te ora mure ’ore, nā roto i te Ārai rahi o te ta’ata ato’a, ’e ’aore rā ’ia mā’iti i te fa’atītīra’a ’e te pohe, mai te au i te fa’atītīra’a ’e te mana o te diabolo ; nō te mea tē tītau nei ’oia ’ia ro’ohia te mau ta’ata ato’a i te ’oto mai iāna ihora.

28 ’E i teienei, e tā’u mau tamari’i tamāroa, ’ua hina’aro vau ’ia ti’aturi ’outou i taua Ārai rahi ra, ’e ’ia ha’apa’o ho’i i tāna ra mau fa’auera’a rahi ; ’e ’ia auraro maita’i i tāna ra mau parau, ’e ’ia mā’iti i te ora mure ’ore, mai te au i te hina’aro o tōna ra Vārua Mo’a.

29 ’E ’eiaha e mā’iti i te pohe mure ’ore, mai te au i tō te tino hina’aro ’e te ’ino i roto i te reira, ’o tei hōro’a i te mana i te vārua o te diabolo ’ia faatītī ’e ’ia arata’i ho’i ia ’outou i raro i hade, ’ia ti’a iāna ’ia fa’atere ia ’outou i roto i tōna ihora bāsileia.

30 ’Ua parau atu vau i teie mau parau ri’i ia ’outou ato’a, e tā’u mau tamari’i tamāroa, i te mau mahana hope’a nō tō’u nei orara’a i te tino nei ; ’e ’ua mā’iti ho’i au i te pae maita’i, mai te au i te mau parau a te peropheta ra. ’E ’aita atu tō’u e hina’aro, maori rā ’o te maita’i mure ’ore nō tō ’outou vārua. ’Āmene.