1 Ca tún yanchah tu yaʼalah tiʼ le maʼxoʼob tún caʼansicoʼob yétel tiʼ le yaʼabach maʼcoʼoboʼ ca anac u xulic u oraroʼob, baʼaleʼ tu yaʼalah tiʼoʼobeʼ maʼ tu háwsic u oraroʼob tu pucsiʼkaloʼob.

2 Ca tu yaʼalah tiʼoʼobeʼ ca anac u wáʼataloʼob. Ca tún h líkoʼobeʼ cah pʼátoʼob wáʼatal.

3 Ca tún letiʼ tu xetʼah wáh tu caʼaténeʼ, ca tu bendecirtaheʼ ca tu dzah tiʼ le maʼxoʼob tán seguirtiʼcoʼob ca u hantoʼob.

4 Le cah dzoʼoc u hanaloʼobeʼ tu yaʼalah tiʼoʼob ca u xetʼoʼob wáheʼ ca u dzaoʼob tiʼ le yaʼabach maʼcoʼoboʼ.

5 Le cah dzoʼoc u dzaicoʼob tiʼ le yaʼabach maʼcoʼoboʼ, tu dzah u haʼil uva xan tiʼoʼob u yukoʼob, yétel tu yaʼalah tiʼoʼob xan ca u dzaoʼob tiʼ le yaʼabach maʼcoʼoboʼ.

6 Maʼ taasaʼab wáh mix u haʼil uvaeʼ tumen le maʼcoʼob u yéymaʼh Cristo mix le ulʼakoʼobo!

7 Baʼaleʼ hach tu hahil tu dzah wáh u hantoʼob yétel u haʼil uva u yukoʼob.

8 Ca tu yaʼalah tiʼoʼob: Le maʼx hantiʼc le wáhaʼ in bakel cu hantiʼc utiaʼal u pixan; le maʼx xan yukic le haʼil uvaeʼ, in kiʼikel cu yukic utiaʼal u pixan, yételeʼ u pixaneʼ mix bikin u mukyaht wiʼih mix u kahil, baʼaleʼ umpuliʼ cun h naʼahtal.

9 Le tún cah dzoʼoc u hanal yétel u yukul tulácal le maʼcoʼoboʼ, heʼel túnaʼ, h chuʼupoʼob yétel Pixan cu túxtiʼc Dios; ca tún kaʼam tʼanahoʼob ca tu dzah gloria tiʼ Jesus, maʼx tán u yilicoʼob yétel tán u yuʼubicoʼob u tʼan.

10 Le cah dzoʼoc u glórificartiʼcoʼob Jesus tulácaloʼobeʼ ca tu yaʼalah tiʼoʼob: Heʼel túnaʼ, beʼora quiʼn láh betiʼc maʼndamiento u dzamaʼh ten in tata tu yoʼolal le cahaʼ, lelaʼ u yalab u nahil Israel.

11 Kaʼahac teʼexeʼ tiʼn tʼanaheʼex yétel tiʼn wáʼalah teʼexeʼ le quen dzoʼocsaʼac baʼax u yaʼalmaʼh Isaiaseʼ, heʼel túnaʼ, dzíbtaan, actanileʼex yan a xoquiʼqueʼex ichiloʼob,

12 Tu hahil, tu hahil quiʼn wáʼalic teʼexeʼ, le quen dzoʼocsaʼacoʼobeʼ, cu dzoʼocsaʼal tún le promesa u betmaʼh le Tata yétel u cahaloʼ, u nahil Israel.

13 Le tún u yalab kiʼitpahaʼan yókol le luʼumaʼ bín moloc tiʼ lakin tac chikin, nohol yétel xamaʼn; cu kuchul tún u kahólt Yumtsil u Hahal Dios le maʼx tu luksah le químil.

