1 ’E i teienei, e parau atu vau ia ’oe na, e Iosepha, e tā’u tamaiti hope’a i fānau mai. ’Ua fānauhia mai ’oe i te mēdēbara nō tō’u ra mau ’ati ; ’oia ïa, i te mau mahana nō tō’u ra ’oto rahi roa, i fānau mai ai tō metua vahine ia ’oe na.

2 ’E ’ia ha’amo’a ato’a te Fatu i teie nei fenua, i te fenua i hau i te maita’i, nō ’oe, ’ei pārahira’a nō ’oe ’e nō tō ’oe ra hua’ai, ’e nō tō ’oe ra mau tua’ana, ’ei ha’apūra’a nō ’oe ē a muri noa atu, mai te mea e ha’apa’o ’oe i te mau fa’auera’a a Tei Mo’a i ’Īserā’ela nei.

3 ’E i teienei, e Iosepha, e tā’u tamaiti hope’a i fānau mai, ’o tā’u i hōpoi mai mai roto mai i te mēdēbara nō tō’u ra mau ’ati, ’ia ha’amaita’i mai te Fatu ia ’oe ē a muri noa atu, ’e ’aore roa ho’i tō ’oe hua’ai e ha’amou-roa-hia.

4 Inaha ho’i, e hua’ai ’oe nō tō’u nei tau’upu ; ’e e hua’ai ho’i au nō Iosepha ’o tei hōpoi-tītī-hia i ’Aiphiti. ’E e mau fafaura’a rahi ho’i tā te Fatu i fafau atu ia Iosepha ra.

5 Nō reira, ’ua ite mau Iosepha i tō tātou nei mahana. ’E ’ua roa’a iāna te fafaura’a a te Fatu, ’oia ho’i, nā roto i te hua’ai o tōna ra tau’upu e fa’atupu mai ai te Fatu te Atua i te hō’ē ’āma’a parauti’a nō te ’utuāfare o ’Īserā’ela ; ’eiaha te Mesia, ’o te tahi ’āma’a rā i ’ōfati-’ē-hia mai, ’ia ha’amana’ohia rā rātou i roto i te mau fafaura’a a te Fatu, ’e e fa’a’itehia mai te Mesia ia rātou i te mau mahana hope’a ra, nā roto i te vārua nō te mana, i te ’āfa’ira’a mai ia rātou i rāpae mai roto mai i te pōiri ē tae atu ai i te māramarama—’oia ïa, i rāpae i te pōiri ta’ota’o ’e te fa’atītīra’a ē tae atu ai i te ti’amāra’a.

6 ’Ua fa’a’ite pāpū mai ho’i Iosepha, i te nā-’ō-ra’a mai ē : E fa’aineine te Fatu ra tō’u Atua i te hō’ē hi’o, ’e e riro ’oia ’ei hi’o maita’i nō te hua’ai o tō’u ra tau’upu.

7 ’Oia ïa, ’ua parau iho ā Iosepha ē : ’Ua parau mai te Fatu iā’u : E fa’aineine au i te hō’ē hi’o maita’i nō roto mai i te hua’ai o tō tau’upu ; ’e e mana’o-maita’i-hia ’oia i rotopū i te hua’ai o tō ’oe ra tau’upu. ’E e hōro’a atu vau i te hō’ē fa’auera’a iāna ’ia rave i te tahi ’ohipa nō te hua’ai o tō ’oe ra tau’upu, tōna mau taea’e, ’o tē riro ’ei mea faufa’a rahi roa nō rātou, i te fa’a’itera’a atu ia rātou i te ’ite nō te mau fafaura’a o tā’u i fafau atu i tō ’oe ra mau metua.

8 ’E e hōro’a atu vau i te hō’ē fa’auera’a iāna ē, ’eiaha roa ’oia e rave i te tahi noa atu ’ohipa, maori rā te ’ohipa ’o tā’u e fa’aue atu iāna. ’E e fa’ariro vau iāna ’ei mea rahi i mua i tō’u ra mata ; nō te mea e rave ’oia i tā’u ’ohipa.

