Helamánpaj Quilcashca
Nefitacunapaj tandachishpa quilcashca. Paicunapaj macanajuicuna, ninanda rfiñarishpa rimarinacunapash, paicunapaj chaupirishcacunapash. Tauca achil villachijcunapaj villachishcacunapash, nara Cristo shamujpi, Helamánpaj tandachishca quilcashcacunamanda, pimi Helamánpaj churi carca, paipaj churicunapaj tandachishca quilcashcacunamanda, Cristo shamungacaman. Tauca Lamanitacunapash tigrashca carca. Paicunapaj crijman tigrashcamanda tandachishpa quilcashca. Lamanitacunapaj ali ruraicunamanda tandachishpa quilcashca, Nefitacunapaj na ali ruraicunapash, millanayaicunapash, Helamánpash, paipaj churicunapaj tandachishca quilcashcamanda, Cristo shamungacaman, imami shutichishca can Helamánpaj quilcashca, ashtahuanbash.
1 Capítulo
Pahorán churi ricushpa chasquichijcunapaj yali mandaj tucun, Kishkumenmanda huañuchitucun—Pacumeni ricushpa chasquichina jatun tiarinata japin—Coriántumr Lamanitacunapaj macanajuj runacunata pushan, Zarahemlata japin, Pacumenita huañuchinbash—Moroníah Lamanitacunata mishan Zarahemlatapash cutin mishan, Coriántumrbash huañuchi tucushca can. Nara 52–50 C.Ñ.
1 Cunan riqui, yalishca jipa ricushpa chasquichijcunapaj reinado chuscu chunga huata callaripi Nefipaj llactapuracunapa jahuapi, shinlli llaquicuna tiai callarirca Nefitacunapaj llactapuracunapi.
2 Riqui, Pahorán huañushca carca, tucui alpacunapaj ñanda catishca carca; chaimanda randimanda plituripacha tiai callarirca ricushpa chasquichina jatun tiarinata maijan huauqui, Pahoránpaj churicunaman japinamanda.
3 Cunan cai carca paicunapaj shuticuna maijanguna fiñanajunajurca ricushpa chasquichina jatun tiarinamanda, picuna llactapuracunatapash fiñanajuchirca: Pahorán, Paanqui, Pacumeni.
4 Cunan caicuna na tucui carca Pahoránpaj churicuna (imashpa pai taucacunata charirca), ashtahuangari caicuna carca maijanguna fiñanajunajurca ricushpa chasquichina jatun tiarinamanda; chaimanda, llactapuracunata quimsapi chaupichirca.
5 Shina cajpipash, yalishca jipa Pahorán ajllai tucushca carca llactapuracunapaj shimihuan ricushpa chasquichijcunapaj yali mandaj cachun, Nefipaj llactapuracuna jahuapi gobernadorpash cachun.
6 Yalishca jipa Pacumeni, pai ricuimanda, pai na chasqui ushanata ricushpa chasquichina jatun tiarinata, llactapuracunapaj shimiman tandanajurca.
7 Ashtahuangari riqui, Paanqui, chai llactapuracuna maijanguna munashca carca pai paicunapaj gobernador cachun, ninandapacha fiñashca carca; chaimanda, pai ña uyanayaita llullagrijurca chai llactapuracuna na cazuripi jatarichun paicunapaj huauquicunapaj contra.
8 Yalishca jipa pai caita ruragrijujpi, japiturcurca, llactapuracunapaj shimihuan ricushpa chasquichi tucurca, huañuimanbash ricushpa chasquichi tucurca; na cazuipi jatarishca caimanda, llactapuracunapaj libertadta tucuchingapa munashca caimanda.
9 Cunan imaura chai llactapuracuna maijanguna pai paicunapaj gobernador cachun munashcacuna ricushpa pai huañuiman ricushpa chasquichishca cajta, chaimanda paicuna fiñashca carca, riqui, Kishkumenda Pahoránpaj ricushpa chasquichina jatun tiarinacaman cacharca, Pahoránda huañuchirca ricushpa chasquichina jatun tiarinapi tiajujllapita.
