1 Cunan yalishca jipa pusaj chunga sujta huatapi, Nefitacuna na ali ruraicunapi catinajurcara, ari, jatun na ali ruraicunapi, shinapi Lamanitacuna ricushpa alichinajurcapacha Diospaj rurachunbacha saquishcacunata, Moiséspaj catichunbacha saquishcacunamanda.

2 Yalishca jipa cai huatapi tiarca Samuel, shuj Lamanita, pimi Zarahemlapaj alpaman shamurca, llactapuracunaman yachachi callarirca. Yalishca jipa pai yachachirca, tauca punllacunata, arrepentimientota llactapuracunaman, paita calpachirca, pai ña paipaj propio alpaman tigragrijurca.

3 Ashtahuangari riqui, Apunchijpaj shimi paipaman shamurca, pai cutin tigrachun, achil villachun llactapuracunaman ima cuzascunata paipaj shunguman shamujta.

4 Yalishca jipa paicuna na saquirca llactaman yaicuchun; chaimanda pai rirca, pircaman vitsiarcapash, paipaj maquita chutarca, shinlli shimihuan caparirca, achil villarca llactapuracunaman ima cuzascunata Apunchij paipaj shungupi churarca.

5 Pai nirca: Riqui, ñuca, Samuel, shuj Lamanita, parlani Apunchijpaj shimicunata imata pai ñuca shungupi churan; riqui pai ñuca shungupi churan nichun cai llactapuracunaman alicaipaj espada cai llactapuracunapa jahuapi shushun; chuscu patsaj huatacuna na yalinga alicaipaj espada cai llactapuracunapaj jahuapi na urmashpa.

6 Ari, jatun tucurina cai llactapuracunata shuyan, cai ciertopacha shamun cai llactapuracunaman, nimapash cai llactapuracunata na quishpichi ushan cai canga ashtahuangari arrepentimientolla, fe Apunchij Jesucristopi, pimi ciertopacha cai pachaman shamunga, yalingapash tucui cuzascunata, huañunga paipaj llactapuracunamanda.

7 Riqui, Apunchijpaj shuj ángel caita villahuashca, ñuca almaman ali mushuj cushijunacunata apamushca. Riqui, ñucata cangunapaman cachamuhuashca caita villachunbash, canguna chasqui ushachun mushuj cushijunacunata; ashtahuangari riqui ñucata na chasquingapa munarcanguichi.

8 Chaimanda, Apunchijca shina nin: Nefitacunapaj llactapuracunapaj shinlli shungucunamanda, imashpapash paicuna arrepentirijpilla ñuca cangunapamanda achil shimita anchuchisha, paicunapamanda ñuca Espírituta llujchisha, paicunahuan ashtahuan na saquisha, ñuca tigrachisha paicunapaj huauquicunapaj shungucunata paicunapaj contra.

9 Chuscu patsaj huatacuna na yalinga nara ñuca paicunata chugrichijpi; ari, ñuca paicunata ricugrisha espadahuan, ninan yarjaihuan, unguihuanbash.

10 Ari, ñuca paicunata ricugrisha ñuca rupajuj fiñaipi, chai chuscu miraicuna tiangara picuna causanga, cangunapaj na ricunayachijcunapacha, ricungapa cangunapaj tucuilla tucurita; cai ciertopacha shamunga imashpapash arrepentirijpilla na, Apunchij nin; chai chuscu miraicuna ricugringa cangunapaj tucurita.

11 Ashtahuangari canguna arrepentirijpi, Apunchij cangunapaj Diospaman tigrajpi ñuca fiñaita anchuchisha, Apunchij nin; ari, Apunchijca shina nin, achilyachishca can maijanguna arrepentirin, ñucapaman tigran, ashtahuangari ay maijan na arrepentirij.

12 Ari, ay cai jatun Zarahemlapaj llacta; riqui, cai can imashpa maijan ali rurajcunamanda cai quishpirishca cajta; ari, ay cai jatun llacta, imashpa ñuca yashpa ricuni, Apunchij nin, tauca tian, ari, cai jatun llactamanda tucuimanda yalishca, shinlliyachin paicunapaj shungucunata ñucapaj contra, Apunchij nin.

13 Ashtahuangari achilyachishca can maijan arrepentirin, paicunata quishpichisha. Ashtahuangari riqui, ali rurajcunamanda na cashpa picuna cai jatun llactapi can, riqui, ñuca urai shamuchiman ninata jahua pachamanda caita tucuchichun.