9 ’E e riro ’oia ’ei ta’ata rahi mai ia Mose ra, ’o tā’u i parau ra ē, e fa’aineine au iāna nō ’outou, nō te fa’aora i tō’u ra mau ta’ata, ’e te ’utuāfare o ’Īserā’ela ē.

10 ’E e fa’aineine ho’i au ia Mose, ’e nāna e arata’i mai i tō ’oe ra mau ta’ata i rāpae i te fenua ra nō ’Aiphiti.

11 ’E e fa’aineine ho’i au i te hō’ē hi’o nō roto mai i te hua’ai o tō ’oe ra tau’upu ; ’e e hōro’a atu ho’i au i te mana iāna nō te fa’atae i tā’u parau i te hua’ai o tō ’oe ra tau’upu—’eiaha nō te fa’atae i tā’u ana’e parau, tē nā reira mai ra te Fatu, nō te fa’afāriu ato’a mai rā ia rātou i tā’u nei parau ’o tei tae a’ena atu i rotopū ia rātou.

12 Nō reira, e pāpa’i te hua’ai o tō ’oe ra tau’upu ; ’e e pāpa’i ho’i te hua’ai o tō Iuda ra tau’upu, ’e tā te hua’ai o tō ’oe ra tau’upu e pāpa’i, ’e tā te hua’ai ho’i o tō Iuda ra tau’upu e pāpa’i, e tupu ’āpiti ïa nō te fa’a’orera’a i te mau ha’api’ira’a hape ’e te fa’a’orera’a i te mau mārōra’a, ’e nō te fa’atupura’a i te hau i rotopū i te hua’ai o tō ’oe ra tau’upu, ’e nō te arata’ira’a ia rātou i te ’ite nō ni’a i tō rātou ra mau metua i te mau mahana hope’a, ’e i te ’ite ho’i nō ni’a i tā’u ra mau fafaura’a, tē nā reira mai ra te Fatu.

13 ’E mai roto mai i te paruparu e ha’apūaihia ’oia i te mahana e ha’amatahia ai tā’u ’ohipa i rotopū i tō’u ra mau ta’ata ato’a, i te fa’aho’ira’a ia ’outou, e te ’utuāfare o ’Īserā’ela, tē nā reira mai ra te Fatu.

14 ’E ’ua tohu Iosepha, i te nā-’ō-ra’a ē : Inaha, e ha’amaita’i mai te Fatu i taua hi’o ra ; ’e ’o rātou ’o tē ’imi ’ia ha’amou iāna e ha’amouhia ïa ; nō te mea e tupu te fafaura’a i roa’a mai iā’u nō ’ō mai i te Fatu ra, nō ni’a i te hua’ai o tō’u ra tau’upu. Inaha, ’ua ’ite pāpū vau i te tupura’a o teie nei fafaura’a.

15 ’E e ma’irihia tōna ra i’oa i tō’u nei i’oa ; ’e i te i’oa ato’a ho’i o tōna ra metua tāne. ’E e riro ’oia mai iā’u nei te huru ; ’e nā te mea tā te Fatu e fa’atupu nā roto i tōna rima, nā roto i te mana o te Fatu, e arata’i i tō’u ra mau ta’ata i te fa’aorara’a.

16 ’Oia ïa, ’ua tohu mai ra Iosepha, nā ’ō mai ra : ’Ua ’ite pāpū vau i te reira, mai tā’u ato’a i ’ite i te fafaura’a ia Mose ra ; nō te mea ’ua parau mai te Fatu iā’u, e fa’aherehere au i tō ’oe hua’ai ē a muri noa atu.