10 Pahoránpaj sirvij runacunahuan cati tucurca; ashtahuangari riqui, shina ñapash Kishkumenpaj calpai carca pipash na japi usharca.
11 Chai maijan paita cachashcacunapaman rirca, paicuna tucuilla shuj convenioman yaicurca, ari, jurashpa paicunapaj mana tucurina Rurajmanda, paicuna pimanbash ama villangapa Kishkumen Pahoránda huañuchishcata.
12 Chaimanda, Kishkumen Nefipaj llactapuracunapi na rijsi tucushca carca, imashpa Pahoránda huañuchishca punlla na rijsinalla churajunahuan carca. Kishkumen, paipaj tandanajushcacunapash, picuna paihuan conveniota rurashca carca, llactapuracunahuan chapurirca, shuj laya na tucuilla tupai tucurca; ashtahuangari mashna tupai tucushcacuna huañuiman ricushpa chasquichishca carca.
13 Cunan riqui, Pacumeni ajllashca carca, llactapuracunapaj shimimanda, ricushpa chasquichijcunapaj yali mandaj cachun, llactapuracunapaj gobernadorpash cachun, paipaj huauqui Pahoránpaj randi reinachun; cai carca paipaj derecho. Tucui cai rurashca carca ricushpa chasquichijcunapaj reinado chuscu chunga huatapi; cai tucurirca.
14 Yalishca jipa ricushpa chasquichijcunapaj reinado chuscu chunga shuj huatapi, Lamanitacuna tandachirca na yupai ushai macanajuj runacunata, paicunaman churachirca espadacunahuan, cimitarracunahuan, arcocunahuan, flechacunahuan, uma jirrucunahuan, pecho jirrucunahuan, paipuralla tucui laya escudocunahuanbash.
15 Paicuna cutinbash urai shamurca Nefitacunahuan macanajuita mascangapa. Paicunata pushajurca shuj runa paipaj shuti carca Coriántumr; Zarahemlamanda cati aillu carca; Nefitacunamanda chaupirishca carca; jatun, shinlli runa carca.
16 Chaimanda, Lamanitacunapaj jatun mandaj, paipaj shuti carca Tubalot, pimi Ammorónpaj churi carca, yashpa Coriántumr, shinlli runa cashpa, Nefitacunapaj contra chimbapurai shayarita ushanga, paipaj shinlli caihuan paipaj jatun yachaihuanbash, shinashpa paita cachashpa Nefitacunapaj jahuapi ushaita mishachun—
17 Chaimanda fiñaiman tangachirca, paipaj macanajuj runacunatapash tandachirca, Coriántumr ajllashca carca paicunapaj pushaj cachun, urai purishpa richirca Zarahemla alpaman Nefitacunahuan macanajuchun.
18 Yalishca jipa shina ashtaca randimanda pliturimanda shina gobiernopi ashtaca shinlli caimanda, na yapalla ricuj runacunata Zarahemla alpapi saquishca carca; imashpa paicuna yarca Lamanitacuna manllaita charinga paicunapaj chaupi pambapi macanajui shamungapa cai jatun Zarahemla llactata.
19 Ashtahuangari yalishca jipa Coriántumr purishpa rirca paipaj taucapacha macanajuj runacunapa umapi, llactapi causajcunapa jahuaman shamurca, paicunapaj ri purishpa carca shina ñapash jatun rina, shinamanda Nefitacuna nima tiempota na charirca paicunapaj macanajuj runacunata tandachingapa.
20 Chaimanda Coriántumr llactaman yaicunata ricuj runacunata huañuchirca, rircapash paipaj tucuilla macanajuj runacunahuan llacta ucuman, huañuchirca tucuita maijan chimbapurajcunata, shinashpa tucui llactata misharca.
