1 Le tún cah dzoʼoc u tʼan Jesuseʼ cah pacatnah le yaʼabach maʼcoʼoboʼ ca tu yaʼalah tiʼoʼob: heʼel túnaʼ dzoʼoc a wuʼuyiqueʼex le baʼaxoʼob tiʼn caʼansah antes in naʼacal teʼ tuʼux yan in Tataoʼ; le betiʼqueʼ, le maʼx bín kaʼahac le in tʼanoʼob yétel ca u betoʼobaʼ, bín in líks tu dzoʼoc kin.

2 Le tún cah dzoʼoc u yaʼalic Jesus le tʼanoʼobaʼ, ca tu yilaheʼ yan dzeʼedzec ichil le maʼcoʼoboʼ haʼak yóloʼob, tán u tsicbaloʼob, ichiloʼobeʼ baʼax quen u bet yétel u ley Moises; tumen maʼ tán caʼach u naʼatiʼcoʼob le tʼan cu yaʼalic le úchben baʼaloʼoboʼ dzoʼoc u maʼn yétel tulácal le baʼaloʼoboʼ dzoʼoc u túmbenchahaloʼob.

3 Ca tún tu yaʼalah tiʼoʼob: Maʼ u haʼakal a wóleʼex tu yoʼolal in wáʼalic teʼex le úchben baʼaloʼoboʼ dzoʼoc u maʼnoʼob yétel tulácal baʼaloʼobeʼ dzoʼoc u túmbenchahaloʼob.

4 Heʼel túnaʼ, quiʼn wáʼalic teʼexeʼ dzoʼoc u betaal le ley h dzaʼab tiʼ Moisesoʼ.

5 Heʼel túnaʼ, ten le maʼx dzah le leyoʼ, ten xan le maʼx bet promesa yétel in cahal Israeloʼ le betiʼqueʼ, le leyoʼ dzocaʼan u betaal tiʼ ten, tumen h talen in dzoʼocs le leyoʼ; le betiʼqueʼ, dzoʼoc u xuʼulul.

6 Heʼel túnaʼ, maʼ tán in tal in wáʼal decosque maʼ hah baʼax tu yaʼalah le profetaoʼoboʼ tumen le maʼ h dzoʼocsaʼab tiʼ teneʼ, tu hahil quiʼn wáʼalic teʼexeʼ tulácal bín dzoʼocsaʼac.

7 Tumen quiʼn wáʼalic teʼexeʼ le baʼal úchbenoʼ dzoʼoc u maʼn, maʼ tán in wáʼalic decosque maʼ hah le baʼaxoʼob aʼalaʼan tu yoʼolal le baʼaxoʼob bín talacoʼ.

8 Heʼel túnaʼ maʼ dzoʼoc u kuchul tulácal le promesa tiʼn betah yétel in cahaloʼ; baʼaleʼ le ley h dzaʼab tiʼ Moisesoʼ cu xuʼulul tiʼ ten.

9 Heʼel túnaʼ ten le ley yétel le sásiloʼ. Pacatneneʼex, dza a wóleʼex hasta tu xul, bin cuxlaqueʼexoʼ; tumen le maʼx cun dza u yól tac tu xuleʼ, bín in dza cuxtal minaʼan u xul tiʼ.

10 Heʼel túnaʼ dzoʼoc in dzaic teʼex le hahil tʼanoʼoboʼ; menteʼex tún in hahil tʼanoʼob. Lelaʼ, letiʼ le leyoʼ yétel le profetaoʼoboʼ, túneʼ letiʼoʼobeʼ tu hahil tu yaʼalahoʼob le baʼaloʼob cun h úchul tiʼn woʼolaloʼ.

11 Le tún cah dzoʼoc u yaʼalic Jesus le tʼanoʼobaʼ, ca tu yaʼalah tiʼ le doce tu yéyaheʼ:

12 Teʼexeʼ tiʼn pach ca bineʼex; yétel huntúleʼex sásil tiʼ le cah, lelaʼ u yalab u palal u nahil Joseʼ.

13 Heʼel túnaʼ, lelaʼ letiʼ le u luʼumil dzaʼan atiaʼalinteʼexoʼ; le Tataoʼ dzoʼoc u dzaic teʼex.

14 Yételeʼ mix huntén aʼalaʼac ten tumen le Tata ca in wáʼal tiʼ a sucuʼuneʼex teʼ Jerusalenoʼ.

15 Mix huntén xan u túxtmaʼh ten le Tata ca in wáʼal tiʼoʼob tu yoʼolal ulak u tribuoʼob u nahil Israel bisaʼan tumen le Tata nách tiʼ le luʼumoʼ.

