1 ’E i teienei, tē fa’aoti nei au, ’o Nephi, i tā’u tohura’a ia ’outou, e tō’u mau taea’e here. ’Aita re’a te mau mea e ti’a iā’u ’ia pāpa’i, maori rā te mau mea tā’u i ’ite ē, e tupu mau ïa a muri nei ; ’aita atu ho’i e ti’a iā’u ’ia pāpa’i i te mau parau e rave rahi a tō’u taea’e ra ’o Iakoba.

2 Nō reira, te mau mea tā’u i pāpa’i, ’ua nava’i ïa iā’u, maori rā e mā’a parau iti ā tā’u e pāpa’i nō ni’a i te mau ha’api’ira’a tumu a te Mesia ra ; nō reira, e parau pāpū atu vau ia ’outou na mai te au i te pāpū o tā’u ra mau tohura’a.

3 ’E tē ’oa’oa nei tō’u vārua i te parau pāpū ; ’e tē nā reira ra ho’i te Fatu te Atua i te fa’atupu i te parau mau i rotopū i te mau tamari’i a te ta’ata nei. ’E tē ha’amāramarama mai ra ho’i te Fatu te Atua i te ’ite o te ta’ata nei ; i te mea tē paraparau mai ra ’oia i te ta’ata nei mai te au i tō rātou reo, ’e mai te au ho’i i tō rātou ’ite.

4 Nō reira, tē hina’aro nei au ’ia ha’amana’o ’outou ē, ’ua parau atu vau ia ’outou na nō ni’a i taua peropheta ra ’o tā te Fatu i fa’a’ite mai iā’u nei, ’o tē bāpetizo atu i te ’Ārenio a te Atua, ’e nāna e hōpoi ’ē atu i te mau hara a tō te ao nei.

5 ’E i teienei, mai te mea e mea ti’a i te ’Ārenio a te Atua, i tei mo’a, ’ia bāpetizohia i roto i te pape nō te fa’ati’a i te mau parauti’a ato’a, inaha, e mea ti’a roa atu ā ïa ia tātou, i te feiā mo’a ’ore, ’ia bāpetizohia tātou, ’oia ïa, i roto i te pape !

6 ’E i teienei, e ui atu vau ia ’outou, e tō’u mau taea’e here, nāhea te ’Ārenio a te Atua i te fa’ati’a i te mau parauti’a ato’a, i bāpetizohia ai ’oia i roto i te pape ?

7 ’Aita ānei ’outou i ’ite ē, ’ua mo’a ’oia ? ’E noa atu ā e mea mo’a ’oia, tē fa’a’ite mai ra ’oia i te mau tamari’i a te ta’ata nei ē, tē fa’aha’eha’a ra ’oia iāna iho i te pae tino nei i mua i te Metua, ’e tē fa’a’ite ato’a ra ho’i i te Metua ē, e auraro ’oia iāna ra i te ha’apa’ora’a i tāna ra mau fa’auera’a.

8 Nō reira, i muri iho i tōna bāpetizora’ahia i roto i te pape, ’ua pou mai ra te Vārua Maita’i, mai te hōho’a o te ’ū’upa ra, i ni’a iho iāna ra.

9 ’E ’ua fa’a’ite fa’ahou ā ’oia i te mau tamari’i a te ta’ata nei i te tītī’aifarora’a o te ’ē’a, ’e te piriha’ora’a o te ’ūputa ’o tē tītauhia ia rātou ’ia tomo atu nā roto, ’e nāna iho i fa’ati’a i te hi’ora’a i mua ia rātou.

10 ’E ’ua parau atu ra ’oia i te mau tamari’i a te ta’ata nei : ’A pe’e mai na ’outou iā’u nei. Nō reira, e tō’u mau taea’e here, e ti’a ānei ia tātou ’ia pe’e atu ia Iesu ra, ’ia ’ore tātou e hina’aro māite i te ha’apa’o i te mau fa’auera’a a te Metua ra ?

11 ’E ’ua parau mai ra ho’i te Metua : ’A tātarahapa na ’outou, ’a tātarahapa na ’outou, ’e ’ia bāpetizohia nā roto i te i’oa o tā’u ra Tamaiti here.

12 ’E ’ua tae mai ra ho’i te reo o te Tamaiti iā’u nei, i te nā-’ō-ra’a mai ē : ’O te bāpetizohia i tō’u nei i’oa, e hōro’ahia mai ïa te Vārua Maita’i e te Metua iāna ra, mai iā’u ato’a nei ho’i ; nō reira, ’a pe’e mai iā’u nei, ’e ’a rave i te mau mea tā ’outou i ’ite iā’u i te ravera’a.

13 Nō reira, e tō’u mau taea’e here, ’ua ’ite au ē, mai te mea e pe’e ’outou i te Tamaiti, ma te ’ā’au tae mau, ma te fa’ahua ’ore ’e te ha’avare ’ore i mua i te Atua, ’āre’a rā ma te hina’aro mau, i te tātarahapara’a i tā ’outou na mau hara, ma te fa’a’ite pāpū atu i te Metua ē, ’ua ti’a ia ’outou ’ia rave i ni’a iho ia ’outou i te i’oa o te Mesia nā roto i te bāpetizora’a—’oia ïa, nā roto i te pe’era’a atu i tō ’outou Fatu ’e tō ’outou Fa’aora i raro i te pape, mai te au i tāna ra parau ; inaha, i reira ’outou e fāri’i ai i te Vārua Maita’i ; ’oia ïa, i reira e tae mai ai te bāpetizora’a i te auahi ’e i te Vārua Maita’i ; ’e i reira e ti’a ai ia ’outou ’ia parau atu ma te reo o te mau melahi ra, ’e ’a pi’i māite atu ai i te ’āruera’a i Tei Mo’a i ’Īserā’ela ra.

