1 Cunan yalishca jipa ricushpa chasquichijcunapaj reinado canchis chunga ishcai huatapi randimanda plituricuna mirarca, shinashpa macanajuicuna tiarca tucui alpapi tucui Nefipaj llactapuracunapi.

2 Cai carca cai pacalla shuhuacunapaj tandanajushca pimi aparca cai tucuchinapaj, na ali ruraicunapaj ruraita. Cai macanajui catirca tucui chai huata; canchis chunga quimsa huatapipash catirca.

3 Yalishca jipa cai huata Nefi Apunchijta mañarca, nishpa:

4 Oh Apunchij, ama saquichu cai llactapuracuna huañuchishca cachun espadahuan; ashtahuangari Oh Apunchij, tiachun shuj ninan yarjai alpapi, tangaj shina paicunata yarichingapa Apunchij paicunapaj Diosta, imashpapash paicuna arrepentiringa quiquinman tigrachun.

5 Shina cai rurashca carca, Nefipaj shimicunamanda. Tiarcapash alpapi shuj jatun ninan yarjai, tucui Nefipaj llactapuracunapi. Shina canchis chunga chuscu huatapi ninan yarjai catirca, espadahuan tucurinapaj rurai tucurirca ashtahuangari ninan yarjaihuan llaquichiman tigrarca.

6 Cai tucuchinapaj rurai catircapash canchis chunga picha huatapi. Cai alpa llaquichishca carca, cai chaquishca carca, muyu na fucurca muyupaj punllacunapipash; tucui alpa llaquichishca carca, Lamanitacunapipash shinallata Nefitacunapipash, shina paicuna llaquichishca carca, chaimanda huaranga huarangacuna huañurca alpapaj ashtahuan na ali pushtucunapi.

7 Yalishca jipa llactapuracuna ricurca paicuna ña tucurinata ninan yarjaihuan, paicuna yari callarirca Apunchij paicunapaj Diosta; Nefipaj shimicunata yari callarirca.

8 Llactapuracuna mañai callarirca paicunapaj ricushpa chasquichijcunapaj yali mandajcunata, paicunapaj pushajcunatapash, paicuna Nefita nichun: Riqui, ñucanchi yachanchi quiquin Diospaj runa cangui, chaimanda mañai Apunchij ñucanchi Diosta pai ñucanchimanda anchuchichun cai ninan yarjaita, imashpapash tucui shimicuna imata parlashcangui ñucanchipa tucurinamanda pactashca canman.

9 Yalishca jipa ricushpa chasquichijcuna Nefita nirca, shimicunahuan imashna mañashca carca. Yalishca jipa imaura Nefi ricurca llactapuracuna arrepentirishca cajta paicunallata humillarishcapash ciliciopi, pai cutin mañarca Apunchijta, nishpa:

10 Oh Apunchij, riqui cai llactapuracuna arrepentirin; paicuna ñucanchipamanda tucuchishca Gadiantónpaj tandanajushcata shinashpa paicuna tucuritapacha tucurishca, pacashcapash paicunapaj pacalla ruranacunata alpapi.

11 Cunan, Oh Apunchij, paicunapaj cai humildadmanda quiquinba fiñaita anchuchipai, saqui shinalla tucuchipi cachun cai maijan na ali runacuna picunata ña tucuchishcangui.

12 Oh Apunchij, tucuchi quiquinba fiñaita, ari, quiquinba rupajuj fiñaita, cai ninan yarjaitapash tucuchipai cai alpapi.

13 Oh Apunchij, uyahuai, rurashca cachun saquipai ñuca shimicunamanda, tamiata cachamui alpa jahuallaman, pai fucuchichun paipaj fucuita, paipaj muyupash muyupaj punllapi.

14 Oh Apunchij uyahuarcangui ñuca shimicunata imaura ñuca nircani, shuj ninan yarjai tiachun, espadahuan huañui tucurichun; ñuca yachani, cai punllapash ñuca shimicunata uyangui, quiquin nircangui: Cai llactapuracuna arrepentirijpi ñuca quishpichishami.

15 Ari, Oh Apunchij, quiquin ricunguipash paicuna arrepentirishca can, ninan yarjaimanda, unguicunapash, tucuchipash ima paicunapaman shamushca.

16 Cunanbash, Oh Apunchij, tucuchi quiquinba fiñaita, cutin ricunguipash quiquinda paicuna sirvipapash? Shina cajpica, Oh Apunchij, achilyachipai quiquinba shimicunamanda imata nircangui.

17 Yalishca jipa canchis chunga canchis huatapi Apunchij tucuchirca paipaj fiñaita llactapuracunapamanda, tamiata alpa jahuapi urmachirca, shinashpa cai fucurca paipaj fucushcata paipaj fucuna punllapi. Yalishca jipa cai fucurca paipaj muyuta paipaj muyupaj punllapi.

18 Riqui, llactapuracuna cushijurca Diosta jatunyachircapash, tucui alpa jahualla cushijuihuan jundashca carca; paicuna Nefita ñana ashtahuan tucuchingapa munarca, ashtahuangari paicuna paita alicachirca shuj jatun achil villachij laya, Diospaj runa, charishpa jatun ushaita, autoridadtapash Diosmanda paiman cushca.

19 Riqui, Lehi, paipaj huauqui, paipa na ashalla uchillapash carca ali rurana cuzascunamanda ricushpa.

20 Shina cai yalishca jipa Nefipaj llactapuracuna alpapi cutin ali mirai callarirca, paicunapa jichushca pushtucunapi shayachi callarirca, aillucuna mirari callarircapash, chajchurircapash, tucui alpa jahuallapi jundangacaman, vichaiman, uraimanbash, indi huashajuj lado jatun mama cochamanda indi llujshij lado jatun mama cochacaman.

