1 Tu hahil quiʼn wáʼalic teʼexeʼ bín in dza teʼex humpʼél baʼax utiaʼal ilbil tu yoʼolal a hach wohéltiʼqueʼex baʼax kin quen úchuc le baʼaloʼobaʼ, le quen in mol in cahal, kiʼitpahaʼanoʼob yaʼab kin, u nahil Israel, yétel bín in dza ichiloʼob tu caʼatén tiʼn Sion.

2 Heʼel túnaʼ lelaʼ letiʼ le bín in dza teʼex utiaʼal a wiliqueʼexaʼ tumen tu hahil quiʼn wáʼalic teʼexeʼ le quen dzaʼabac u yoheltoʼob le maʼxoʼob maʼ tu nahil Israel u taloʼoboʼ le baʼaxoʼob quiʼn wáʼalic teʼex yétel ichil humpʼít kin maʼseʼ bín in wáʼal teʼex tiʼn woʼolal ten yétel tu yoʼolal u páhtal le Hahil Pixan cun dzabil teʼex tumen le Tataoʼ tu yoʼolal beyoʼ le maʼ tiʼ u nahil Israel u taloʼoboʼ, ca anac u yoheltiʼcoʼob tu yoʼolal le cahaʼ maʼxoʼob u yalab u maʼquiʼloʼob tu nahil Jacob, yételeʼ le in cahalaʼ bín kiʼkiʼtaacoʼob tumen letiʼoʼob.

3 Tu hahil, tu hahil quiʼn wáʼalic teʼexeʼ le quen eʼesaʼac u kahóltiʼqueʼex le baʼaloʼobaʼ tumen le Tata yétel tiʼ le Tata cun talac, cu taloʼob tiʼ letiʼoʼob atiaʼal teʼex;

4 Tumen tiʼ u naʼatiʼl le Tataoʼ yan u dzaʼabaloʼob wáy luʼumaʼ yétel ca dzaʼabac heʼebix humpʼél cah hálkabil u cuxtaloʼob tumen u páhtalil le Tataoʼ, tu yoʼolal u tal le baʼaloʼob tiʼ letiʼoʼobaʼ u yalab u palal a palaleʼexoʼ tu yoʼolal u láh betaal le baʼax u prometertmaʼh le Tata yétel u nahiloʼ u cahal Israel.

5 Bey túnoʼ, le meyhiloʼobaʼ yétel le cun betbiloʼob ichileʼex desde behlaʼ bín lukuc ichil le maʼxoʼob maʼ tiʼ u nahil Israel u taloʼoboʼ ca xiʼic ichil u palal a palaleʼexoʼ le maʼxoʼob bín pʼátac le baʼax tohoʼ bey maʼ tu creertiʼcoʼoboʼ yoʼolal u kasaʼaniloʼ;

6 Tumen bey cu kátiʼc le Tata ca lukuc ichil le maʼxoʼob maʼ tiʼ u nahil Israel u taloʼoboʼ tu yoʼolal u yeʼesic u páhtalil tiʼ le maʼxoʼob maʼ tiʼ u nahil Israeloʼ maʼ hach chich u pucsiʼkaloʼobeʼ ca u kex u yóloʼob yétel le baʼax kas cu betiʼcoʼobeʼ ca tacoʼob tiʼn wicnal yétel ca u kamoʼob oc haʼ tiʼn kabaʼ, yétel ca u kahóltoʼob u hahil in caʼansahil, tu yoʼolal u páhtal u xoʼocoloʼob ichil in cahal, u nahil Israel;

7 Le quen úchuc le baʼaloʼobaʼ, tu yoʼolal u cáhal u kahóltaal tumen u palal a palaleʼexeʼletiʼ tún bey humpʼél baʼal utiaʼal yiloʼob, tu yoʼolal u yoheltiʼcoʼobeʼ u meyah le Tataoʼ dzoʼoc u cáhal u láh betaal tu yoʼolal le promesa u betmaʼh yétel le cahal maʼx tu nahil Israeliʼ.

8 Le quen kuchuc le kinaʼ, yan u yúchuleʼ, le reyoʼoboʼ bín u maʼc u chiʼoʼob; tumen cun u yiloʼob le baʼax maʼ tsicbataan tiʼoʼoboʼ yétel yan u tuculoʼob yoʼolal le baʼaxoʼob maʼ u yuʼubmaʼhoʼoboʼ.

9 Tumen tiʼ le kinoʼ, le Tataoʼ yan u betiʼc tiʼn woʼolaleʼ, humpʼél meyah hach nohoch yétel cu haʼaksic u yóloʼob ichiloʼob, yétel yan u yantal maʼx maʼ tán u creertiʼc ichiloʼob quex ca aʼalaʼac tiʼ tumen huntúl maʼc.

10 Baʼaleʼ heʼel tunaʼ, u cuxtal le maʼx cu meyahtiʼqueneʼ tyaʼan tiʼn kab; le betiʼqueʼ maʼbín betaac lob tiʼiʼ tumen quex beyoʼ cu keʼexel u yich tu yoʼolaloʼobeʼ ten bín in dzaque, tumen bín in weʼes tiʼoʼobeʼ in naʼatiʼl, maʼs nohoch tiʼ u kakas naʼatiʼl quiʼsin.

11 Bey tún u yúchuleʼ le maʼx maʼ tán u creertiʼcoʼob in tʼanoʼob, ten Jesucristoeneʼ, le tʼanoʼob le Tata bín u túxt letiʼ ca u bis tiʼ le maʼxoʼob maʼ tiʼ u nahil Israel u taloʼoboʼ (yan u betaal heʼebix tu yaʼalahil Moiseseʼ) yan u lúksaʼaloʼob ichil in cahal letiʼoʼobeʼ le maʼx dzoʼoc u mentiʼcoʼob le promesaoʼ.

