1 Yalishca jipa llactapuracunapi chaupiri callarirca, shinashpa paicuna chaupirirca huaquinguna shuj ladoman cutishujcuna shuj ladoman, paicunapaj ñangunata rirca, Nefita paillata saquishpa, imashna paicunapaj chaupipi shayajurca.

2 Yalishca jipa Nefi rirca paipaj propio huasiman, aliguta yarishpa cuzascunapi imata Apunchij paiman ricuchishca carca.

3 Yalishca jipa imashna shina aliguta yarijujpi—ashtacata llaquirishpa Nefita llactapuracunapaj na ali ruraicunamanda, paicunapaj pacalla yanallapaj ruranacunamanda, paicunapaj huañuchicunapash, paicunapaj shujpata japinacunapash, tucui laya na ali ruraicunapash—yalishca jipa imashna pai shina aliguta yarishca carca paipaj shungupi, riqui, shuj shimi paipaman shamurca nishpa:

4 Achilyachishca cangui, Nefi, cai cuzascunamanda imata quiquin rurashcangui; ñuca ricushcani na shaijushpa achil shimita villashcangui, imata ñuca quiquinman cushcani, cai llactapuracunaman. Paicunata na manllashcangui, quiquinba propio causaitapash na huacaichingapa mascashcangui, ashtahuangari ñuca munaita rurangapa mascashcangui, ñuca rurachunbacha saquishcacunatapash alichingapa.

5 Cunan, caita rurashcamanda shina na shaijuihuan, riqui, ñuca achilyachisha mana tucurinacaman; quiquinda ninan ushai charijta rurasha shimipi, ruraicunapi, fepi, ruranacunapipash; ari, tucui cuzascuna rurashca canga quiquinba shimi nishcashna, imashpa quiquin na mañanguichu ñuca munaipaj contra cajta.

6 Riqui, quiquin Nefi, ñuca cani Dios. Riqui, ñuca villani quiquinman ñuca ángelcunapaj ñaupapi, ushaita charingui cai llactapuracunapa jahuapi, llaquichinguipash cai alpata ninan yarjaihuan, millai unguicunahuanbash, tucuchinahuan, cai llactapuracunapaj na ali ruraicunamanda.

7 Riqui, ñuca canman ushaita cuni, imata cai alpapi sellangui jahua pachapipash sellashca canga; imata cai alpapi cacharichingui jahua pachapipash cacharichishca canga; shina charingui ushaita cai llactapuracunapi.

8 Shina, cai achil huasita ishcaipi faquiri nijpipash, cai rurashca canga.

9 Cai urcuta, Urai shamui pugru alpaman tigrai nijpipash, cai rurashca canga.

10 Riqui, Diosta cai llactapuracunata llaquichi nijpipash, cai shina tucunga.

11 Cunan riqui, ñuca mandani, richun cai llactapuracunaman villachun, Apunchij Diosca shina nin, pimi Tucui Ushaita Charij: Imashpapash arrepentirijpilla na llaquichinga, tucuchingacaman.

12 Riqui, cunan yalishca jipa imaura Apunchij Nefiman cai shimicunata parlashca cajpi, jarcarirca na paipaj propio huasiman chayarcachu, ashtahuangari ashtacapacha tandanajushcacunapaman tigrarca picuna caiman chaiman alpa jahuaman chajchurishcacuna carca, paicunaman Apunchijpaj achil shimita villai callarirca imata paiman parlashca carca, paicunapaj tucuchinamanda paicuna na arrepentirijpi.

13 Cunan riqui, masqui Nefi jatun juyailla ruraita ricuchishca cajpipash villashpa ricushpa chasquichijcunapaj yali mandajpaj huañuimanda, paicunapaj shungucunata shinlliyachirca Apunchijpaj shimicunatapash na uyarca.

14 Chaimanda Nefi Apunchijpaj shimicunata villarca, nishpa: Imashpapash arrepentirijpilla, Apunchijca shina nin, llaquichishca canguichi tucuchingacaman.

15 Yalishca jipa imaura Nefi paicunaman shimita villajpi, riqui, paicunapaj shungucunata shinlliyachircara paipaj shimicunatapash na uyanayachirca; chaimanda paicuna paita pliturca, paita japingapa munarca cárcelman churangapa.

16 Ashtahuangari riqui Diospaj ushai paihuan carca, paicuna paita na japi usharca cárcelman churangapa, imashpa Espírituhuan apai tucurca paicunapaj chaupimanda.

17 Yalishca jipa shina rirca Espíritupi, ashtacapacha tandanajushcamanda shuj ashtacapacha tandanajushcaman, Diospaj shimita villashpa, imauraca tucuillaman villashca cangacaman, nacashpa cai cachashca cashpa tucui llactapuracunapi.

18 Yalishca jipa paipaj shimicunata na uyangapa munarca; fiñanajuicuna tiai callarirca, shinashpa paipuracunallata chaupirishca carca, espadahuanbash caishu chaishuta huañuchi callarirca.

19 Shina tucurirca ricushpa chasquichijcunapaj reinado canchis chunga shuj huata Nefipaj llactapuracunapa jahuapi.