14 Ashtahuangari riqui, ali rurajcunamanda cai quishpirishca can. Ashtahuangari riqui, punlla shamun, Apunchij nin, imaura cangunapamanda shitanguichi ali rurajcunata, shina ña canguichi tucuchi tucungapa; ari, ay canga cai jatun llactata, na ali ruraicunamanda, millanayaicunamanda imacuna paipi can.

15 Ari, ay Gedeónpaj llactata, na ali ruraicunamanda, millanayaicunamandapash imacuna paipi can.

16 Ari, ay tucui llactacunata maijan muyundipi can, imata Nefitacuna charishca can, na ali ruraicunamanda, millanayaicuna imacuna paicunapi can.

17 Riqui, shuj ninan llaqui shamunga alpa jahuaman, Tucuita Mandaj Apunchij nin, llactapuracunamanda maijan alpapi can, ari, paicunapaj na ali ruraicunamanda, paicunapaj millanayaicunamanda.

18 Yalingapash, Tucuita Mandaj Apunchij nin, ari, ñucanchi jatun, ciertopacha Dios, maijanguna charijyashcacunata alpapi pacan ashtahuan na taringachu, alpapaj jatun llaquimanda, imashpapash pai ali ruraj runa cashpalla caita pacajpi Apunchijpa.

19 Ñuca mandani, Apunchij nin, paicunapaj charijyashcacunata ñucapa pacanga; llaquichishcacuna canga maijan na pacan paicunapaj charijyashcacunata ñucapa; pipash na paicunapaj charijyashcacunata pacan ñucapa ashtahuangari ali ruraipalla; pi na pacan paipaj charijyashcacunata ñucapa, pai llaquichishca can, charijyashcapash, pipash na jatun causachinga alpapaj ninan llaquimanda.

20 Punlla shamunga paicunapaj charijyashcacunata pacanga, paicunapaj shungucunata charijyanacunapi churashca caimanda; paicuna shungucunata charijyanacunapi churashca caimanda, pacanga paicunapaj charijyashcacunata imaura paicunapaj na ricunayachijcunapaj ñaupamanda calpajpi; imashpa paicuna na pacanga ñucapa, llaquichishca canga paicuna, paicunapaj charijyashcacunapash; chai punllapi chugrichishca canga, Apunchij nin.

21 Ricuichi, cai jatun llactapaj llactapuracuna, ñuca shimicunata uyaichi; ari, uyaichi shimicunata imata Apunchij nin; riqui, pai nin llaquichishcacuna canguichi cangunapaj charijyashcacunamanda, cangunapaj charijyashcacunapash llaquichishca can caicunapi cangunapaj shungucunata churashca caimanda, na uyashcanguichi paipaj shimicunata pimanda cangunaman cushca carca.

22 Na yaringuichi Apunchij cangunapaj Diosta cuzascunapi imahuan pai achilyachishca, ashtahuangari punllan punllan yaringuichi cangunapaj charijyashcacunata, ama pagui ningapa Apunchij cangunapaj Diosta caicunamanda; ari, cangunapaj shungucunata na catin Apunchijman, ashtahuangari paicuna punguin jatun jariyaihuan, ninan jariyaicaman, jatun fiñaicuna, envidiacuna, fiñanajuicuna, na alicunata rurachinacuna, na ricunayachishpa catinacuna, huañuchicuna, tucui laya na ali ruraicunapash.

23 Caimanda Apunchij Dios cachamushca shuj ninan llaquita alpaman, cangunapaj charijyashcacunamanbash, cai cangunapaj na ali ruraicunamanda.

24 Ari, ay cai llactapuracuna, cai punllamanda ima chayamushca, canguna achil villachijcunata shitanguichi, paicunata asinguichi, paicunata rumicunahuan macanguichi, paicunata huañuchinguichi, paicunata tucui laya na ali ruraicunata ruranguichi, imashna punda tiempo rurarca shina.

25 Cunan imaura parlashpa, ninguichi: Ñucanchi punllacuna ñucanchi punda taitacunapaj punllacunapi causashca cashpaca, ñucanchi na huañuchinchiman achil villachijcunata; paicunata na rumihuan macanchiman, na calpachinchimanbash.

26 Riqui paicunata yali ashtahuan na alicuna canguichi; imashna Apunchij causan, shuj achil villachij shamujpica cangunapaman, villachinbash Apunchijpaj shimita, ima testifican cangunapaj juchacunamanda, na ali ruraicunamanda, paihuan fiñashca canguichi, calpachinguichi, tucui layata mascanguichi paita tucuchingapa; ari, canguna ninguichi pai can shuj yanga villachij, pai can shuj juchata ruraj, ayapaj, pai testificaimanda cangunapaj rurashcacuna na ali cajta.

