1 Heʼel túnaʼ le cah dzoʼoc u yaʼalic Jesus le baʼaloʼobaʼ ca tu maʼnsah u pacat tu baʼpach le yaʼabach maʼcoʼob tu caʼaténoʼ ca tu yaʼalah tiʼoʼob: Heʼel túnaʼ tán u kuchul in kinil.

2 Tán in wiliqueʼ hach minaʼan a mukeʼex, maʼ tán u páhtal a naʼatiʼqueʼex le in tʼanoʼob tu yaʼalah ten le Tata ca in wáʼal teʼex behlaʼaʼ.

3 Le betiʼqueʼ xéneʼex ta wotocheʼex yétel ca tuculnaqueʼex tu yoʼolal le baʼaxoʼob dzoʼoc in wáʼalic teʼexoʼ ca xan a káteʼex tiʼ le Tata tiʼn kabaʼoʼ ca páhchahac a naʼatiʼqueʼex; sámaʼleʼ quiʼn caʼa sut ta wicnaleʼex.

4 Baʼaleʼ beʼoraaʼ tán in bin tu yicnal le Tataoʼ, yétel bin in caʼah xan in weʼesinba tiʼ le u tribuiloʼob Israel saʼataanoʼoboʼ, tumen maʼ saʼataanoʼob tiʼ le Tataoʼ, letiʼeʼ yoheʼl tuʼux tu bisah.

5 Le tún cah dzoʼoc u tʼan Jesus beyoʼ ca tu sut u pácat le yaʼabach maʼcoʼoboʼ ca tu yilaheʼ tán yókoloʼob, ca tu hach pactahoʼobeʼ bey wá tán u yaʼalicoʼob tiʼ ca pʼátac humpʼít ora maʼs ichiloʼobeʼ.

6 Ca tún tu yaʼalah tiʼoʼob: Heʼel túnaʼ chup in pucsiʼkaleʼ quiʼn chʼaʼic ótsilil ta woʼolaleʼex.

7 Yan wá kohaʼanoʼob ichileʼex? Taseʼexoʼob wáyeʼ. Yan wá maʼcoʼob maʼ toh u xímbaloʼob, wá chʼopoʼob, wá dzoʼoc u yúchul lob tiʼoʼob, wá minaʼan hundzít u yok, wá leprosoʼob, wá minaʼan u mukoʼob, wá cócoʼob, wá maʼxoʼob yan heʼebaʼax yayah ólil tiʼoʼobeʼ? Taseʼexoʼob wáyeʼ ten quiʼn dzaquiʼcoʼob, tumen quiʼn chʼaʼic ótsilil tiʼ teʼex; chup in pucsiʼkaleʼ, quiʼn chʼáic ótsilil.

8 Tán in wiliqueʼ hach tán a dzíboltiʼqueʼex ca in weʼes teʼex le baʼaxoʼob dzoʼoc in betiʼc tu yoʼolal a sucuʼuneʼexoʼob teʼ Jerusalenoʼ, tumen tán in wiliqueʼ chucaʼan a feeʼex utiaʼal ca in dzaqueʼex.

9 Le tún cah dzoʼoc u yaʼalic le baʼaloʼobaʼ, tulácal le yaʼabach maʼcoʼoboʼ umpuliʼ tu nadzahubaoʼob tán u bisic u kohaʼanoʼob yétel le yan u mukyahoʼoboʼ, le maʼxoʼob maʼ toh u xímbaloʼoboʼ, u chʼopoʼob, u cócoʼob yétel tulácal le maʼxoʼob yan heʼebaʼaxac yayah ólal tiʼoʼoboʼ; ca tu láh dzacah heʼebix u bisaʼal tu yicnaleʼ.

10 Tulácaloʼob túneʼ, heʼebix le h dzaʼacoʼoboʼ bey heʼebix xan le toh yóloʼoboʼ tu chinah u póloʼob tu yoqueʼ ca tu hach creertahoʼob tiʼ; heʼel tún heʼebucaʼah tiʼ le yaʼabach maʼcoʼob h pátchah u nadzicubaoʼob tu yicnaleʼ tu dzuʼudzoʼob u yoc tac tu pʼoʼahoʼob yétel u haʼil u yichoʼob.

11 Ca tún tu yaʼalah ca u tasoʼob u meheʼn palal tu yicnal.

12 Ca tún tu bisah u meheʼn palaloʼobeʼ cah culahoʼob h luʼum tu baʼpach, Jesus túneʼ cah pʼaʼat ichiloʼob le yaʼabach maʼcoʼoboʼ ca hoʼopʼ u dzaicoʼob tuʼux yúchul maʼn tac cah láh bisaʼaboʼob tu yicnal.

