1 Riqui, cunan yalishca jipa imaura Nefi cai shimicunata parlashca jipa, huaquin runacuna paicunahuan cashcacuna ricushpa chasquichij jatun tiarinamanda calpashpa rirca; ari, picha tiarca maijanguna rirca, paicunapillata rinajushpa ninajurca:

2 Riqui, cunan ñucanchi yachagrinchi ciertopacha cai runa shuj achil villachij cajta, Dios paita mandashca ñucanchiman villachichun shina juyailla cuzascunata. Riqui, ñucanchi na crinchichu imata rurashcata; ari, ñucanchi na crinchichu pai achil villachij cajta; shina cashpapash, cai cuzas imata pai nishca ricushpa chasquichij yali mandajmanda ciertopacha cajpica, pai huañushca cajpica, shina ñucanchi crishun chaishu shimicunata parlashcacunata ciertopacha cajta.

3 Yalishca jipa paicunapaj usharishcata calparca, ricushpa chasquichina jatun tiarinaman chayarca; riqui, ricushpa chasquichijcunapaj yali mandaj alpaman urmashca carca, paipaj yahuarpi huañushca sirijurca.

4 Cunan riqui, imaura caita ricushpa paicuna ninandapacha manllarirca, shinashpa paicuna alpaman urmarca; na crishca carca shimicunata imata Nefi parlashca carca ricushpa chasquichijcunapaj yali mandajmanda.

5 Ashtahuangari riqui, imaura ricushpa paicuna crirca, manllai japirca paicunapa jahuaman tucui castigocuna shamunga yashpa imata Nefi parlashca carca shamunga llactapuracunaman nishpa; chaimanda chujchurca, alpaman urmarcapash.

6 Cunan, ñapash ricushpa chasquichij huañuchishca jipa—paipaj huauqui na rijsinallata churajushpa puñalashpa, calpashca carca, sirvij runacuna calparca, villarca llactapuracunaman, paipuracunapi huañuchishcata caparita rurashpa;

7 Riqui llactapuracuna tandanajurca ricushpa chasquichina jatun tiarinapi—riqui, paicunapaj manllaripa ricurca picha runacunata picuna alpaman urmashca carca.

8 Cunan riqui, llactapuracuna nimata na yacharca ashtacapacha tandanajushcata Nefipaj jardínpi; chaimanda paipuracuna nirca: Cai runacuna picuna huañuchishca ricushpa chasquichijta, Dios chugrichishca ñucanchipamanda ama calpachun.

9 Yalishca jipa paicunata japirca, huatashpa cárcelman shitarca. Shuj proclamaciónda tucuiman cacharca ricushpa chasquichij huañushcata, huañuchijcunata japishca cashcata cárcelman churashcapash.

10 Yalishca jipa cati punlla llactapuracuna tandanajurca llaquiringapa, ayunangapapash, jatun ricushpa chasquichijcunapaj yali mandaj paipaj pambana punllapi pimi huañuchishca carca.

11 Shina chai ricushpa chasquichijcunapash picuna Nefipaj jardínpi carca, paipaj shimicunata uyarca, pambana punllapi tandanajurcapash.

12 Yalishca jipa llactapuracunata tapurca, nishpa: Maipita chai pichapura maijangunata cachamushca carca ricushpa chasquichijcunapaj yali mandajmanda huañushca na huañushca tapuchun? Tigrachirca nishpa: Chai pichapura canguna cachamushcacunamanda, ñucanchi na yachanchichu; ashtahuangari tian pichapura picuna huañuchijcuna, picunata cárcelman shitarcanchi.

13 Yalishca jipa ricushpa chasquichijcuna mañarca paicunata apamuchun; paicuna apamui tucurca, riqui paicuna carca pichapura cachamushcacuna; riqui ricushpa chasquichijcuna tapurca yachanguichichu ima cajta, paicuna villarca tucui paicuna rurashcata, nishpa:

14 Ñucanchi calparcanchi, chayarcanchi ricushpa chasquichij jatun tiarina pushtuman, imaura ricurcanchi tucui cuzascunata imashna Nefi testificashcata, manllarircanchi shinashpa alpaman urmarcanchi; imaura ñucanchi manllaimanda rijcharijpica, riqui ñucanchita cárcelman shitarca.

15 Cunan, cai runata huañuchishcamanda, ñucanchi na yachanchichu pi caita rurashcata; caitalla ashtacata yachanchi, ñucanchi calparcanchi, chayarcanchi canguna imashna mañarcanguichi, riqui pai huañushca carca, Nefipaj shimicuna nishcashna.

16 Cunan yalishca jipa ricushpa chasquichijcuna llactapuracunaman villarca imashna cajta, caparirca Nefipaj contra, nishpa: Riqui, ñucanchi yachanchi cai Nefi parlarishcanga pihuanbash ricushpa chasquichijta huañuchingapa, shina pai ñucanchiman villangapa, shina paipaj feman tigrachingapa, paimandallata jatun tucungapa, Diospaj ajllashcapash, shuj achil villachijpash.