16 Lelaʼ letiʼ le u yaʼalmaʼh ten le Tata ca in wáʼal tiʼoʼobaʼ:

17 Yan ten ulak h tamaʼnoʼob maʼ h wáyiloʼobeʼ, le heʼeloʼobaʼ yan xan in tasicoʼob ca u yuʼuboʼob in tʼan; beyoʼ cu yantal hun múchʼ tamaʼnoʼob yétel huntúl maʼx cu canántiʼc h tamaʼn.

18 Tu yoʼolal tún u hach chichil u pucsiʼkaloʼob yétel maʼ tu creertoʼobiʼ, maʼ tu naʼatahoʼob in tʼaniʼ; le betiʼqueʼ le Tata tu yaʼalah ten maʼ in wáʼalic mixbaʼal maʼs tiʼoʼob tu yoʼolal lelaʼ.

19 Baʼaleʼ tu hahil quiʼn wáʼalic teʼexeʼ le Tataoʼ dzoʼoc u dzaic ten hahil tʼan, yétel quiʼn wáʼalic teʼexeʼ, lúksaʼabeʼex ichiloʼob yoʼolal u kasaʼaniloʼob; le betiʼqueʼ, yoʼolal u kasaʼaniloʼobeʼ maʼ u yoheʼloʼob mixbaʼal ta woʼolaleʼexiʼ.

20 Tu hahil quiʼn wáʼalic teʼex xaneʼ, le Tataoʼ dzoʼoc u hatsic xan le ulak tribuoʼoboʼ; tu yoʼolal u kasaʼaniloʼoboʼ, letiʼoʼobeʼ maʼ yoheʼloʼob mixbaʼal yoʼolal le heʼeloʼoboʼ.

21 Tu hahil quiʼn wáʼalic teʼexeʼ, teʼex le maʼx oʼolal tiʼn wáʼalah: Yan ulak in h tamaʼnoʼob maʼ h wáyiloʼobeʼ; le heʼeloʼobaʼ yan in tasicoʼob, ca u yuʼuboʼob in tʼan; beyoʼ cu yantal chén hun múchʼ h tamaʼnoʼob yétel huntúl maʼx cu canántiʼc tamaʼn.

22 Baʼaleʼ maʼ tu naʼatahoʼob baʼax tiʼn wáʼalahiʼ, tu tucultahoʼobeʼ tiʼn wáʼalah tu yoʼolal le maʼxoʼob maʼ tiʼ u nahil Israel u taloʼoboʼ; tumen maʼ tu naʼatahoʼobeʼ decosque tu yoʼolal u caʼansicoʼobeʼ, bín creernahac le maʼxoʼob maʼ tiʼ u nahil Israel u taloʼoboʼ.

23 Mix tu naʼatahoʼob baʼax tiʼn wáʼalah le ca tiʼn wáʼalah le ulak h tamaʼnoʼoboʼ bín u yuʼuboʼob in tʼan tiʼn chiʼ; mix tu naʼatahoʼobeʼ le maʼxoʼob maʼ tiʼ u nahil Israel u taloʼoboʼ mix bikin bín u yuʼuboʼob in tʼan tiʼn chiʼ; maʼ bín in weʼesinba tiʼoʼob wá maʼ chén tu yoʼolal le Pixan cu túxtiʼc Diosoʼ.

24 Baʼaleʼ heʼel túnaʼ, teʼexeʼ dzoʼoc a wuʼuyiqueʼex in tʼan tiʼn chiʼ dzoʼoc xan a wiliqueneʼex; teʼexeʼ in h tamaʼneʼex yétel ca xoʼocoleʼex ichil le maʼxoʼob dzaʼan ten tumen le Tataoʼ.