1 Ca tún tu yaʼalah Jesus tiʼ le maʼxoʼob cu binoʼob tu pachoʼ ca u tasoʼob wáh yétel u haʼil uva tiʼ.

2 Caʼaliquiʼl bihaʼanoʼob u chʼaʼoʼobeʼ ca tu yaʼalah tiʼ le yaʼabach maʼcoʼob ca culacoʼob luʼumoʼ.

3 Le cah tal le maʼxoʼob cu binoʼob tu pachoʼ, tán u tasicoʼob le wáh yétel le u haʼil uva, ca tu maʼchah le wáhoʼ ca tu xetʼaheʼ ca tu bendecirtah; cu dzoʼocoleʼ ca tu dzah tiʼ le maʼxoʼob cu binoʼob tu pachoʼ ca tu yaʼalah tiʼoʼob ca u hantoʼob.

4 Cu dzoʼocol u hanaloʼobeʼ cah chuʼupoʼobeʼ, ca tún tu túxtah ca dzaʼabac xan tiʼ le yaʼabach maʼcoʼoboʼ.

5 Cu dzoʼocol u hanal le yaʼab maʼcoʼob yétel hasta naʼahoʼobeʼ ca tu yaʼalah tiʼ le maʼxoʼob binoʼob tu pachoʼ: Heʼel túnaʼ huntúl tiʼ teʼexeʼ bín ordenartaac yétel bín in dza páhtalil tiʼ utiaʼal u xetʼic wáh, u bendecirtiʼc yétel u dzaic tiʼ le maʼxoʼob yanoʼob tiʼn iglesiaoʼ, tiʼ tulácal le cu creertiʼcoʼoboʼ yétel le cu kamic yoc haʼoʼoboʼ tiʼn kabaʼ.

6 Mantadz yan a wiliqueʼex a betiʼqueʼex lelaʼ, heʼebix dzoʼoc in betiʼqueʼ, heʼebix dzoʼoc in xetʼic le wáhaʼ, dzoʼoc in bendecirtiʼc yétel dzoʼoc in dzaic teʼex.

7 Bín a beteʼex lelaʼ utiaʼal a kaʼahsiqueʼex in wínclil dzoʼoc in weʼesic teʼexoʼ. Leloʼ bín u betuba humpʼél hahil tʼan tiʼ le Tataoʼ cu yeʼesic tán a kaʼahsiqueneʼex huntiʼch. Wá xan ca kaʼahsiqueneʼex untiʼcheʼ, yan u yantal in pixan ta wételeʼex.

8 Le tún cah dzoʼoc u yaʼalic le baʼaloʼobaʼ, ca tu yaʼalah tiʼ le maʼxoʼob binoʼob tu pachoʼ ca u chʼaʼoʼob le u haʼil uva tu copail ca u yukoʼobeʼ ca u dzaoʼob xan tiʼ le u maʼsil maʼcoʼoboʼ ca u yukoʼob.

9 Ca tún yanchah u betiʼcoʼob beyoʼ ca tu yukoʼobeʼ cah chuʼupoʼob; ca tu dzahoʼob xan tiʼ le yaʼab maʼcoʼoboʼ ca tu yukoʼobeʼ cah chuʼupoʼob.

10 Le cah dzoʼoc u betiʼc le baʼaloʼobaʼ le maʼxoʼob binoʼob tu pachoʼ, cah aʼalaʼab tiʼoʼob tumen Jesus: Bendecirtaaneʼex yoʼolal le baʼaxoʼob dzoʼoc a betiʼqueʼexaʼ; tumen lelaʼ cu dzoʼocsic in maʼndamientoʼob yétel cu yeʼesic u hahil tiʼ le Tataoʼ chucaʼan a wóleʼex a beteʼex le baʼax dzoʼoc in wáʼalic teʼexoʼ.

11 Mantadz bín a beteʼex le baʼaloʼobaʼ tu yoʼolal le maʼxoʼob cun u pʼatoʼob u kebanoʼoboʼ yétel le cu yoc haʼoʼob tiʼn kabaʼoʼ; yételeʼ yan a betiʼqueʼex utiaʼal a kaʼahsiqueʼex in kiʼikel tiʼn wecah ta woʼolaleʼex tu yoʼolal u páhtal a wáʼaliqueʼex tu hahil tiʼ le Tataoʼ maʼntadz quen a kaʼahseʼneʼex. Yétel wá maʼntadz ca kaʼahsiqueneʼexeʼ bín u lakinteʼex in pixan.

12 Quin dzaic teʼex maʼndamiento ca a beteʼex le baʼaloʼobaʼ. Yétel wá maʼntadz ca a beteʼex le baʼaloʼobaʼ ca bendecirtaaleʼex tumen dzaʼaneʼex yókol in nohoch tunich.