14 Le Tataoʼ u yaʼalmaʼh ten ca in dza teʼex le luʼumaʼ utiaʼal a atiaʼalinteʼex.

15 Quin wáʼalic tún teʼexeʼ le maʼxoʼob maʼ tiʼ u nahil Israel u taloʼoboʼ wá maʼ tán u kexic u tuculoʼob yétel le baʼax cu mentiʼcoʼobeʼ quen dzoʼococ le bendicion quen u kamoʼob, le quen dzoʼococ u kiʼitsicoʼob in cahaloʼ;

16 Teʼex tún u yalabeʼex u nahil Jacobeʼ, bín xiʼiqueʼex ichiloʼob; bín yanaqueʼex chúmuc tiʼ letiʼoʼob yaʼaboʼobeʼ; yan a beytaleʼex huntúl leon chúmuc u baʼalcheʼiloʼob kaxeʼ, yétel beyeʼex u meheʼn leon ichil h tamaʼnoʼobeʼ, letiʼeʼ wá cu maʼn chúmuqueʼ cu peʼpeʼchaʼtiʼc yétel cu xeʼexeʼetʼic, mixmaʼc cun h páhtal u toquiʼcoʼob.

17 A kabeʼbín líkiʼc yókol a enemigoʼob, yétel tulácal a enemigoʼobeʼ bín wáʼalcunsaʼacoʼob.

18 Ten túneʼ bín in mol in cahal bey heʼebix huntúl maʼc cu molic u yich u pakal tu kinileʼ.

19 Tumen bín in bet in cahaleʼ, maʼx yétel le Tataoʼ u betmaʼh humpʼél promesa, bixmaʼiʼ, a baqueʼ yétel hierro bín in beteʼh, a wíchʼacoʼobeʼ yétel bronce. Bey túnoʼ bín a lolobcunt yaʼabach cahoʼob; yétel bín u kub tiʼ Yumtsil u ayikaliloʼob, u baʼalubailoʼobeʼ tiʼ u Yumtsilil tulácal le yokolcabaʼ. Heʼel túnaʼ ten le maʼx mentiʼcoʼ.

20 Cu yantal yúchuleʼ, cu yaʼalic le Tataoʼ, tiʼ bin le kinoʼ u tádz maʼscabil in justiʼciaeʼ bín chʼuylac yókoloʼob; tún wáʼ ca kexic u yóloʼobeʼ yétel le baʼax cu mentiʼcoʼob xan cu yaʼalic le Tataoʼ, wáʼ maʼeʼ bín lúbuc yókoloʼob, yókol tulácal le maʼcoʼob maʼ tiʼ u nahil Israel u taloʼoboʼ.

21 Yan u yúchul tún bín in wédzcunt in cahal u nahil Israel.

22 Heʼel túnaʼ bín in wédzcunt le cahal wáy luʼumaʼ utiaʼal u cumplir le promesa in betmaʼh yétel Jacob a tataeʼexoʼ; bín beychahac humpʼél túmben Jerusalen. U páhtaliloʼob teʼ caʼanoʼob bín anac ichil le cahaʼ; tac ten bín anaquen chúmuc tiʼ teʼex.

23 Heʼel túnaʼ, ten le maʼx tu yaʼalah teʼex Moises, le ca tu yaʼalah: Yumtsil a Hahal Dioseʼexeʼ bín u líks atiaʼaleʼex huntúl profeta ichil a sucuʼuneʼex, hach chicaʼan tiʼ ten. Tiʼ letiʼ ca a wuʼuyeʼex tulácal baʼax bín u yaʼal teʼex. Cun úchul túneʼ tulácal le maʼcoʼob maʼ tán u yuʼuboʼob u tʼan le profetaoʼ bín hóksaʼac tiʼ le cahoʼ.

24 Tu hahil quiʼn wáʼalic teʼexeʼ tulácal le profetaoʼoboʼ, beyoʼ desde Samuel yétel le ulʼakoʼoboʼ, heʼebucaʼah dzoʼoc u tʼanoʼobeʼ dzoʼoc u tʼanoʼob tiʼn woʼolal.