12 In cahaloʼ u yalab u nahil Jacobeʼ yan u yantal chúmuc tiʼ le maʼ tiʼ u nahil Israel u taloʼoboʼ, heʼex, chúmuc tiʼ letiʼoʼob bey leon ichil u káxil baʼalcheʼoʼobeʼ, bey u meheʼn leon ichil h tamaʼnoʼobeʼ cu peʼchaktiʼc yétel cu xeʼxeʼetʼic, cu dzoʼocoleʼ, mix maʼc cu páhtal u toquiʼcoʼob.

13 Bín líkiʼc u kab yókol u enemigoʼob, tulácal tún u enemigoʼobeʼ bín xuʼulsaʼacoʼob.

14 Heʼeleʼ kas yan tiʼ le maʼxoʼob maʼ tu yorail Israel u taloʼob wá maʼ tán u kexic u yól! Tumen tiʼ le kinoʼ, cu yaʼalic le Tataoʼ yan in lúksic a tsíminoʼob chúmuc tiʼ tech yétel bín in xuʼuls a carroʼobeʼex;

15 Yétel bín in pʼat tu hun u cahiloʼob a luʼumil, yan in xuʼulsic tulácal a kíwicoʼob yan u mukoʼoboʼ;

16 Yétel yan in xuʼulsic le meyhul h mén ta luʼumoʼ, mix huntúl boʼobat bín anac tech tu caʼatén.

17 Yan xan in xuʼulsic le baʼaxoʼob a mentmaʼhoʼob ca adorartiʼqueʼexoʼ, yétel le a betmeʼex wáʼalacbaloʼob ca adorartiʼqueʼex yétel mix bikin bín a caʼa ádorart baʼaxoʼob mentaan yétel a kab;

18 Bín in chʼa u cheʼil a kaxiloʼob ta tán; yétel bín in xuʼuls a nucuch cahaloʼob.

19 Cu yúchul túneʼ, cu xuʼulul tulácal tus, kas dzíbolal, cu baʼatel maʼc, u meyahoʼob h mén yétel u chital maʼc yétel yaʼabach coʼoleloʼob.

20 Tumen yan u yúchuleʼ, cu yaʼalic le Tataoʼ, tiʼ le kinoʼ yan in lúksic ichil in cahal tulácal le maʼxoʼob maʼ tán u kexic u yóloʼob yétel le baʼax cu betiʼc ca talacoʼob tiʼcnal ten in yabilah Paloʼ, u nahil Israel.

21 Xan yan in boʼotiʼcoʼob yétel kas tiʼn kuxil, heʼebix ichil le maʼxoʼob maʼ tán u creertiʼcoʼob tiʼ Diosoʼ, leloʼ maʼ úch u yuʼubic mixbaʼal chicaʼan tiʼ.

22 Baʼaleʼ wá cu kexic u yóloʼob yétel le baʼax u betiʼcoʼobeʼ u yuʼuboʼob in tʼan, maʼ tu chichcunsoʼob u pucsiʼkaloʼobeʼ bín in wédzcunt in Iglesia ichiloʼob; ca anacoʼob xan tiʼ le promesa yétel heʼel u xoʼocoloʼob ichil u yalab u nahil Jacobaʼ, tiʼ maʼx in dzamaʼh le nácionaʼ utiaʼal u baʼalubaintoʼob.

23 Yétel bín tún u yántoʼob in cahal, le u yalab u nahil Jacoboʼ, heʼebix heʼel bucaʼah ca tacoʼob tiʼ u nahil Israeleʼ, ca u betoʼob humpʼél nohoch cahil, quen u kabaʼinte le Túmben Jerusalenoʼ.

24 Bey túnoʼbín u yantoʼob le in cahal kiʼitpahaʼan yókol tulácal le yokolcabaʼ, ca múchʼlacoʼob tiʼ le Túmben Jerusalenoʼ.

25 Bey túnoʼ u páhtal caʼaneʼ yan u yémel ichiloʼob bey xan ten bín anaquen chúmuc tu yicnaloʼob.

26 Tiʼ le kinoʼ yan u cáhal u meyah le Tataoʼ, beyoʼ, le quen dzoʼococ u yaʼalaʼal le caʼansahil tiʼu yalab le cahaʼ. Tu hahil quiʼn wáʼalic teʼexeʼ, tiʼ le kinoʼ cu cáhal u meyah le Tata ichil tulácal le u kiʼitpahaʼaniloʼob in cahaloʼ, bey ichil le tribuoʼob saʼataloʼob u hoksmaʼh Jerusalen le Tataoʼ.

27 Heʼel le meyahoʼ bín cáhac ichil le u kiʼitpahaʼaniloʼob in cahal yétel le Tataoʼ, tu yoʼolal u mentaal listo le beh tuʼux ca pátchahac u taloʼob tiʼn wicnaloʼ, tu yoʼolal u oraroʼob tiʼ le Tata tiʼn kabaʼ.

28 Bey heʼ u cáhal le meyahoʼ yétel le Tata, u meyhil u mentaal listo le behoʼ, ichil tulácal le nacionoʼoboʼ, tu yoʼolal leloʼ bín pátchahac u sut u cahal tu luʼumil utiaʼalintoʼob.

29 Cu hókoloʼob tiʼ tulácal nacionoʼob; yétel maʼ bín hókocoʼob sébaʼaniʼ mix bín púdzucoʼobiʼ, tumen teneʼ áctanil tiʼ letiʼoʼob quiʼn bin, cu yaʼalic le Tataoʼ, yételeʼ, tu pachoʼob quiʼn bin xan.