13 Baʼaleʼ heʼemaʼxac ichileʼex wá cu betiʼc maʼs wá maʼ tulácal heʼebix le heʼelaʼ, maʼ mentaanoʼob yókol in tunichiliʼ, baʼaleʼ dzaʼan yókol árena; le quen talac le chácoʼ, le quen talac le ikoʼ, le quen u hadzubaoʼob yókoloʼobeʼ bín lúbucoʼob, le tún u honahil u tuʼuxil quiʼsin dzoʼoc u heʼepahal utiaʼal u kamicoʼob.

14 Le betiʼqueʼ ca bendecirtaaleʼex teʼex wá ca betiʼqueʼex in maʼndamientoʼob dzaʼan ten tumen le Tata ca in dza teʼexoʼ.

15 Tu hahil, tu hahil quiʼn wáʼalic teʼexeʼ yan a dzicabaeʼex a wohélteʼex baʼax cu yúchul yétel a orareʼex, tumen maʼ xan ca chʼaʼabac a wóleʼex tumen le quiʼsinoʼ yétel maʼ xan ca u biseʼex u meyhuleʼexiʼ.

16 Heʼebix tún úchic in orar ichileʼexoʼ, bey u deber ca orarnaqueʼex tiʼn iglesia ichil le maʼxoʼob tiʼn cahal yanoʼoboʼ, u pʼatiʼcoʼob u kebanoʼob yétel cu kamicoʼob yoc haʼ tiʼn kabaʼ. Heʼeleʼ, ten le sásiloʼ, ten dzamaʼhil ejemplo.

17 Ca tún anchah u yúchuleʼ cu dzoʼocol u yaʼalic le tʼanoʼob tiʼ le maʼxoʼob binoʼob tu pachoʼ, Jesuseʼ tu sutuba actán tiʼ le yaʼabach maʼcoʼoboʼ ca tu yaʼalah:

18 Tu hahil, tu hahil quiʼn wáʼalic teʼexeʼ kabét a pʼil a wicheex yétel a orareʼex maʼntadz, maʼ xan ca dzaʼabac teʼex kakas tuculiʼ; tumen Sátanaseʼ u kát utiaʼalinteʼex ca u maʼyteʼex bey trigoeʼ.

19 Le betiʼqueʼ maʼntadz yan a orareʼex tiʼ le Tata tiʼn kabaʼ.

20 Heʼebaʼax ca a káteʼex tiʼn kabaʼ tiʼ le Tataoʼ, wá ca creertiʼqueʼex yan a kamiqueʼexeʼ, wá tu beleʼ heʼel túnaʼ yan u dzaʼabal teʼex.

21 Orarneneʼex tiʼ le Tata yétel familiaeʼex, maʼntadz tiʼn kabaʼ, tu yoʼolal u bendicirtaal a wátaneʼex yétel a palaleʼex.

22 Heʼel túnaʼ, maʼntadz ca a múchʼquiʼntabaeʼex; yétel tiʼ mixmaʼc bín a wáʼal maʼ tu páhtal u múchʼtal ta wételeʼex, tánileʼ yan a chaʼiqueʼex tiʼoʼob u múchʼtaloʼob ta wicnaleʼex, maʼ bín a wáʼaleʼex maʼ tiʼoʼobiʼ.

23 Baʼaleʼ orarneneʼex tu yoʼolaloʼob, maʼ bín a puleʼexoʼobiʼ; wá anac u taloʼob ta wicnaleʼex yaʼabeʼ, káteʼex tiʼn kabaʼ tiʼ le Tata tu yoʼolaloʼoboʼ.

24 Bey túnoʼ líks a sásileʼex tu yoʼolal u sásilcuntiʼc yókolcab. Heʼel túnaʼ ten le sásil tán a líksiqueʼexoʼ; letiʼ le baʼax a wilmaʼheʼex in betiʼcoʼ. Heʼel túnaʼ a wilmaʼheʼex in orar tiʼ le Tataoʼ, tulácaleʼex teʼexeʼ ta wilaheʼex.

25 Ta wuʼuyaheʼex xaneʼ tiʼn wáʼalah mix huntúl tiʼ teʼex ca náchchahaquiʼ, baʼaleʼ ca a nadzquiʼntabaeʼex tiʼn wicnal, tu yoʼolal u páhtal a maʼchiqueʼex yétel a wiliqueʼex; beyxannoʼ yan a betiʼqueʼex tánil yokolcab heʼmaʼxac cu bin tu contra le maʼndamientoaʼ, tán u chaʼic u bisaʼal tiʼ kakas tucul.

26 Ca tún h úcheʼ, le cah dzoʼoc u yaʼalic Jesus le tʼanoʼobaʼ, ca tu sut u pacat teʼ tuʼux yan le maʼxoʼob binoʼob tu pach u yéymaʼheʼ, ca tu yaʼalah tiʼoʼob:

27 Heʼel túnaʼ, tu hahil, tu hahil quiʼn wáʼalic teʼexeʼ bín in dza teʼex ulak humpʼél maʼndamiento, le quen dzoʼoc leloʼ teneʼ kabét ca xiʼiquen tiʼcnal in Tata tu yoʼolal in dzoʼocsic ulak maʼndamientoʼob u dzamaʼh ten.