25 Heʼel túnaʼ teʼexeʼ u palaloʼobeʼex le profetaoʼoboʼ; yétel u tyaʼan tu nahil Israel; tiʼ yaneʼex xan tiʼ le promesa tu betah le Tata yétel a úchben tataeʼexoʼob le ca tu yaʼalah tiʼ Abrahameʼ: Tiʼ u palal a palal bín bendecirtaac tulácal le familiaoʼob teʼ luʼumaʼ.

26 Tumen le Tataoʼ dzoʼoc u líksiquen ca taquen ta wicnaleʼex, yáx, yétel tu túxtaheʼn in bendecirteʼex, ca in bis huhuntúlil tiʼ teʼex tiʼ a kebaneʼex; lelaʼ tumen u palaleʼex le promesa,

27 Cu dzoʼocol tún a bendecirtaaleʼexeʼ, le Tata túnoʼ cu dzoʼocsic le promesa tu betah yétel Abraham, ca tu yaʼalaheʼ; tu yoʼolal a palal bín bendecirtaac tulácal le familiaoʼob wáy yokolcabaʼ, tac cu weʼequel le Pixan cu túxtiʼc Dios tiʼn woʼolal yókol le maʼxoʼob maʼ tiʼ u nahil Israel u taloʼob le tún le bendicion tiʼ le maʼxoʼob maʼ tiʼ u nahil Israel u taloʼoboʼ, letiʼ quen u ment u maʼs muktaloʼob tiʼ tulácal maʼc, tu yoʼolal leloʼ yan kiʼitiʼcoʼob in cahal, u nahil Israel.

28 Letiʼoʼobeʼ yan u beytaloʼob hadz utiaʼal le cah tiʼ le nácionaʼ. Chén baʼaliʼ, le quen dzoʼococ u kamicoʼob hach u chucaʼaniʼl in caʼansahil wá cu chichcuntiʼcoʼob ten u pucsiʼkaloʼobeʼ, quiʼn betiʼc u sut u kebanoʼob yókol u poloʼob, cu yaʼalic le Tataoʼ.

29 Teneʼ quiʼn kaʼahsic le promesa in betmaʼh yétel in cahaloʼ, yétel in dzamaʼh in tʼan yételoʼob bín in moloʼob le quen kuchuc tu kinoʼ yételeʼ quiʼn caʼa dzaic tiʼoʼob u luʼumil u tataoʼob utiaʼal u baʼalubaintoʼob, leloʼ letiʼ u cahil Jerusalen, le luʼum prometertaan maʼntadz, cu yaʼalic le Tataoʼ.

30 Tan tún u yúchuleʼ bín kuchuc tu kinil u yaʼalaʼal in caʼansahil tiʼoʼob hach tu bel.

31 Yétel bín creernacoʼob tiʼ ten, Jesucristoen, u Pal Hahal Dios; yétel bín orarnacoʼob tiʼle Tataoʼ tiʼn kabaʼ.

32 Bey bín h kaʼam tʼanac le maʼxoʼob cu canánt le honahoʼ yétel bín mul kaynacoʼob; tumen bin pacatoʼob ich yétel ich.

33 Bey túnoʼ le Tataoʼ cu caʼa múchʼquiʼntiʼcoʼob yétel bín dzaʼabac Jerusalen tiʼoʼob utiaʼal u luʼumil utiaʼalintoʼob.

34 Bey túnoʼ bín h kaʼam tʼanacoʼob yétel quiʼmaʼc ólal: Mul kayneneʼex, teʼex cúchileʼex minaʼan mixmaʼc tiʼ, tu cahil Jerusalen; tumen le Tataoʼ dzoʼoc u tsolic u xiquiʼn u cahal, dzoʼoc u salvartiʼc Jerusalen.

35 Le tataoʼ dzoʼoc u sílic u kabil u nok actán tiʼ tulácal le nacionoʼoboʼ; yétel tiʼ tulácal u xul luʼum bín ilaʼac le páhtalil yókol le químil yan tiʼ le Tataoʼ; le Tata yétel tenoʼ humpʼéliloʼon.

