1 Cunan yalishca jipa ricushpa chasquichijcunapaj reinado chuscu chunga quimsa huatapi, Nefipaj llactapuracunapi na randimanda plituri tiarca ashalla jariyailla tiarca maijanguna iglesiapi carca, llactapuracunapi ashalla ninanda fiñarishpa rimarinacuna, caicuna tucurirca chuscu chunga quimsa huata tucuripi.

2 Llactapuracunapi randimanda plituri na tiarca chuscu chunga chuscu huatapi; ashtahuan randimanda plituripash na tiarca chuscu chunga picha huatapi.

3 Yalishca jipa chuscu chunga sujta huatapi, ari, ashtaca randimanda plituri, tauca ninanda fiñarishpa rimarinacunapash tiarca; imapi tiarca ninan jatun Zarahemla llactamanda llujshishpa rinacuna, vichai alpacunaman rirca chasquina alpaman.

4 Paicuna purirca ninan carutapacha, shinashpa llashaj yacucunaman, tauca jatun yacucunaman chayarca.

5 Ari, tucui alpa pushtucunaman caiman chaiman rirca, maijan pushtucunapi jichushca, caspicuna imapash illa na saquishcacunapi, imashpa tauca causajcuna punda cai alpata chasquishca carca.

6 Cunan maijan pushtupash na jichushca carca, yuracuna illaimandalla; ashtahuangari llactapuracunapaj jatunbacha tucuchishcamanda picuna punda cai alpapi causashcamanda shutichirca imapash illaj.

7 Na tiarca ashtahuangari ashalla yuracuna cai alpa jahuapi, shina cajpipash llactapuracuna chaiman rishcacuna ninan yachashcaman tigrarca cementohuan trabajaipi; chaimanda cemento huasicunata rurarca, maipi paicuna causarca.

8 Yalishca jipa aillucuna mirarirca, caiman chaiman rircapash, urai alpacunamanda vichai alpacunaman rirca, caiman chaiman rishpa tucui alpacuna jundai callarirca, urai jatun mama cochamanda vichai jatun mama cochacaman, indi huashajuj lado jatun mama cochamanda indi llujshij lado jatun mama cochacaman.

9 Llactapuracuna vichai alpacunapi cajcuna facha huasicunapi causarca, cemento huasicunapipash, viñachun saquirca ima yuracuna alpaman llujshimujta, shuj punlla caspicunata charingapa paicunapaj huasicunata rurangapa, ari, paicunapaj llactacunata, paicunapaj achil huasicunatapash, paicunapaj tandanajuna huasicunatapash, paicunapaj achil pushtucunatapash, tucui laya jatun huasicunatapash.

10 Yalishca jipa caspicuna vichai alpacunapi ashallapacha cajpi, ashtacata barcocunapi cacharca.

11 Shina vichaipi llactapuracunaman minishtishcata curca tauca llactacunata rurachun, caspihuan, cementohuanbash.

12 Yalishca jipa taucacuna carca Ammónpaj llactapuracuna, maijanguna nacimanda Lamanitacuna carca, cai alpaman rircapash.

13 Cunan tiarca tauca tandachishpa quilcashcacunata alichishca cai llactapuracunamanda, paicuna rurashcacuna, imacuna can paicunapalla taucacunapachapash, paicunamanda.

14 Ashtahuangari riqui, cai llactapuracunamanda patsajmanda shujpash cai quilcashcapi na churaita ushanachu, ari, Lamanitacunapaj tandachishpa quilcashcacuna, Nefitacunapaj, paicunapaj macanajuicuna, fiñanajuicuna, ninanda fiñarishpa rimarinacuna, paicunapaj yachachicunapash, paicunapaj achil villachicuna, paicunapaj yacupi rishcacuna, paicunapaj barcocunata rurashcacuna, paicunapaj achil huasicunata rurashcacuna, tandanajuna huasicunata, paicunapaj achil pushtucunatapash, paicunapaj ali ruraicunata, paicunapaj na ali ruraicunata, paicunapaj huañuchicunata, paicunapaj shuhuaicunata, shujpata japicunatapash, tucui laya millanayaicuna fornicacióncunapash, cai rurashcacunapi na caita ushan.

15 Ashtahuangari riqui, tauca quilcashcacuna tian, tucui laya tauca tandachishpa quilcashcacunapash, Nefitacuna casi gulpita alichishca.

16 Nefitacuna shuj miraimanda cutishujman maquin maquin yalichishca, imaura paicuna na alita ruraipi urmangacaman, huañuchi tucungacaman, shuhuashca, mascashpa catishca, calpachishca, huañuchishca, alpa jahuallaman shitashca, Lamanitacunahuan chapushca imaura ashtahuan ñana Nefitacuna shutichishca carca, na ali rurajcunaman tigrarca, sacha runacuna, imamandapash millajcuna, ari, Lamanitacunaman tigrangacaman.

17 Cunan ñuca cutin tigrani ñucapaj tandachishpa quilcashcaman; chaimanda, imata ñuca parlashca yalirca jatun randimanda plituricuna, fiñanajuicuna, macanajuicuna, ninanda fiñarishpa rimarinacunapash Nefipaj llactapuracunapi.

18 Ricushpa chasquichijcunapaj reinado chuscu chunga sujta huata tucurirca;

19 Yalishca jipa alpapi jatun randimanda plituri tiarcara, ari, chuscu chunga canchis huatapipash, chuscu chunga pusaj huatapipash.