28 Heʼel túnaʼ, lelaʼ letiʼ le maʼndamiento quiʼn dzaic teʼexaʼ; maʼ bín a chaʼeʼex u hantiʼc huntúl maʼc in bakel yétel in kiʼikel wá a woheʼleʼexeʼ maʼ toh u cuxtal le quen a tʼoxeʼexeʼ;

29 Tumen le maʼx cu hantiʼc in bakel yétel cu yukic in kiʼikel wá maʼ maʼalob yétel toh u cuxtaloʼ cu hantiʼc yétel cu yukic kas tu yól; le betiʼqueʼ wáʼ a woheʼleʼex huntúl maʼc maʼ toh u cuxtal utiaʼal u hant in bakel yétel u yuk in kiʼikeleʼ, maʼ a chaʼ tech u betiʼcoʼ.

30 Baʼaleʼ maʼ a hóksic ichileʼex, ánteʼex tiʼ yétel orarneneʼex tiʼ le Tata tiʼn kabaʼ tu yoʼolaloʼ; wá cu pʼatiʼc u kebanoʼob cu yoc haʼeʼ ca kamiqueʼex tún, ca dzaiqueʼex in bakel yétel in kiʼikil tiʼ.

31 Baʼaleʼ wá maʼ tán u pʼatiʼc u kebanoʼobeʼ, maʼ bín xoʼococ ichil in cahiliʼ tu yoʼolal maʼ u kascuntiʼc in cahal, tumen heʼel túnaʼ in kahól in h tamaʼnoʼob yétel xocaʼanoʼob.

32 Baʼaleʼ maʼ bín a hókseʼex ta sinagogaeʼexiʼ mix tiʼ le cúchi tuʼux ca múchʼtaleʼex utiaʼal a meyahtiʼc Hahal Dios, tumen yan u bin a wántiʼqueʼexoʼob; yételeʼ maʼ a woheʼleʼex wá bín sunacoʼobiʼ yétel wá bín u pʼatoʼob u kebanoʼob ca talacoʼob tiʼn wicnal yétel tulácal yól u pucsiʼkaloʼob, ten túneʼ bín in dzacoʼob yételeʼ, ta woʼolaleʼexeʼ bín anac tiʼoʼob salvacion.

33 Le betiʼqueʼ beteʼex le tʼanoʼob dzoʼoc in wáʼalic teʼexaʼ, tu yoʼolal maʼ u tal condenacion ta wókoleʼex; tumen hach ótsil maʼx cu condenartaal tumen le Tataoʼ.

34 Yételeʼ tán in dzaic teʼex le maʼndamientoʼobaʼ tu yoʼolal maʼ humpʼéliliʼ a tuculeʼex caʼachoʼ. Ca bendecirtiʼqaʼaleʼex wá maʼ u yantal baʼatel tán ichileʼex.

35 Behlaʼ túneʼ teneʼ tán bin yicnal le Tataoʼ tumen kabét ca xiʼiquen tu yicnal ta woʼolaleʼex.

36 Le tún cah dzoʼoc u tʼan Jesuseʼ, ca tu maʼchah le maʼxoʼob h binoʼob tu pach u yéymaʼhoʼ, huhuntúlil tac cah dzoʼoc u maʼchic tulácaloʼob, tán u tʼan tiʼoʼob heʼebix u bin maʼchiqueʼ.

37 Le tún le yaʼabach maʼcoʼoboʼ maʼ tu yuʼubahoʼob le baʼax tu yaʼalah tiʼoʼoboʼ, le betiʼqueʼ, maʼ tu yaʼalahoʼob tu yoʼolaliʼ; baʼaleʼ le maʼxoʼob h binoʼob tu pachoʼ cu dzaic u tʼanoʼob tuʼux cu yaʼalicoʼob h dzaʼab páhtalil tiʼoʼob utiaʼal u dzaicoʼob le Pixan cu túxtiʼc Diosoʼ. Ichil ulak humpʼít maʼseʼ bín in weʼes teʼexeʼ le tʼanoʼobaʼ hach hah.

38 Le tún cah dzoʼoc u láh maʼchicoʼob Jesuseʼ, cah tal humpʼél múyaleʼ ca tu pixah le yaʼabach maʼcoʼoboʼ, le oʼolaleʼ maʼ h pátchah u yilaʼal Jesusiʼ.

39 Caʼaliquiʼl pixaʼanoʼob tumen le múyaloʼ, letiʼeʼ cah luk ichiloʼobeʼ cah naʼac teʼ caʼanoʼ. Le tún le maʼxoʼob h binoʼob tu pachoʼ tu yilahoʼob yétel tu dzahoʼob u tʼanoʼob tuʼux cu yaʼalicoʼobeʼ, h naʼac tu caʼatén teʼ caʼaniloʼ.