17 ’E ’ua parau mai te Fatu i te nā-’ō-ra’a mai ē : E fa’aineine au ia Mose, ’e e hōro’a atu vau i te mana iāna i roto i te hō’ē rā’au ; ’e e hōro’a ato’a atu vau i te pa’ari iāna ’ia pāpa’i i te parau. Terā rā ’aita vau e ha’amatara i tōna vaha ’ia parau rahi, ’e ’aita ato’a vau e fa’ariro iāna ’ei ta’ata pūai i te paraparau. ’Āre’a rā e pāpa’i au i tā’u ra ture iāna i tō’u iho rima ; ’e e fa’aineine ato’a vau i te hō’ē auvaha nōna.

18 ’E ’ua parau ato’a mai ra te Fatu iā’u : E fa’aineine au i te hō’ē hi’o nō roto i te hua’ai o tō ’oe ra tau’upu ; ’e e fa’aineine ato’a vau i te hō’ē auvaha nōna. ’E inaha, nā’u, nā’u nei e hōro’a atu i te mana iāna ’ia pāpa’i i te parau a te hua’ai o tō ’oe ra tau’upu, i te hua’ai o tō ’oe ra tau’upu ; ’e nā te auvaha nō tō ’oe ra tau’upu e fa’a’ite i te reira.

19 ’E te mau parau tāna e pāpa’i, ’o te mau parau ïa ’o tei au i tō’u nei pa’ari, ’ia fa’a’itehia atu i te hua’ai o tō ’oe ra tau’upu. ’E e riro ho’i te reira mai te mea ra ē, i pi’i na te hua’ai o tō ’oe ra tau’upu ia rātou mai raro mai i te repo ra ; ’ua ’ite ho’i au i tō rātou ra fa’aro’o.

20 ’E e pi’i mai rātou mai raro mai i te repo ra ; ’oia ïa, i te parau tātarahapa i tō rātou ra mau taea’e, ē tae noa atu ’ua ma’iri e rave rahi u’i i muri ia rātou. ’E a muri a’era, e parare tā rātou pi’i mai te au i te pāpū o tā rātou ra mau parau.

21 ’E nō tō rātou fa’aro’o, e tae atu tā rātou mau parau nā roto atu i tō’u nei vaha i tō rātou ra mau taea’e, ’oia ho’i i te hua’ai o tō ’oe ra tau’upu ; ’e nā roto i tō rātou fa’aro’o e fa’a’eta’eta ai au i tā rātou ra mau parau paruparu, i te ha’amana’ora’a i tā’u fafaura’a i fafau atu i tō ’oe ra mau metua.

22 ’E i teienei, inaha, e tā’u tamaiti e Iosepha, i nā reira mai tō’u ra tupuna i te ’anotau tahito i te tohu mai.

23 Nō reira, nō teie nei fafaura’a e ha’amaita’ihia ai ’oe ; e ’ore roa ho’i tō ’oe ra hua’ai e ha’amouhia, nō te mea e ha’apa’o rātou i te mau parau a te buka.

24 E ti’a mai ho’i te hō’ē ta’ata mana rahi i rotopū ia rātou, ’o tē rave i te ’ohipa maita’i roa, nā roto i te parau e nā roto ho’i i te ’ohipa, ’e e riro ’oia ’ei mauha’a i roto i te rima o te Atua, ma te fa’aro’o rahi, nō te rave i te mau ’ohipa ’ūmere-roa-hia, ’e nō te rave i te mea rahi i mua i te mata o te Atua, i te fa’aho’ira’a mai i te mau mea e rave rahi i te ’utuāfare o ’Īserā’ela, ’e i te hua’ai ho’i o tō ’oe ra mau taea’e.

25 ’E i teienei, e ao tō ’oe, e Iosepha. Inaha, e mea ’āpī ’oe ; nō reira a ha’apa’o i te mau parau a tō tua’ana ra, ’o Nephi, ’e e roa’a tā ’oe mai te au i te mau parau tā’u i parau ra. ’A ha’amana’o i te mau parau a tō metua tāne nei, ’o tei fātata i te pohe. ’Āmene.