21 Yalishca jipa canchis chunga sujta huata tucurirca sumaj causaipi. Canchis chunga canchis huata callarirca sumaj causaihuan; iglesiapash tucui alpa jahuallaman rirca; tucuimanda yalishca llactapuracuna, ishcandi Nefitacuna, Lamanitacunapash, iglesiata catirca; paicuna ninan jatun sumaj causaita alpapi charirca; shina tucurirca canchis chunga canchis huata.

22 Paicuna sumaj causaita charircapash canchis chunga pusaj huatapi, huaquin randimanda plituricunamandalla yachachishcapaj puntocunamanda imata achil villachijcuna churashca carca.

23 Canchis chunga iscun huatapi ashtahuan randimanda plituricuna tiai callarirca. Ashtahuangari yalishca jipa Nefi, Lehipash, tauca paicunapaj huauquicunapash picuna yacharca ciertopacha yachachishcapaj puntocunata, chasquishpa tauca achil ricuchicunata punllan punllan, chaimanda paicuna llactapuracunaman yachachirca, shinashpa paicuna tucuchita churarca paicunapaj randimanda plituricunata chai huatapillata.

24 Yalishca jipa ricushpa chasquichijcunapaj reinado pusaj chunga huatapi Nefipaj llactapuracunapaj jahuapi, Nefipaj llactapuracunamanda huaquin chaupirishcacuna tiarca, picuna huaquin huatacuna ñaupa Lamanitacunapaman tandanajushca carca, Lamanitacunapaj shutita paicunamandallata japirca, huaquingunapash picuna Lamanitacunapaj cati aillucunapacha carca, fiñaiman tangai shina cashpa paicunahuan, nacashpa chai chaupirishcacuna, chaimanda paicuna callarirca shuj macanajuita paicunapaj huauquicunahuan.

25 Paicuna huañuchirca, shuhuarcapash; shina paicuna tigrai pacajurca urcucunapi, jichushca pambacunapi, pacalla pushtucunapi, paicunallata pacajushpa ama tupai tucushca cangapa, punllan punllan chasquishpa paicuna mirangapa, shinashpa paicunapaman shamurca chaupirishcacuna.

26 Shina punllapi, ari, na tauca huatacunapi, paicuna tigrarca shuj ninan jatun shuhuacunapaj tandanajushcacuna; tucui Gadiantónpaj pacalla ruraicunata mascarca; shina Gadiantónpaj shuhuacunaman tigrarca.

27 Cunan riqui, cai shuhuacuna jatun llaquinayai tucuchinata rurarca, ari, jatun tucuchinata Nefipaj llactapuracunapi, Lamanitacunapaj llactapuracunapipash.

28 Yalishca jipa cai minishtirishca carca tucurita churana cai tucuchinapaj cai ruraita; chaimanda paicuna cacharca macanajujcunata shinlli runacunata jichushca pambaman urcucunamanbash cai shuhuacunapaj tandanajushcacunata mascachun, paicunata tucuchichu.

29 Ashtahuangari riqui, yalishca jipa chai huatallata paicunapaj propio alpacunaman calpashca carca. Shina tucurirca ricushpa chasquichijcunapaj reinado pusaj chunga huata Nefipaj llactapuracunapa jahuapi.

30 Yalishca jipa pusaj chunga shuj huata callaripi cutin llujshirca cai shuhuacunapaj tandanajushcacunapaj contra, taucacunata tucuchirca; paicunapash ricurishca carca ashtaca tucurinahuan.

31 Paicuna cutin jichushca pambamanda tigramunapacha carca urcucunamandapash paipacunapaj propio alpacunaman, ninan ashtacapacha mirashca caimanda chai shuhuacuna picuna causarca llaquichishpa urcucunata, jichushca pambacunatapash.

32 Yalishca jipa shina cai huata tucurirca. Shuhuacunapash mirashpa catinajurcara shinllicunaman tigrashcapash, shinashpa paicuna Nefitacunapaj tucui macanajuj runacunata, Lamanitacunatapash macanajungapa mascanajurca; paicuna ninan manllaita shamuchirca llactapuracunapaman tucui alpa jahuaman.

33 Ari, paicuna ricugrirca tauca pambapaj pushtucunata, jatun tucuchicunata rurarcapash; ari, taucacunata huañuchirca, cutishujcunata jichushca pambaman huatai tucushcashna aparca, ari, ashtahuanbacha paicunapaj huarmicunata, paicunapaj huahuacunatapash.

34 Cunan cai jatun llaquiricuna, ima llactapuracunapaman shamurca paicunapaj na ali ruraicunamanda, cutin tangachirca yarichun Apunchij paicunapaj Diosta.

35 Shina tucurirca ricushpa chasquichijcunapaj reinado pusaj chunga shuj huata.

36 Pusaj chunga ishcai huatapi paicuna Apunchij paicunapaj Diosta cutin cungai callarirca. Pusaj chunga quimsa huatapi shinllicunaman tigrarca na ali ruraicunapi. Pusaj chunga chuscu huatapi paicunapaj causaicunata na aliyachirca.

37 Yalishca jipa pusaj chunga picha huatapi shinllicunaman tigrarca, paicunapaj jariyaipi shinlliyarcapash, paicunapaj na ali ruraicunapipash; shina paicuna cutin fucushca carca tucuchishca cangapa.

38 Shina tucurirca pusaj chunga picha huata.