1 ’E i teienei, inaha, e tō’u mau taea’e here, e paraparau atu vau ia ’outou ; nō te mea ’aita vau, ’o Nephi, e vaiiho ia ’outou ’ia mana’o ē, e mea parauti’a a’e ’outou i te mau ’Ētene. Inaha ho’i, ’ia ’ore ’outou e ha’apa’o i te mau fa’auera’a a te Atua, e pohe ’outou ; ’e nō te mau parau i parauhia, ’eiaha ’outou e mana’o ē, ’ua mou roa te mau ’Ētene.

2 Inaha ho’i, tē parau atu nei au ia ’outou, te mau ’Ētene ato’a ’o tē tātarahapa, ’o te feiā ïa i fafau atu i te Fatu ; ’e te mau ’āti Iuda ato’a ’o tē ’ore e tātarahapa, e tāpū-’ē-hia atu ïa rātou ; ’aita roa ho’i te Fatu e fafau i te hō’ē noa atu ta’ata, maori rā i tei tātarahapa ’e tei ti’aturi i tāna Tamaiti, ’o Tei Mo’a i ’Īserā’ela.

3 ’E i teienei, e tohu ri’i atu vau nō ni’a i te mau ’āti Iuda ’e te mau ’Ētene ato’a ho’i. ’Ia tae mai te buka ’o tā’u i parau ra, ’e ’ia pāpa’ihia te reira i te mau ’Ētene ra, ’e ’ia pia-fa’ahou-hia i te Fatu ra, e rave rahi te ta’ata ’o tē ti’aturi i te mau parau i pāpa’ihia ra ; ’e e hōpoi atu rātou i te reira i te toe’a o tō tātou ra hua’ai.

4 ’E i reira te toe’a o tō tātou hua’ai e ’ite ai i te parau nō tātou, ’e te huru ho’i nō tō tātou haerera’a mai mai Ierusalema mai ra ; ’e e ’ite ho’i rātou ē, e hua’ai rātou nō te mau ’āti Iuda.

5 ’E e a’ohia te ’evanelia a Iesu Mesia i rotopū ia rātou ; nō reira, e fāri’i ai rātou i te ’ite i te parau nō ni’a i tō rātou ra mau metua, ’e i te ’ite ho’i i te parau nō Iesu Mesia, ’o tei ’itehia na i rotopū i tō rātou mau metua.

6 ’E i reira rātou e ’oa’oa ai ; nō te mea e ’ite rātou ē, e ha’amaita’ira’a teie nō rātou nō ’ō mai i te rima o te Atua ; ’e e ha’amata tō rātou mau poa pōiri i te ma’iri mai ni’a mai i tō rātou mata ; e ’ore ho’i te mau u’i e rave rahi e hope i rotopū ia rātou, e riro ai rātou ’ei feiā vi’ivi’i ’ore ’e te au-maita’i-hia.

7 ’E a muri a’era, e ha’amata te mau ’āti Iuda i ha’apurarahia ra i te ti’aturi i te Mesia ; ’e e ha’amata ho’i rātou i te ha’aputuputu i ni’a i te fenua ; ’e e riro rātou ato’a ’o tei ti’aturi i te Mesia ’ei feiā au-maita’i-hia.

8 ’E a muri a’era, e ha’amata te Fatu te Atua i tāna ’ohipa i rotopū i te mau nūna’a ato’a, te mau ’ōpū ato’a, te mau reo ato’a, ’e te mau nūna’a ato’a, nō te fa’atupu i te fa’aho’ira’a mai i tōna mau ta’ata i ni’a i te fenua nei.

9 E ha’avā te Fatu te Atua i te mau ta’ata ri’iri’i ma te parauti’a ; ’e e a’o ho’i ’oia ma te fāito ti’a i te feiā ha’eha’a o te fenua nei. ’E e tā’iri ’oia i te fenua nei i te rā’au o tōna ra vaha ; e nā roto i te mata’i o tōna ra vaha e ha’apohe ai ’oia i te feiā parauti’a ’ore.

10 ’Ua fātata roa ho’i te tau e fa’ati’a ai te Fatu te Atua i te hō’ē fa’ata’a-’ē-ra’a rahi i rotopū i te mau ta’ata, ’e e ha’amou ’oia i te feiā parauti’a ’ore ; ’e e fa’aora noa ’oia i tōna ra mau ta’ata ; ’oia ïa, ’e noa atu ā e ha’amou ’oia i te feiā parauti’a ’ore i te auahi.

11 ’E te parauti’a ra, ’o te tātua ïa o tōna tau’upu ; ’e te parau mau ra, ’o te tātua ïa o tōna ’ōpū.

12 ’E i reira e pārahi te luko i pīha’i iho i te ’ārenio ; ’e e tārava ’āmui ho’i te nēmera i pīha’i iho i te pinia māmoe, ’e te fanau’a pua’atoro, ’e te liona ’āpī, ’e te fanau’a ’ānimara poria ra ; e nā te hō’ē tamari’i ri’i e arata’i ia rātou.

13 E ’āmui tāhō’ē te pua’atoro ’e te bea i te ’amura’a i te mā’a ; e tārava ’āmui ho’i tō rātou mau fanau’a te tahi i pīha’i iho i te tahi ; ’e e ’amu ho’i te liona i te matie mai te pua’atoro ato’a ra.

14 ’E e ha’uti noa ho’i te aiū ’aru’aru i ni’a i te ’āpo’o o te asepi ra, ’e te tamari’i i fa’a’ore i te ū ra, e tu’u ïa ’oia i tōna rima i ni’a i te pūpunira’a o te zepho ra.

15 ’E ’aita roa rātou e ha’amāuiui ’e ’aita ho’i e hāmani ’ino i te hō’ē a’e mea i ni’a i tō’u ato’a ra mou’a mo’a ; ’e e ’ī ho’i te fenua nei i te ’ite nō ni’a i te Fatu mai te mau pape e tāpo’i ra i te miti.

16 Nō reira, e fa’a’itehia ai te mau mea nō te mau nūna’a ato’a ; ’oia ïa, e fa’a’itehia ai te mau mea ato’a i te mau tamari’i a te ta’ata nei.

17 ’Aore e mea mo’e ’o tē ’ore e heheuhia ; ’aore e ’ohipa nō te pōiri ’o tē ’ore e fa’a’itehia i roto i te māramarama ; ’e ’aore e mea i tā’atihia i ni’a i te fenua nei ’o tē ’ore e tātarahia.

18 Nō reira, i taua mahana ra e heheuhia mai ai te mau mea ato’a i heheuhia na i te mau tamari’i a te ta’ata nei ; ’e ’aita tō Sātane e mana fa’ahou i ni’a i te ’ā’au o te mau tamari’i a te ta’ata nei nō te hō’ē tau maoro. ’E i teienei, e tō’u mau taea’e here, e fa’aoti au i tā’u nei mau parau.