1 Ca tún anchah u yúchuleʼ le cah dzoʼoc u yaʼalaʼal le baʼaloʼob tumen Jesusaʼ ca tu tsolah tulácal le baʼaloʼobaʼ, le nuctacoʼ bey heʼebix xan le meheʼntacoʼ.

2 Ca tu yaʼalah: Le sagrado dzíboʼob maʼ anac tiʼ teʼex caʼachoʼ letiʼ le Tata tu yaʼalah ten ca in dza teʼexoʼ; tumen tiʼ u naʼatiʼl, tu yaʼalah ca eʼesaʼac tiʼ maʼcoʼob bín síhicoʼoboʼ.

3 Ca tu tsolah tulácal baʼaloʼob, desde cáhiʼ tac tu kinil cu tal letiʼ tu gloriaileʼ; tu hahil, tulácal le baʼaloʼob yan u yúchul yokolcabeʼ, tac le quen yíbic le luʼum tumen hach chocow, cu betuba luʼum bey toʼbil huʼuneʼ, yétel cu saʼatal le caʼan yétel le luʼumoʼ.

4 Tac tiʼ le nohoch dzoʼoc kinoʼ yan u yantal tu tán Hahal Dios tulácal cahoʼob, familiaoʼob, nacionoʼob yétel tʼanoʼob utiaʼal ca juzgartaacoʼob heʼebix u mentmaʼhoʼobeʼ, wá utstac, wá kastac;

5 Wáʼ maʼalobtaqueʼ, utiaʼal le caʼa cuxtal tiʼ le cuxtal minaʼan u xuloʼ; wá kastac utiaʼal le caʼa cuxtal tiʼ le cuxtal minaʼan u xuloʼ; wá kastac utiaʼal le caʼa cuxtal tiʼ le condenacionoʼ yétel cu tsélcubaoʼob lahquetoʼob, dzeʼedzequeʼ huntsél yaniʼloʼob le ulʼakoʼoboʼ tulak tsél, heʼebix u chʼaʼic ótsilil, u justiʼciail, yétel u yutsil Cristo, maʼx anchah antes cáhac le yokolcabaʼ.

6 Yételeʼ tán u páhtal u dzíbtaal tiʼ le libroaʼ chén humpʼít tiʼ le sénquech yaʼabil baʼaloʼob tu caʼansah tu hahil Jesus tiʼ le cahaʼ.

7 Baʼaleʼ heʼel túnaʼ tyaʼan tu planchaʼoʼob Nefi u maʼs yaʼabil tiʼ le baʼaxoʼob tut caʼansah le cahoʼ.

8 Yételeʼ dzoʼoc in dzíbtiʼc le baʼaloʼobaʼ, letiʼ u maʼs chichan xétʼ le baʼaloʼob tu sén caʼansah tiʼ le cahoʼ, yétel dzoʼoc in dzíbtiʼc tu yoʼolal u tasaʼal tu caʼatén tiʼ le cahaʼ, tu yoʼolal le maʼ tu nahil Israel u taloʼoboʼ; heʼebix u yaʼalmaʼhil u tʼan Jesuseʼ.

9 Le tán quen u kamoʼob le baʼaloʼobaʼ, tumen hach kabét ca u kahóltoʼob tánil tu yoʼolal u probartaal u feoʼob, wá ca u creertoʼobeʼ, cu yeʼesaʼal tún tiʼoʼob le baʼaloʼob maʼs nuctacoʼoboʼ.

10 Baʼaleʼ wá maʼ tu creertiʼcoʼob le baʼaloʼobaʼ, cu taacaʼal tiʼoʼoboʼ le baʼaloʼob maʼs nuctacoʼoboʼ utiaʼal u condenacionil.

11 Heʼel túnaʼ teneʼ taitac caʼach in dzíbtiʼc tulácal le baʼaxoʼob dzíbtaan yókol u laminaoʼobil Nefioʼ, baʼaleʼ Yumtsileʼ tu yaʼalah ten maʼ, tu yaʼalaheʼ: Bin in caʼah in probart u fe in cahal.