36 Bey túnoʼ cu yúchul le baʼax dzíbtaanoʼ: Áheʼn, áheʼn tu caʼatén, ca a búcquiʼnt yétel a hadzuts nokoʼob, u sagrado nohoch cahil Jerusalen; tumen mix bikin bin talac ta wicnal tu caʼatén le maʼxoʼob maʼ u sasac u pucsiʼkaloʼoboʼ wá le kakas maʼcoʼoboʼ!

37 Tét a polvo líken, culen Jerusalen; wáchʼ u kaxil a caloʼ u kalbil xchʼupal Sion!

38 Tumen bey cu yaʼalic Yumtsilaʼ: Dzoʼoc a conicabaʼeʼex xmaʼ tohol, yétel maʼ tu yoʼolal takin cu caʼa dzaʼabaleʼex.

39 Tu hahil, tu hahil quiʼn wáʼai lic teʼexeʼ, in cahaleʼ bín u kahólt in kabaʼ, bey, tiʼ le kinoʼ bín u yoheltoʼob ten le maʼx cu tʼanaʼ.

40 Quen u yaʼaloʼob túneʼ: Bucaʼah hadzutsil u yoc le maʼcoʼob tiʼ yókol le muloʼob le maʼxoʼob tasic le túmben péctsiloʼ; cu kaytiʼc hédzel ól; cu tasic sen maʼalob tʼan tiʼ letiʼoʼob; cu kaʼaytiʼc le toc sahiloʼ; cu yaʼalic tiʼ Sioneʼ: Tán u betiʼc u reino a Hahal Dios!

41 Cun h uʼuybil le tʼanoʼ: Tselabaʼeʼex, lúkeneʼex, lúkeneʼex teʼ tuʼux yaneʼexoʼ, maʼ a maʼchiqueʼex baʼaloʼob kastac; hókeneʼex chúmuc tiʼ letiʼ; saccuntabaeʼex teʼex ca bisiqueʼex u vaso Yumtsil!

42 Tumen maʼ bín hokoqueʼex álcabiliʼ mix bín xiʼiqueʼex tán a púdzuleʼexiʼ; tumen Yumtsileʼ bín xímbalnac tánil tiʼ teʼex yétel u Hahal Dios Israeleʼ, ta pachileʼex cu bin.

43 Heʼel túnaʼ le maʼx cu meyahtiʼquen cu meyah yétel u naʼatiʼl; cu kamic le cuxtal tiʼn wétel, cu quiʼquiʼtʼantaal yétel bín dzaʼabac tiʼ humpʼél cúchil hach caʼanal.

44 Heʼebix u yaʼabil maʼcoʼob haʼak yóloʼob tiʼ techoʼ tiʼ hach heʼlpahic u yicheʼ, maʼs heʼlaʼan tiʼ heʼmaʼxaqueʼ yétel u formaʼeʼ maʼs heʼlaʼan tiʼ le u palal maʼcoʼoboʼ.

45 Bey bín pulic huhumpʼítiʼl yókol yaʼabach nacionoʼob; tu tánileʼ bín u maʼc u chiʼ le reyoʼoboʼ le baʼax tumen maʼ h tsicbaltaab tiʼoʼobiʼ cun yiloʼob; yétel bín tuculnacoʼob yoʼolal le baʼaxoʼob maʼ u yuʼubmaʼhoʼoboʼ.

46 Tu hahil, tu hahil quiʼn wáʼa lic teʼexeʼ le lic teʼexeʼ tulácal le baʼaloʼobaʼ yan u yúchul heʼebix le maʼndamiento dzaʼan ten tumen le Tataoʼ. Bey túnoʼ cu láh betaal le promesa u mentmaʼh le Tata yétel u cahaloʼ; yételeʼ yan u cahtal tu caʼatén in cahal tiʼ Jerusalen, leloʼ yan u pʼátal utiaʼalintoʼob.