17 Cunan riqui, cai runata yachaj chayagrinchi, pai villanga paipaj faltata ñucanchiman yachaj chayachingapash ricushpa chasquichij ciertopacha huañuchijta.

18 Yalishca jipa pichapuracuna cacharishca carca pambana punllapi. Shina cajpipash, paicuna ricushpa chasquichijcunata rimarca Nefipaj contra shimicunata parlashcamanda, caishuhuan chaishuhuan fiñanajurca, shinashpa paicunahuan pliturirca.

19 Shina cashpapash, paicuna Nefita japichirca, huatashpa, ashtacapacha tandanajushcacunapaj ñaupaman aparca, tapuchi callarirca tauca layapi pandachingapa, huañuiman condenangapa—

20 Nishpa paita: Cómplice cangui; pita can cai runa cai huañuchita rurashca? Cunan ñucanchiman villai, rijsi quiquinba faltata; nishpa, Riqui caipi culqui can; quiquinba causaitapash saquishun ñucanchiman villajpica, yachaj chayachijpi pihuan parlarishcata.

21 Ashtahuangari Nefi nirca paicunata: Oh juizu illacuna, shunguta na circuncidashcacuna, ñausacuna, na cazuj llactapuracuna, yachanguichichu imauracaman Apunchij cangunapaj Dios saquinga canguna richun cai juchata rurana ñanda?

22 Oh huacai callarina canguichi, llaquirinapash, jatun tucuchinamanda imami cangunata cunanllata shuyajun, imashpapash canguna arrepentirijllapi na.

23 Riqui canguna ninguichi ñuca shuj runahuan parlarishcani Seezóramda huañuchingapa, ñucanchi ricushpa chasquichijcunapaj yali mandajta. Ashtahuangari riqui, cangunaman nini, cai can ñuca cangunaman testificashcamanda cai cuzasta yachaimanda; ari, cangunapa shuj testigo laya, yacharcanita na ali ruraicunamanda, millanayaicunamandapash imacuna cangunapi can.

24 Caita rurashcamanda, ninguichi shuj runahuan parlarishcani cai cuzasta rurangapa; ari, imashpa ñuca cai señalta ricuchishcani canguna fiñanguichi ñucata, ñuca causaita tucuchingapa munanguichi.

25 Cunan riqui, ñuca cangunaman ricuchisha cutishuj señalta, ricusha cai cuzascunapi ñucata tucuchingapa munanguichita.

26 Riqui cangunaman nini: Richi Seantumpaj huasiman, pimi Seezórampaj huauqui, paita ni—

27 Nefi, achil villachij cani nishca, pimi villachin shina ashtaca na alicunata cai llactapuracunaman, quiquinhuan parlarishcachu, Seezóramda huañuchingapa pimi canba huauqui?

28 Riqui, pai ninga, Na.

29 Paita ninguichi: Huañuchishcanguichichu canba huauquita?

30 Pai manllaihuan canga, ima ninata na yachangachu. Riqui, pai neganga; manllarishcashnalla canga; shina cashpapash, pai ninga inocente cani.

31 Ashtahuangari riqui, paita aliguta ricunguichi, taringuichi yahuarta paipaj manto urachaquipi.

32 Caita ricushpa, ninguichi: Cai yahuar maimandata? Nachu yachanchi cai yahuar cajta canba huauquipaj?

33 Shina pai chujchunga, yurayanga, paipaman huañui chayajpi laya.

34 Shina ninguichi: Cai manllaimanda cai yurayaimandapash ima canba ñaviman shamushcamanda, riqui, ñucanchi yachanchi culpable cangui.

35 Shina jatun manllai paipaj jahuaman shamunga; shina cangunaman villanga, ashtahuan na negashpa pai huañuchishcata.

36 Shina cangunaman ninga, ñuca, Nefi nimata na yachanita ima cajta imashpapash ñucaman cushca cajpi Diospaj ushaimanda. Shina canguna yachanguichi ñuca shuj honesto runa cajta, Diospajmanda cangunapaman cachamushca canitapash.

37 Yalishca jipa rirca, rurarca imashna Nefi nishcata. Riqui, shimicuna imata pai nirca ciertopacha carca; imashna nishca pai negarca; shimicuna nishcashna pai villarca.

38 Paipacha huañuchij cajta ricuchingapa apamurca, shinashpa pichapuracuna libre carca, Nefipash.

39 Tiarca huaquinguna Nefitacunapaj picuna Nefipaj shimicunata crirca; tiarcapash huaquingunapash pichapurapaj testimoniota crimanda, imashpa paicuna crijman tigrarirca cárcelpi cashpa.

40 Cunan tiarca huaquinguna llactapuracunapi, picuna nirca Nefi shuj achil villachij cashcata.

41 Cutishujcuna tiarca picuna nirca: Riqui, pai can shuj dios, pai shuj dios na cashpaca na tucui cuzascunata na yachanman. Riqui, ñucanchiman nishca ñucanchi shungucunapaj yuyashcacunata, cuzascunatapash ñucanchiman villarcapash; ñucanchiman yachaj chayachishcapash ñucanchi ricushpa chasquichijcunapaj yali mandajta ciertopacha huañuchijta.