20 Shina cajpipash Helamán ricushpa chasquichina jatun tiarinata japirca alicaihuan, pacta caihuanbash; ari, pai pactachingapa atirirca catichunbacha saquishcacunata, ricushpa chasquichinacunatapash, Diospaj rurachunbacha saquishcacunatapash; imami Diospaj ricuipi ali cajta rurarca punllan punllan; paipaj taitapaj ñanda catishpa purirca, shinashpa pambapi ali mirarca.

21 Yalishca jipa pai charirca ishcai churicunata. Rucu churiman Nefi nishpa shutichirca, jipa churita Lehi nishpa shutichirca. Apunchijpaj viñai callarirca.

22 Yalishca jipa macanajuicuna, fiñanajuicuna tucuri callarirca, asha ashalla, Nefitacunapaj llactapuracunapi, ricushpa chasquichijcunapaj reinado chuscu chunga pusaj huata tucurinapi Nefipaj llactapuracuna jahuapi.

23 Yalishca jipa ricushpa chasquichijcunapaj reinado chuscu chunga iscun huatapi, alpapi sumaj causai catilla churashca carca, tucui pacalla tandanajunacunalla na, imami Gadiantón shuhua ashtahuan tiaj alpa pushtucunata tiarichishca carca, chai punllacuna caita na yacharca gobiernopaj umapi cajcuna; chaimanda alpamanda na tucuchishca carca.

24 Yalishca jipa cai huatapillata iglesiapi jatun ninan mirai tiarca, shinashpa huarangacuna paicunamandallata iglesiaman tandanajurca bautizarirca arrepentimientopa.

25 Shina iglesiapaj jatun mirai carca, shina tauca achil yachishcacunata llactapuracunapa jahuapi jicharca, sumo sacerdotecunapash, yachachijcunapash ninanda manllarca.

26 Yalishca jipa Apunchijpaj ruraicuna mirarca bautizashpa Diospaj iglesiaman tandachishpa, tauca almacunata, ari, chunga huaranga huarangacuna.

27 Shina ricunchi Apunchij shungumanda llaquij can tucui shunguhuan, paipaj achil shutita mañangapa munajcunata.

28 Ari, shina ricunchi tucuipa jahua pachapaj pungu pascashca can, maijan Jesucristopaj, pimi Diospaj Churi can paipaj shutipi cringapa munajcunaman.

29 Ari, ricunchi maijan Diospaj shimipi chariringapa munan, ima causa can, ushaihuanbash, chaupipi chaupinga tucui na alipa yachaicunata, tujllacunapash, ayapaj umachinacunatapash, Cristopaj runacunata pushanga derecho, quichiji ñanda jatun llaqui huaicuta imami preparashca can na ali rurajcunata langachun—

30 Paicunapaj almacunata churanga, ari, paicunapaj na huañuna almacuna, Diospaj ali ladoman jahua pachapaj reinopi, tiaringapa Abrahamhuan, Isaac-huan, Jacobhuan, tucui ñucanchi achil taitacunahuan, ashtahuan ñana llujshingapa.

31 Cai huatapi Zarahemla alpapi cushijui catirca, tucui muyundi llactacunapipash, tucui alpacunapi maipi Nefitacuna causanajurca.

32 Yalishca jipa tiarca sumaj causai ninan jatun cushijui chuscu chunga iscun huata puchupi; ari, sumaj causai, jatun cushijuipash catirca; ricushpa chasquichijcunapaj reinado picha chunga huatapi.

33 Ricushpa chasquichijcunapaj reinado picha chunga shuj huatapi sumaj causai catirca, jariyaimandalla imami iglesiaman yaicui callarirca—na Diospaj iglesiaman, ashtahuangari llactapuracunapaj shungucunaman maijanguna Diospaj iglesiaman tandanajunchi nijcunaman—

34 Paicuna jariyaipi vichai alsarirca, paicunapaj tauca huauquicunata na ricunayachishpa catingacaman. Cunan cai carca jatun na ali, imami ashtaca humilde llactapuracuna jatun na ricunayachishca cati tucurca, ashtaca llaquitapash yalirca.

35 Shina cajpipash paicuna ayunarca, catilla achil mañarca, shinllicunaman tigrarca ashtahuan shinlli paicunapaj humildadpi, maimanbash na tigraj Cristopaj fepi shinllicuna, paicunapaj almacunapi cushijuihuan, ali canatapash jundachingapa, ari, jucha illa cangacaman, paicunapaj shungucunata achilyachingacaman, imami achilyachina shamurca Diosman paicunapaj shungucunata saquimanda.

36 Yalishca jipa sumaj causaipi picha chunga ishcai huatapash tucurirca, ninan jatun jariyailla imami llactapuracunapaj shungucunaman yaicushca carca; cai carca paicunapaj ninan jatun charijyaimanda, paicunapaj alpapi ali miraimanda; punllan punllan cai paicunapi mirarca.

37 Yalishca jipa ricushpa chasquichijcunapaj reinado picha chunga quimsa huatapi, Helamán huañurca, paipaj pushtupi paipaj rucu churi Nefi mandai callarirca. Yalishca jipa ricushpa chasquichina jatun tiarinata japirca alicaihuan, pacta caihuanbash; ari, Diospaj rurachunbacha saquishcacunata alichirca, paipaj taitapaj ñangunata purirca.