14 Inaha rā, e tō’u mau taea’e here, ’ua tae mai ra te reo o te Tamaiti iā’u nei, i te nā-’ō-ra’a mai ē : I muri iho i tō ’outou tātarahapara’a i tā ’outou mau hara, ’e i te fa’a’itera’a atu i te Metua ē ’ua hina’aro ’outou ’ia ha’apa’o i tā’u mau fa’auera’a, nā roto i te bāpetizora’a i te pape, ’e ’ua fāri’i i te bāpetizora’a i te auahi ’e i te Vārua Maita’i, ’e ’ua ti’a ho’i ia ’outou ’ia parau i te parau ’e’ē, ’oia ïa, i te reo ho’i o te mau melahi, ’e i muri iho ’a huna ai iā’u i reira ra, e mea maita’i a’e paha ’āhiri ’aita ’outou i ’ite iā’u ra.

15 ’E ’ua fa’aro’o a’era vau i te hō’ē reo nō ’ō mai i te Metua ra, i te nā-’ō-ra’a mai ē : ’Oia ïa, e parau mau ’e te ha’avare ’ore te mau parau a tā’u ra Tamaiti here. ’O te ta’ata ’o tē fa’aitoito noa ē tae noa atu i te hope’a ra, e fa’aorahia ïa.

16 ’E i teienei, e tō’u mau taea’e here, ’ua ’ite au ē, ’ia ’ore te ta’ata e fa’aitoito noa ē tae noa atu i te hope’a, i te pe’era’a i te hi’ora’a o te Tamaiti a te Atua ora, e ’ore roa ïa e fa’aorahia.

17 Nō reira, ’a rave na ’outou i te mau mea tā’u i fa’a’ite ia ’outou ra ē, i ’ite na vau ē, e ravehia ïa e tō ’outou ra Fatu ’e tō ’outou ato’a ra Tāra’ehara ; ’e ’ua fa’a’itehia mai taua mau mea ra iā’u nei, ’ia ’ite ’outou i te ’ūputa e ti’a ia ’outou ’ia tomo atu. ’E te ’ūputa e tomohia e ’outou ra, ’o tē tātarahapa ïa ’e te bāpetizora’a i te pape ; ’e i muri iho e tae mai ai te ha’amatarara’a nō tā ’outou ra mau hara nā roto i te auahi ’e te Vārua Maita’i.

18 ’E ’ia nā reira ’outou, tei ni’a ānei ïa ’outou i teie nei ’ē’a piriha’o ’e te ’oa’oa ē tae roa atu ai i te ora mure ’ore ra : ’oia ïa, ’ua tomo mai ’outou nā te ’ūputa ; ’ua rave māite ’outou mai te au i te mau fa’auera’a a te Metua ’e te Tamaiti ato’a ; ’e ’ua fāri’i ho’i ’outou i te Vārua Maita’i, ’o tē fa’a’ite pāpū nei i te Metua ’e te Tamaiti, e tae atu i te fa’atupura’a i te fafaura’a i parauhia e ana ra, ’o tē nā ’ō mai ra ē, ’ia tomo ’outou nā te ’ē’a mau e fāri’i ïa ’outou.

19 ’E i teienei, e tō’u mau taea’e here, e ui atu vau ia ’outou na, ’ia tae ’outou i taua ’ē’a piriha’o ra ’e te oaoa, ’o te hope’a ānei ïa ? Inaha, tē parau atu nei au ia ’outou na, ’Aita roa ; ’aita ā ’outou i tae i taua vāhi iti nei, maori rā nā roto i te parau a te Mesia ’e te fa’aro’o ’āueue ’ore iāna ra, i te ti’aturi-māite-ra’a i te mau maita’i rahi nōna, ’o tei pūai ’ia fa’aora.

20 Nō reira, ’ia haere māite ’outou i mua i te ti’a-māite-ra’a i te Mesia, ma te ti’aturi pāpū roa, ’e te here i te Atua e te ta’ata ato’a. Nō reira, mai te mea e haere māite ’outou i mua ma te rave i te fa’a’amu’a i te parau a te Mesia, ’e ma te fa’aitoito ē tae noa atu i te hope’a ra, inaha, tē nā ’ō mai ra te Metua : E fāri’i ’outou i te ora mure ’ore.

21 ’E i teienei, inaha, e tō’u mau taea’e here, teie te ’ē’a mau ; ’aita atu e ’ē’a ’e ’aita atu ho’i e i’oa i hōro’ahia mai i raro a’e i te ra’i, e ti’a ai i te ta’ata ’ia fa’aorahia i roto i te bāsileia o te Atua ra. ’E i teienei, inaha, ’o teie te mau ha’api’ira’a tumu a te Mesia ra, ’e teie ana’e te mau ha’api’ira’a tumu mau a te Metua, ’e tā te Tamaiti, ’e tā te Vārua Maita’i ho’i, hō’ē roa Atua, ’aita e hope’a. ’Āmene.