1 Riqui, cunan yalishca jipa ricushpa chasquichijcunapaj reinado sujta chunga iscun huatapi Nefitacunapaj llactapuracunapi, Nefi, Helamánpaj churi, Zarahemla alpaman tigrarca vichai alpamanda.

2 Pai cashca carca llactapuracunahuan maijanguna vichai alpapi carca, paicunaman Diospaj achil shimita yachachirca, tauca cuzascunata paicunaman achil villachirca;

3 Tucui paipaj shimicunata na cazurca, shinashpa paicunahuan na caita usharca, ashtahuangari cutin tigrarca paipaj nacirishca alpaman.

4 Mascashpa llactapuracuna manllanayai na ali ruraipi cajcunata, chai Gadiantón shuhuacuna ricushpa chasquichina jatun tiarinacunata japishca—ushaita, llactapaj autoridadtapash munai na munai quichushpa, Diospaj rurachunbacha saquishcacunata na cazushpa saquishpa, na ashalla alipi paipaj ñaupapi; alicaita negashpa runacunapaj huahuacunaman;

5 Condenashpa ali rurajcunata paicunapaj ali ruraicunamanda; culpata, na ali ruraita richun saquishpa na castigashpa paicunapaj culquimanda; ashtahuanbash gobiernopaj umapi oficio pushtucunapi shinllichishca carca, mandangapa rurangapapash paicunapaj munashcacunata, paicuna charijyangapa, cai pachapaj cushijuitapash charingapa, ashtahuanbash, paicuna fangalla adulteriota rurangapa, shuhuangapa, paicunapaj propio munashcacunata rurangapa—

6 Cunan cai jatun na ali ruraicuna Nefitacunapaman shamushca carca na tauca huatacunapi; imaura Nefi caita ricushpa, paipaj shungu jundarca llaquirihuan paipaj pecho ucupi; caparirca paipaj almapaj llaquirihuan:

7 Oh, ñuca causaimanbash carcani chai punllacuna imaura ñuca taita Nefi callari Jerusalénpaj alpamanda llujshimujpi, paihuan cushijuiman carcani cushapacha nishca alpapi; shina paipaj llactapuracuna fangalla carca mañangapa, Diospaj rurachunbacha saquishcacunata alichingapa shinllicuna, na ali ruraicunaman apai tucungapa unayan; ñapashcuna carca Apunchijpaj shimicunata uyangapa—

8 Ari, chai punllacunapi causashca cashpaca, shina ñuca alma ñuca huauquicunapaj ali ruraicunapi cushijunman carca.

9 Ashtahuangari riqui, ñuca ajllashca cani, cai ñuca punllacuna can, ñuca alma jundashca canga llaquirihuan cai ñuca huauquicunapaj na ali ruraicunamanda.

10 Riqui, yalishca jipa shuj torrepi carca, imami carca Nefipaj jardínpi, cai carca jatun ñan ladoman, cai pushaj carca mercado principalman, Zarahemla llactapi; chaimanda, Nefi paimandallata cungurirca torrepi paipaj jardínpi, cai torrepash ladolla carca jardín punguman cai jatun ñanman apaj carca.

11 Yalishca jipa huaquin runacuna yalinajushpa ricurca Nefi imashna paipaj almata Diosta ninanda mañajujta torrepi; paicuna calparca llactapuracunaman villarca imata paicuna ricushcata, llactapuracuna shamurca ashtaca tandanajushcacuna, yachangapa imashpa shina jatun llaquirina llactapuracunapaj na ali ruraicunamanda.

12 Cunan, imaura Nefi jatarijpi ricurca ashtaca tandanajushcacuna llactapuracunata picuna tandanajushcacuna carca.

13 Yalishca jipa paipaj shimita pascarca nircapash: Riqui, imashpata canguna tandanajushcanguichi? Cangunapaj na ali ruraicunamanda parlachun?

14 Ari, ñuca torreman vitsiashcani ñuca almata Diosman jichangapa, ñuca shungupaj ninan llaquirimanda, cai can cangunapaj na ali ruraicunamanda!