27 Ashtahuangari riqui, shuj runa cangunapaman shamujpi ninguichi: Caita rurai, na ali ruraicuna na tianllu; chaita rurai na llaquichishca canguichichu; ari, pai ninga: Purichi cangunapaj propio shungucunapaj jariyaita catishpa; ari, purichi cangunapaj ñavicunapaj jariyaita catishpa, cangunapaj shungucuna munashcata imatapash rurashpa—shuj runa cangunapaman shamujpica caita nijpi, paita chasquinguichi, ninguichi pai can shuj achil villachij.

28 Ari, paita vichai alsanguichi, paiman caranguichi cangunapaj minishtirishcapachamanda; paiman caranguichi cangunapaj curimanda, cangunapaj culquimanda, paiman churachinguichi ninan valishca churajunacunata; cangunaman uyanayai shimicunata parlaimanda, pai nin tucui ali can, shina paipi nima faltata na taringuichi.

29 Oh can na ali, can huagli mirai; can shinlliyashca, can shinlli na cazujpash llactapuracuna, mashnatashi canguna yanguichi Apunchij cangunata aguantanga? Ari, mashnatashi saquinguichi cangunamandallata pushashca cangapa juizu illa, ñausa pushajcunata? Ari, mashnatashi ajllanguichi yanallata michapa randi?

30 Ari, riqui, Apunchijpaj fiñai nina japirishcashna can cangunapaj contra; riqui, pai llaquichishca alpata cangunapaj na ali ruraicunamanda.

31 Riqui, punlla shamunga pai llaquichinga cangunapaj charijyashcacunata, caicuna llambuman tigranga, caicunata na japi ushanguichi; cangunapaj huajcha punllacunapi na chari ushanguichi.

32 Cangunapaj huajcha punllacunapi Apunchijta mañanguichi; yanga canga cangunapaj mañai, imashpa cangunapaj imapash illa cangunapaj jahuapi ña can, canguna tucuchina ciertopacha rurashca can; shina huacanguichi, aullanguichi chai punllapi, nin Tucuita Mandaj Apunchij. Shina llaquiringuichi, ninguichipash:

33 Oh arrepentirimanbash carcani, ama huañuchimanbash carcani achil villachijcunata, paicunata rumihuan ama macaiman carcani, ama calpachinmanbash carcani. Ari, chai punlla ninguichi: Oh yarinchimanbash carcanchi Apunchij ñucanchi Diosta punllapi pai ñucanchiman charijyanacunata carajpi, shina caicuna na llambuman tigranman carca ñucanchi chingachingapa; riqui, ñucanchi charijyashcacuna ñucanchipamanda rishca.

34 Riqui, ñucanchi caipi saquinchi shuj herramientata caya punlla illan; riqui, ñucanchi espadacuna quichushcacuna can imaura ñucanchi macanajungapa mascajpi.

35 Ari, ñucanchi pacashcanchi ñucanchi charijyashcacunata, caicuna ñucanchipamanda llambushca can, alpapaj ninan llaquimanda.

36 Oh arrepentirinchimanbash carca imaura Apunchijpaj shimi ñucanchipaman shamurca; riqui alpaca llaquichishca can, tucui cuzascuna llambuman tigrashca can, ñucanchi na chari ushanchi.

37 Riqui, ñucanchi muyushca canchi ayacunahuan, ari, ñucanchi chaupipi churai tucushca canchi paipaj ángelcunahuan pimi ñucanchi almacunata tucuchingapa munan. Riqui, ñucanchi na ali ruraicuna jatun can. Oh Apunchij, nachu quiquinba fiñaita anchuchi ushangui ñucanchipamanda? Cai canga cangunapaj shimi rimaicuna chai punllacunapi.

38 Ashtahuangari riqui, cangunapaj ruraj na ruraj ricuna punllacuna yalishca can; saquishcanguichi cangunapaj quishpirina punllata imaura mana tucurinapacha chishi can, cangunapaj tucuchina ciertopacha rurashca can; ari, canguna munashcanguichi tucui cangunapaj causana punllacunata na chasqui ushanacunata; munashcanguichi cushijuita na ali ruraicunata rurashpa, ima cuzas contra can ali ruraicunapaj minishtirishcapa imami can ñucanchi jatun, Mana Tucurina Umapi.

39 Oh canguna alpapaj llactapuracuna, uyanguichiman ñuca shimicunata! Ñuca achil mañani Apunchijpaj fiñai cangunapamanda anchurichun, arrepentiringuichi, quishpirishcapash canguichi.