1 A Tun anchah u yúchuleʼ, le cah dzoʼoc u yaʼalic le baʼaloʼobaʼ Jesuseʼ tu sutuba tu caʼatén tu tánil le yaʼabach maʼcoʼoboʼ ca hoʼopʼ u caʼa aʼalic tiʼoʼob: Maʼ ta juzgarteʼex tu yoʼolal maʼ a juzgartaaleʼex.

2 Tumen yétel le juicio iquiʼl a juzgartiʼqueʼex can juzgartbileʼexoʼ; yétel xan le pʼis le ca pʼisiqueʼexoʼ tiʼ can pʼisbileʼex xaniʼ.

3 Yételeʼ baʼaxtén ca pactiʼc le hach chichan xétʼ cheʼ yan tu yich a sucuʼunoʼ baʼaleʼ maʼ tán a wilic le nohoch cheʼ yan ta wich techoʼ?

4 Wá bix únchac a wáʼalic tiʼ a sucuʼun: chaʼ in hóksic le chichan xétʼ cheʼ yan ta wichoʼ; heʼel túnaʼ yan humpʼél nohoch cheʼ ta wich tech?

5 Caʼapʼél a wich! Yáxeʼ hóks le nohoch cheʼ yan ta wich techoʼ; bey túnoʼ cu sásiltal a pacat utiaʼal a hóksic le chichan xétʼ cheʼ yan tu yich a sucuʼunoʼ.

6 Maʼ a dzaiqueʼex maʼalob baʼaloʼob tiʼ pekoʼob, mix xan a puliqueʼex a perlaeʼex tu tánil kékenoʼob; tumen maʼ xan ca u yaʼachʼeʼtoʼobiʼ yételeʼ wá cu sutoʼobeʼ cu xeʼexeʼetʼiqueʼex.

7 Kátneneʼexeʼ, bey bín dzaʼabac teʼexoʼ, dzaʼabaeʼex a caxteʼexeʼ bey bín a caxteʼexoʼ, kopneneʼexeʼ bey bín heʼebec teʼex le honahoʼ.

8 Tumen le maʼx cu káteʼ, cu kamic, le maʼx cu dzicuba u caxtiʼqueʼ, cu caxtiʼc; le maʼx cu kopeʼ, cu heʼebel le honahoʼ tiʼ.

9 Máx yan ichileʼex ca kátaac teʼex hunxetʼ wáh tumen u paleʼ ca a dza humpʼél tunich tiʼ?

10 Wá cu kátaal teʼex cayeʼ ca a dza tiʼ huntúl can?

11 Wá teʼexeʼ kasaʼaneʼexeʼ, a woheʼleʼex a dziqueʼex maʼalob baʼaloʼob tiʼ a palaleʼexeʼ, cux tún a Tataeʼex yan teʼ caʼanoʼ maʼ u dzaic baʼaloʼob maʼalobtac tiʼ le maʼxoʼob kátiʼc tiʼoʼ?

12 Bey túnoʼ heʼebaʼaxac a kát ca u bet le maʼcoʼoboʼ tiʼ teʼexeʼ, bey u deber a betiʼqueʼex tiʼoʼoboʼ tumen lelaʼ letiʼ le ley yétel le profetaoʼoboʼ.

13 Oqueneʼex teʼ beh nuʼutʼoʼ, tumen cóch le honah beyxann le beh cu bin tiʼ a xuʼululeʼexoʼ yétel yaʼabach maʼcoʼob cu yocoloʼob tiʼ.

14 Tumen nuʼutʼ le honah, yétel nuʼutʼ xan le beh cu bin tiʼ cuxtaloʼ, yétel maʼ yaʼab maʼc caxtiʼquiʼ.

15 Taʼacabaeʼex tiʼ le maʼ hahil profetaoʼob cu tal ta wicnaleʼex beyoʼob tamaʼnoʼoboʼ, baʼaleʼ lobosoʼoboʼ cu hantiʼc baʼalcheʼ.

16 Tu yoʼolal u yich quen a kahólteʼexoʼob. Cu yémsaʼal wá put tiʼ kiʼixoʼob, wá maʼngo tiʼ kiʼixoʼob?

17 Lailiʼbey xanoʼ, tulácal maʼalob cheʼ cu dzaic maʼalob ich baʼaleʼ humpʼél kakas cheʼeʼ, kas xan u yich.

18 Humpʼél maʼalob cheʼ maʼ tu páhtal u dzaic yich kas, mix xan humpʼél kakas cheʼ, maʼ tu páhtal u dzaic maʼalob ich.

19 Tulácal cheʼ wá maʼ tán u dzaic maʼalob icheʼ cu chʼaʼacaleʼ cu puʼulul ich kák.

20 Le betiʼc túneʼ tu yoʼolal u yich quen a kahólteʼexoʼob.

21 Maʼ tulácal maʼc aʼalic ten: Yumtsil, Yumtsil, bín ococ tu reinoil caʼaniʼ; baʼaleʼ le maʼx cu be tiʼc le baʼax cu yóltiʼc in Tata yan teʼ caʼanoʼ.

22 Yaʼab maʼxoʼob cun aʼalic teneʼ: Yumtsil, Yumzil, maʼ c aʼalmaʼh tʼanoʼob ta kabaʼiʼ, bey xan c pulmaʼh kakas pixanoʼob, yétel xan ta kabaʼ c betmaʼh yaʼab milagroʼob utstac?

23 Baʼaleʼ teneʼ quen in wáʼal tiʼoʼobeʼ: Maʼ in kahóleʼexiʼ; náchcuntabaeʼex tiʼ ten le ca betiʼqueʼex kasoʼ.

24 Le betiʼc túneʼ le maʼx cu yuʼubic le baʼax quiʼn wáʼalic ca u betoʼ, letiʼ hach bey huntúl maʼc yaʼab u naʼat tu betah u yotoch yókol humpʼél nohoch tunich.

25 Cah tal le chácoʼob, h tal le yaʼab haʼoʼoboʼ, h tal le ikoʼoboʼ cah lúb hach kaʼam yókol le nahoʼ, baʼaleʼ maʼ h lúbiʼ, tumen dzaʼab yókol humpʼél nohoch tunich.

26 Tulácal xan le maʼxoʼob uʼuyic le baʼaxoʼob quiʼn wáʼalic maʼ tán u betiʼcoʼobeʼ, letiʼoʼob hach bey huntúl maʼc maʼ yaʼab u naʼat tu betah u yotoch yókol árena;

27 Cu tal le chácoʼ, h tal le yaʼab haʼoʼoboʼ, yétel tal le ikoʼoboʼ, le cah lúb hach kaʼam yókol le nahoʼ h lúbiʼ, u lúbuleʼ hach nohoch.