21 Yalishca jipa Pacumeni, pimi carca ricushpa chasquichijcunapaj yali mandaj, Coriántumr ñaupamanda calparca, llactapaj pircacunacaman. Yalishca jipa Coriántumr pircapi quimichishpa huañuchirca, shinashpa huañurca. Shina Pacumenipaj punllacuna tucurirca.
22 Cunan imaura Coriántumr ricushpa Zarahemla llactata mishashpa charijushpa, Nefitacuna paicunapaj ñaupamanda calpajta ricushpa, huañushca cajta, japi tucushcapash cajta, cárcelpi churashca cajta, shinlli pushtucunatapash tucui alpacunapi japishca charinajushca caimanda, paipaj shungu na manllarca shinashpa tucui alpacunapaj contra ringapa carca.
23 Cunan Zarahemla alpapi na shayarirca ashtahuangari purishpa rirca taucapacha macanajuj runacunahuan, Ashtacapacha Tiaj llactacaman; ringapapacha munashca carca espadahuan ñanda pascangapa, vichai pushtu alpacunata japingapa.
24 Yaimanda paicunapaj jatunbacha macanajujcuna alpapaj chaupipi can yashpa, chaimanda ñaupaman rirca, tandanajuna tiempotapash na cushpa uchilla tandanajunacunatalla saquishpa; cai laya paicunapa jahuaman shamurca paicunata alpaman urmachircapash.
25 Ashtahuangari riqui, Coriántumrpaj cai alpa chaupita rina Moroníahman jatun ventajata curca, masqui Nefitacuna taucapacha huañushca cajpipash.
26 Riqui, Moroníah yarca Lamanitacuna chaupi alpaman shamungapa manllanata, ashtahuangari paicuna llactacunata muyundi manñacunapi macanajungapa mascanga imashna punda rurashcata; chaimanda Moroníah paipaj shinlli macanajuj runacunata chaillapita ricuriachun shuyachirca chai pushtucunapi muyundi manñacunapi.
27 Ashtahuangari riqui, Lamanitacuna na manllashca carca pai munashcashna, ashtahuangari paicuna chaupi alpaman yaicumushcarca, japishca carca capital llactata imami carca Zarahemla llacta, purishpa rinajurca ashtahuan minishtirishca alpa pushtucunata, llactapuracunata huañuchishpa jatun huañuchihuan, ishcandi runacunata, huarmicunata, huahuacunatapash, tauca llactacunata japishpa, tauca shinlli jarcashcacunatapash.
28 Ashtahuangari Moroníah caita yachaj chayashpa, Lehita, paipaj macanajuj runacunahuan ñapash cacharca, paicunata muyushpa jarcachun Ashtacapacha Tiaj alpaman nara shamujpillata.
29 Shina pai rurarca; pai jarcarca Ashtacapacha Tiaj alpaman nara shamujpillata, macanajuitapash curca, shinashpa paicuna Zarahemla alpaman huashaman tigrai callarirca.
30 Yalishca jipa Moroníah jarcarca paicunapaj tigranapi, macanajuitapash curca, shinashpa ashtacapacha yahuarhuan macanajuiman tigrarca; ari, tauca huañurca, huañushcacunata yupashcapi Coriántumrpash tupai tucurca.
31 Cunan, riqui, Lamanitacuna maijan ñandapash na tigrai usharca, vichaiman, uraiman, indi llujshij ladoman, indi huashajuj ladomanbash, imashpa tucui ladopi Nefitacunahuan muyushca carca.
32 Shina Coriántumr Lamanitacunata Nefitacunapaj chaupipi churashca carca, shinashpa Nefitacunapaj ushaipi carca, paillata huañurca, Lamanitacuna Nefitacunapaj maquicunapi saquirirca.
33 Yalishca jipa Moroníah Zarahemla llactata cutin misharca, Lamanitacuna maijanguna prezu japi tucushcacunaca chai alpamanda sumaj causaipi llujshishpa rirca.
34 Shina ricushpa chasquichijcunapaj reinado chuscu chunga shuj huata tucurirca.