1 Heʼel túnaʼ behlaʼeʼ quiʼn wáʼalic teʼexeʼ u deber a sén xoqueʼex le baʼaloʼobaʼ. Bey, quiʼn dzaic teʼex maʼndimientoil a dzic a wóleʼex a xoqueʼex yaʼab le baʼaloʼobaʼ, tumen nuctac le baʼaxoʼob u yaʼalmaʼh Isaias.

2 Tumen hach tu hahileʼ, letiʼeʼ h tʼanah tu yoʼolal tulácal baʼaloʼob yókol in cahal le yan tu nahil Israeloʼ; le betiʼqueʼ, hach kabét ca tʼanac letiʼ xan yétel le maʼxoʼob maʼ tiʼ u nahil Israel u taloʼoboʼ.

3 Tulácal xan le baʼaloʼob tu yaʼalahoʼ dzoʼoc u yúchul, beyxann cun úchuloʼob heʼebix u yaʼalmaʼhileʼ.

4 Le betiʼqueʼ uʼuyeʼex in tʼanoʼob; dzíbteʼex le baʼaxoʼob dzoʼoc in wáʼalic teʼexoʼ; yétel heʼebix u kinil yétel le baʼax tu yólah le Tataoʼ bey bín xiʼic tiʼ le maʼxoʼob maʼ tiʼ u nahil Israel u taloʼoboʼ.

5 Yételeʼ, le maʼx bín u yuʼub baʼax quiʼn wáʼalicoʼ, yétel ca anac u kexic u yól yétel le baʼax cu betiʼqueʼ ca dzaʼabac u yoc haʼeʼ bín u salvarteʼ. Xoqueʼex yétel tulácal a wóleʼ le baʼax u dzíbtmaʼh le profetaoʼoboʼ, tumen yaʼaboʼobeʼ cu yaʼalicoʼob u hahil yoʼolal le baʼaloʼobaʼ.

6 Le tún cah dzoʼoc u yaʼalic Jesus le tʼanoʼobaʼ, tu caʼa aʼalah tiʼoʼob, cu dzoʼocol u láh tsolic le sagrado dzíboʼob u kammaʼhoʼobeʼ, ca tu yaʼalah tiʼoʼob: Heʼel túnaʼ in kát ca a dzíbteʼex ulʼak sagrado dzíboʼob minaʼan teʼex.

7 Ca tún tu yaʼalah tiʼ Nefi: Tas ten le baʼaxoʼob dzíbtaan a taacmaʼhoʼ.

8 Le tún cah bisaʼab tiʼ tumen Nefi le baʼaxoʼob dzíbtaanoʼ ca tu dzah tánil tiʼ, Jesuseʼ tu yiloʼob ca tu yaʼalah:

9 Tu hahil quiʼn wáʼalic teʼexeʼ tiʼn wáʼalah tiʼ in siervo Samuel u palal Lamaneʼ, ca tʼanac tu hahil tiʼ le cahaʼ decosque le kin quen u glorificart u kabaʼ le Tataoʼ tiʼ tenoʼ, cun líkiʼloʼob yaʼabach sén maʼalob maʼcoʼob ichil le quiʼmenoʼoboʼ yétel bín chicpahacoʼob tiʼ yaʼab maʼcoʼob, letiʼoʼobeʼ quen u meyahtoʼob. Ca tún tu yaʼalah tiʼoʼob: Maʼ wá bey úchiquiʼ?

10 Le maʼxoʼob yéyaʼan tumen Letiʼ ca tu yaʼalahoʼob: Beyoʼ, Yumtsil, Samueleʼ tu yaʼalah le baʼax bín úchucoʼ heʼebix a wáʼalmaʼhileʼ yétel tulácal u tʼaneʼ úchi.

11 Ca tún h aʼalaʼab tiʼoʼob tumen Jesus: Bix yaniʼl maʼ a dzíbteʼex le heʼelaʼ tuʼux cu yaʼalic yaʼabach sén maʼalob maʼcoʼob h líkoʼob yétel h chicpahoʼob tiʼ yaʼabach maʼcoʼob yétel tu meyahtoʼob?

12 Ca tún kahaʼan tiʼ Nefieʼ le heʼeloʼ maʼ dzíbtaaniʼ.

13 Úch u maʼn, Jesus ca tu yaʼalah ca dzíbtaac; bey túnoʼ cah dzíbtaab heʼebix u yaʼalmaʼhileʼ.

14 Bey túnoʼ cu dzoʼocol u tsolic Jesus tiʼoʼob tulácal le sagrado dzíboʼob tiʼ humpʼéleʼ ca tu yaʼalah tiʼoʼob ca u caʼansoʼob le baʼaxoʼob dzoʼoc u tsolic tiʼoʼoboʼ.