15 Ñuca quijarimanda, huacaimandapash canguna tandanajushcanguichi, manllaringuichi; ari, ashtaca minishtita charinguichi manllarishca canata; ari, manllarishca cana canguichi saquishca cashpa apai tucungapa shina cangunapaj shungucunata aya shinlli charichun.

16 Ari, imashnata saquircanguichi paipaj cunvidaicunata pimi mascajun cangunapaj almacunata urai mana tucurina llaquiriman, na tucurita charij llaquiman?

17 Oh arrepentirichi, arrepentirichi! Imashpata huañungapa munanguichi? Tigrarichi, Apunchij cangunapaj Diosman tigrarichi. Imashpata pai jichurca cangunata?

18 Cai can cangunapaj shungucunata shinlliyachimanda; ari, na uyangapa munanguichi ali michijpaj shimita; ari, paita tangachishcanguichi cangunata fiñachun.

19 Riqui, tandanajungapa randi, imashpapash arrepentirishpalla na, riqui, pai caiman chaiman calpachinga shinashpa alcucunapa, sacha animalcunapa micunaman tigranguichi.

20 Oh, imashnata cungai ushashcanguichi cangunapaj Diosta cangunata cacharichishca punllallata?

21 Ashtahuangari, charijyangapa ruranguichi, runacuna alicachichun, ari, curita, culquitapash charingapa. Cangunapaj shungucunata charijyanacunapi churashcanguichi, cai pachapaj yanga cuzascunapi, imamanda huañuchinguichi, shujpata japinguichi, shuhuanguichi, quiquinpuracuna ama yanga llullata juchachishpa ninguichi, tucui laya na ali ruraicunata.

22 Caimanda llaquicuna shamunga imashpapash arrepentirijpilla na. Mana arrepentirijpica, riqui, cai jatun llacta, tucui chai jatun llactacuna muyundi cajcunapash, imami can ñucanchipaj charishca alpapi, quichushca canga shinashpa nima pushtupash na tianga; riqui, Apunchij na shinllichingachu, imashna cunangaman rurashcashna, cangunapaj napacha na ricunayachijcunata chimbapurachun.

23 Riqui, Apunchijca shina nin: Ñuca shinlli canata na alita rurajcunaman na ricuchishachu, shujman yalita, imashpapash maijan paicunapaj juchacunamanda arrepentirijmanlla, ñuca shimicunata uyajman. Cunan chaimanda, Yuyaipi chasquichun munani, ñuca huauquicuna, cai canga ashtahuan ali Lamanitacunapa cangunapaj randi imashpapash arrepentirijpilla.

24 Riqui, paicuna cangunata ashtahuan yali alicuna can, paicuna na juchata rurashca caimanda cai jatun yachaita imata canguna chasquishpaca contra; chaimanda Apunchij paicunata shungumanda llaquinga; ari, paicunapaj punllacunata mirachinga, paicunapaj cati aillucunatapash mirachinga, imaura canguna tucuilla tucurishca cajpipash imashpapash arrepentirijpilla na.

25 Ari, ay canguna cai jatun millanayaimanda ima cangunapaman shamushca can; cangunamandallata tandanajushcanguichi cai, ari, cai pacalla tandanajuiman imata Gadiantón shayachishca!

26 Ari, ay cangunapaman shamunga jariyai imata cangunapaj shungucunapi yaicuchun saquishcanguichi, ima cangunata vichai alsashca ali cajta yali cangunapaj ninan jatun charijyashcacunamanda!

27 Ari, ay canguna na ali ruraicunamanda, millanayaicunamandapash!

28 Imashpapash arrepentirishpalla na tucuringuichichu; ari, cangunapaj alpacunapash quichushca canga, tucuchishcapash canga cai alpa jahuamanda.

29 Riqui, cunan, ñuca na ninichu cai cuzascunata shina canata, ñucamandalla, cai na canllu ñucamandalla ñuca yachani cai cuzascuna; ashtahuangari riqui, ñuca yachani cai cuzascuna ciertopacha can Apunchij Dios ñucaman yachaj chayachihuashca, chaimanda ñuca testificani shina canga.