1 Yalishca jipa ricushpa chasquichijcunapaj reinado chuscu chunga ishcai huatapi, Moroníah cutin sumaj causaita shayachishca jipa Nefitacunahuan, Lamanitacunahuan, riqui pipash na tiarca ricushpa chasquichina jatun tiarinata japingapa; chaimanda cutin randimanda plituri tiai callarirca llactapuracunahuan ricushpa chasquichina jatun tiarinata maijan japinamanda.

2 Yalishca jipa Helamán, pimi Helamánpaj churi carca, ajllai tucushca carca ricushpa chasquichina jatun tiarinata japichun, llactapuracunapaj shimimanda.

3 Ashtahuangari riqui, Kishkumen, pimi Pahoránda huañuchirca, Helamándapash tucuchingapa shuyajurca; paipaj tandanajushcacuna shinllichinajurca, maijanguna shuj convenioman yaicurca paipaj na ali ruraicunata pipash ama yachachun.

4 Shuj Gadiantón tiarca, pimi tauca shimicunapi ninan yachashca carca, paipaj umachinapipash, pacalla huañuchicuna, shuhuaicunata rurangapa; chaimanda Kishkumenpaj tandanajushcacunapaj pushajman tigrarca.

5 Chaimanda uyanayaita llullarca paita shinlliyachichun, Kishkumendapash, paita ricushpa chasquichina jatun tiarinapi churajpica maijan paipaj tandanajushcacunata ushaipi, autoridadpi llactapuracunapi churashca canguichi nishpa; chaimanda Kishkumen Helamánda tucuchingapa munarca.

6 Yalishca jipa imashna pai ricushpa chasquichina jatun tiarinaman Helamánda tucuchingapa rijujpi, riqui Helamánpaj shuj sirvij runa, tuta canllapi cashpa, chasquishca cashpa, na rijsinallata churajushpa, chai plangunata yachaj chayarca cai tandanajushcacuna imata shuyanajurca Helamánda tucuchingapa—

7 Yalishca jipa Kishkumenda tuparca, shuj señalta curca; chaimanda Kishkumen villarca pai imata munajujta, munashpa ricushpa chasquichina jatun tiarinaman pushachun Helamánda huañuchingapa ushachun.

8 Imaura Helamánpaj sirvij runa Kishkumenpaj tucui shunguta yachashpa, paipaj munai carca huañuchina, chaillata carca tucui maijan paipaj tandanajushcacunapaj munaipash, shuhuana, ushaita charingapa, (cai carca paicunapaj pacalla plan, paicunapaj pacalla tandanajuicuna) Helamánpaj sirvij runa Kishkumenda nirca: Ricushpa chasquichina jatun tiarinaman jacu.

9 Cunan cai Kishcumenda ninanda cushichirca, imashpa paipaj munashca pactagrin yarca; ashtahuangari riqui, Helamánpaj sirvij runa, ricushpa chasquichina jatun tiarinaman rinajushpa, Kishkumenpaj shungupi puñalarca, nimata na quijarishpa huañurca. Calpashpa Helamánman villarca tucui cuzascunata ricushcata, uyashcata, rurashcatapash.

10 Yalishca jipa Helamán japichun cacharca chai tandanajushca shuhuacunata, pacalla huañuchijcunata, paicuna huañuchi tucushca cai ushachun imashna nishca catichunbacha saquishcacunapi.

11 Ashtahuangari riqui, Gadiantón Kishkumen na tigramujta yachashpa huañuchi tucunata manllarca; chaimanda paipaj tandanajushcacunata catichirca. Alpamanda llujshishpa calparca, shuj pacalla ñanda, jichushca pambaman; shina imaura Helamán japichun cachajpi nimaipi na tarirca.

12 Cai Gadiantónmanda ashtahuan ñaupaman parlashca canga. Shina ricushpa chasquichijcunapaj reinado chuscu chunga ishcai huata tucurirca Nefipaj llactapuracunapa jahuapi.

13 Riqui, cai quilcashca tucuripi ricunguichi cai Gadiantón ñalla tucuilla tucuchij cajta, ari, Nefipaj llactapuracunapaj ñalla tucuilla tucuchina.

14 Riqui ñuca na ningapa munanichu Helamánpaj quilcashca tucuripi, ashtahuangari ñuca nini Nefipaj quilcashca tucuripi, maimanda ñuca japishcani tucui tandachishpa quilcashcata imata ñuca quilcashcani.