13 Le tún cah dzoʼoc u láh bisaʼaloʼob tu yicnaleʼ, cah pʼaʼat Jesus ichiloʼob, ca tu yaʼalah tiʼ le yaʼabach maʼcoʼoboʼ ca xolacoʼob h luʼum.

14 Le cah dzoʼoc u xoltaloʼob luʼumeʼ cah okolnah Jesus tu dzuʼ u pixaneʼ ca tu yaʼalah: Tata, yah in wól tu yoʼolal u kasiʼl u cahil u nahil Israel.

15 Le cah dzoʼoc u yaʼalic le tʼanoʼobaʼ xolah xan luʼum; heʼel túnaʼ cah orarnah tiʼ le Tataoʼ, le baʼaxoʼob tu yaʼalah ichil u oracionoʼ maʼ tu páhtal u dzíbtaal, le maʼxoʼob ichil le yaʼabach maʼcoʼob tu yuʼubahoʼoboʼ cu dzaicoʼob u tʼan decosque hah.

16 Bey u hah tʼanoʼobaʼ: Mix huntén ilaʼac tumen u yich maʼc wá uʼuyaʼac tumen u xiquiʼn maʼc baʼaloʼob sén nuctac yétel hadzutstac heʼebix le dzoʼoc c ilic yétel c uʼuyic u yaʼalic Jesus tiʼ le Tataoʼ.

17 Minaʼan ak cu páhtal u yaʼalic, mixmaʼc cu páhtal u dzíbtiʼc, mix u pucsiʼkal maʼc únchac u tuclic le nucuch baʼaloʼob yétel hach hadzuts baʼaloʼob heʼebix le dzoʼoc c ilic yétel c uʼuyic u yaʼalic Jesusoʼ; mixmaʼc c páhtal u naʼatiʼc le quiʼmaʼc ólal h chuʼ up c pixan le ca t uʼuyah u kátiʼc t oʼolal tiʼ le Tataoʼ.

18 Le tún cah dzoʼoc u kát Jesus tiʼ le Tataoʼ cah líkiʼ; baʼaleʼ tiʼ hach nohochil u quiʼmaʼc ólal le yaʼabach maʼcoʼoboʼ cah chuʼupoʼob yétel quiʼ ólal.

19 Ca tún h tʼaʼanoʼob tumen Jesuseʼ cah aʼalaʼab tiʼoʼob ca líkiʼcoʼob.

20 Cah líkoʼob teʼ luʼumoʼ ca tu yaʼalah tiʼoʼob; bendecirtaaneʼex tu yoʼolal a feeʼex. Heʼel túnaʼ behlaʼeʼ chucaʼan in quiʼmaʼc ólal.

21 Cu dzoʼocol u yaʼalic le tʼanoʼobaʼ cah okolnahiʼ, le yaʼabach maʼcoʼoboʼ tu yaʼalahoʼobeʼ tu hahil tu yilahoʼob; tu chʼaʼah cada huhuntúlil le u meheʼn palaloʼoboʼ ca tu bendecirtahoʼob, yétel tu kátah tiʼ le Tataoʼ tu yoʼolaloʼob.

22 Cu dzoʼocol u betiʼc lelaʼ cah okolnah tu caʼatén.

23 Ca tu tʼanah le yaʼabach maʼcoʼoboʼ ca tu yaʼalah tiʼoʼob: Ilawil a palaleʼex.

24 Heʼel túnaʼ, le ca tu líksah u yicheʼ, tu líksah u pacatoʼob caʼaneʼ ca tu yilahoʼobeʼ tán u heʼekabpahal le caʼanoʼ yétel tán u yémel angeloʼobeʼ, bey ich kákeʼ, cu yémeloʼobeʼ ca tu nadzubaoʼob yicnal le meheʼn palaloʼoboʼ cah pʼaʼatoʼob baʼpachtaanoʼob yétel le kákoʼ; le tún le angeloʼob ca tu meyahtah le meheʼn palaloʼoboʼ.

25 Le yaʼabach maʼcoʼoboʼ, tu yilahoʼob, tu yuʼubahoʼobeʼ ca tu yaʼalahoʼob decosque hah; yétel u yoheʼloʼobeʼ, u tʼaniloʼobeʼhah, tumen cada huntúl ichiloʼobeʼ tu hach ilah yétel tu hach uʼubah tu xiquiʼnil, cada huntúl utiaʼal letiʼ; anchah bey dos mil quiʼnientos tiʼ le maʼcoʼoboʼ yan ichiloʼob xíboʼob, coʼoleloʼob yétel meheʼn palal.