12 Le betiʼc túneʼ, ten Mormoneneʼ, quiʼn dzíbtiʼc le baʼaxoʼob u yaʼalmaʼh ten Yumtsiloʼ. Behlaʼ túneʼ quiʼn dzoʼoquiʼc in tʼan, tu yoʼolal in dzíbtiʼc le baʼax aʼalaʼan tenoʼ.

13 Le betiʼqueʼ in kát ca a wohélteʼexeʼ Yumtsileʼ tu caʼansah le cahaʼ tiʼ óxpʼél kin; cu dzoʼocol lelaʼ, tu yeʼesuba tiʼoʼob cada humpʼít kin caʼachiʼ, yételeʼ cu xétʼic wáh yaʼab u ténel cu bendecirtiʼqueʼ cu dzaic tiʼoʼob caʼachiʼ.

14 Ca tún úcheʼ tu caʼansah yétel tu meyahtah u palal le yaʼabach maʼcoʼob dzoʼoc c aʼaliqueʼ, ca xan tu wáchʼah u yakoʼobeʼ ca tu yaʼalahoʼob tʼanoʼob nuctac yétel tu haʼaksah u yóloʼob u tataoʼob, baʼaloʼob maʼs sén nuctac que le u yeʼesmaʼh tiʼ le cahoʼ; ca tu wáchʼah u yakoʼobeʼ tu yoʼolal u páhtal u tʼanoʼob.

15 Ca tún anchah u yúchuleʼ cu dzoʼocol u naʼacal teʼ caʼanoʼ, le ca tu yeʼesuba tiʼoʼob tu caʼaténeʼ, cu dzoʼocol u sut yicnal le Tataoʼ, le cah dzoʼoc u dzaquiʼc tulácal le kohaʼanoʼob yétel le maʼ toh u xímbaloʼoboʼ, le cah dzoʼoc u dzaic u sásil le chʼopoʼoboʼ, dzoʼoc u heʼic u xiquiʼn le cócoʼoboʼ yétel dzoʼoc u betiʼc tulácal u heʼheʼlásil dzacoʼob ichiloʼobeʼ yétel u líksic huntúl maʼc ichil le quiʼmenoʼoboʼ, xan le cah dzoʼoc u yeʼesic u páhtalileʼ yétel naʼaquiʼc le Tataoʼ;

16 Heʼel túnaʼ, anchah u yúchuleʼ, cu sástal tulak kineʼ cah múchʼlah le yaʼabach maʼcoʼoboʼ, ca tu yuʼubah yétel tu yilah le meheʼn palaloʼoboʼ; tac le hach chichanoʼoboʼ tu haʼah u chiʼoʼobeʼ ca tu yaʼalahoʼob nucuch baʼaloʼob; le baʼax tu yaʼalahoʼoboʼ mixmaʼc cu chaʼabal u dzíbtiʼcoʼ.

17 Ca tún le maʼcoʼob yéyaʼan tumen Jesus caʼacheʼ, ca tún h nadzicubaoʼob yicnaloʼobeʼ; heʼel bucaʼah xan oc haʼnahoʼobeʼ h chuʼupoʼob yétel le Pixan cu túxtiʼc Diosoʼ.

18 Yaʼab xan ichiloʼobeʼ tu yuʼubahoʼob tʼanoʼob maʼ tu páhtal u caʼa aʼaloʼob mix u dzíbtaal.

19 Tán u caʼansicoʼob caʼach yétel meyahnah huntúl utiaʼal ulak, bey úch ichil u batsiloʼob, yétel tulácal baʼaleʼ cu tʼoʼoxol ichil tulácal maʼcoʼoboʼ cu meyahoʼob xan tu tohil beh tu batsiloʼob.

20 Ca tún tu mentahoʼob tulácal baʼaloʼobeʼ heʼebix u yaʼalmaʼhil Jesuseʼ.

21 Le maʼxoʼob tún h dzaʼab u yoc haʼoʼob tu kabaʼ Jesusoʼ tu kabaʼintoʼob u Iglesia Cristo.