1 Yalishca jipa cai huatallapita, riqui, Nefi shuj runaman ricushpa chasquichina jatun tiarinata curca, paipaj shuti carca Cezóram.

2 Imashna paicunapaj catichunbacha saquishcacuna, paicunapaj mandajcunapash churashca carca llactapuracunapaj shimihuan, paicuna maijan na alita ajllaj alita ajllajcuna ashtahuan yalicuna carca, chaimanda paicuna fucunajurca tucuchishca cangapa, imashpa catichunbacha saquishcacunapash huagliman tigrashca carca.

3 Ari, cai na tucuilla carca; paicuna na cazuj llactapuracuna carca, shinashpa paicuna na mandaj cai usharca catichunbacha saquishcacunahuan nacashpa alicaihuan, ashtahuangari paicunapaj tucuchinapa.

4 Yalishca jipa Nefi paicunapaj na ali ruraicunamanda llaquiyarca; ricushpa chasquichina jatun tiarinata saquirca, Diospaj achil shimita yachachishpa catirca paipaj punllacuna tucuringacaman, paipaj huauqui Lehipash, paipaj punllacuna tucuringacaman;

5 Paicuna yarirca shimicunata imata paicunapaj taita Helamán parlashcata. Caicuna can imata parlashca shimicuna:

6 Riqui, ñuca churicuna, ñuca munani canguna yarichun Diospaj rurachunbacha saquishcacunata alichichun; ñuca munaiman llactapuracunaman cai shimicunata villachun. Riqui, ñuca cangunata shutichishcani ñucanchi callari taitacunapaj shuticunata picuna Jerusalénpaj alpamanda shamurca; caita ñuca rurashcani imaura cangunapaj shuticunata yarishpa paicunatapash yarichun; paicunata yarishpa paicunapaj rurashcacunata yaringuichi; imaura canguna yaringuichi paicunapaj rurashcacunata yachanguichi imashpa caita nin, quilcarinbash, paicuna alicuna cashcata.

7 Chaimanda, ñuca churicuna, ñuca munani canguna rurachun ima ali cajta, nichun, quilcachunbash, imashna paicunamanda nin, quilcarishcapash.

8 Cunan ñuca churicuna, riqui ñuca ashtahuan imatachari cangunamanda munani, cai munai can, cai cuzascunata ama ruranguichichu cangunamanda jariyangapa, ashtahuangari cai cuzascunata ruraichi jahua pachapi charijyangapa, ari, cai mana tucurina can, na yacuyanbash; ari, chari ushanguichi chai juyailla carashcata mana tucurina causaita, imamanda ñucanchi charinchi yuyangapa, ñucanchi taitacunaman carashca can.

9 Oh yarichi, yarichi, ñuca churicuna, shimicunata imata jatun mandaj Benjamín paipaj llactapuracunaman parlarca; ari, yarichi na cutishuj ñan tianllu nacashpa shuj laya maita runacuna quishpishca caita ushanllu, Jesucristopaj shujpa juchacunamanda huañui yahuarmandalla, pimi shamunga; ari, yarichi pai cai pachata quishpichingapa shamunga.

10 Yarichipash shimicunata imata Amulek Zeezromman parlarca, Ammoníah llactapi; pai nirca Apunchijca ciertopacha paipaj llactapuracunata jatun causachingapa shamunga, ashtahuangari pai na shamungachu jatun causachingapa paicunata paicunapaj juchacunapi, ashtahuangari jatun causachinga paicunata paicunapaj juchacunamanda.

11 Pai ushaita chasquirca paipaj Taitamanda paicunata quishpichingapa paicunapaj juchacunamanda arrepentirimanda; chaimanda pai cachamushca paipaj ángelcunata villachun mushujcunata arrepentimientopaj canacunamanda, imami pushan Jatun Causachijpaj ushaiman, paicunapaj almacunapaj quishpirinaman.

12 Cunan, ñuca churicuna, yarichi, yarichi cai can ñucanchi Jatun Causachijpaj rumi jahuapi, pimi Cristo can, Diospaj Churi, maipi cangunapaj shayachinacuna churana canguichi; imaura aya cachamujpi paipaj usharishca huairacunata, ari, paipaj dardocunata acapanapi, ari, imaura tucui paipaj runducuna, paipaj ushashca huairahuan tamia cangunapa jahuapi huajtajpipash, cai na ushaita charinga cangunata aisangapa paipaj manllanayai ucu ucuman na tucurita charij llaquiman, rumi imapi canguna shayachishcamanda, imami can shuj shinllipi shayachina, shayachina maipi runacuna shayachishpaca na urmai ushan.

13 Yalishca jipa cai shimicunata Helamán paipaj churicunaman yachachirca; ari, paicunaman tauca cuzascunata yachachirca caicuna na quilcashca can, tauca cuzascunapash quilcashca can.

14 Paicuna yarirca paipaj shimicunata; chaimanda paicuna rirca, alichishpa Diospaj rurachunbacha saquishcacunata, yachachingapa Diospaj achil shimita tucui Nefipaj llactapuracunaman, Ashtacapacha Tiaj llactapi callarishpa;

15 Chaimanda Gid llactaman; Gid llactamanda Mulek llactaman;

16 Shuj llactamanda cutishuj llactaman, imaura paicuna Nefipaj tucui llactapuracunapaman ringacaman cai carca urai alpapi; chaimanda Zarahemla alpacaman, Lamanitacunapaman.

17 Yalishca jipa paicuna yachachirca jatun ushaihuan, shinashpa tauca chaupirishcacunata pandachirca maijanguna Nefitacunapamanda rirca, shinashpa ñaupaman rishpa paicunapaj juchacunata villarca bautizai tucurca arrepentimientopa, Nefitacunapaman ñapash tigrarca pandaicunata imata rurashca cashpa alichingapa munashpa.

18 Yalishca jipa Nefi, Lehipash Lamanitacunaman yachachirca shina jatun ushaihuan, autoridadhuanbash, paicunaman cushca carca ushaita, autoridadtapash parlai ushachun, ima ninatapash paicuna parlachun cushca carca—

19 Chaimanda paicuna parlarca Lamanitacuna ninanda manllarijta, paicunaman crichingapa, shinashpa pusaj huaranga Lamanitacuna tiarca Zarahemla alpapi muyundi alpacunapipash bautizarishca arrepentimientopa, crircapash paicunapaj punda taitacunapaj na ali yachachishcacunata.

20 Yalishca jipa Nefi, Lehipash catirca chaimanda Nefipaj alpaman rirca.

21 Yalishca jipa japi tucurca Lamanitacunapaj macanajuj runacunahuan, cárcelman shitai tucurcapash; ari, chai cárcelmanllata maipi Ammón paipaj huauquicunahuan shitai tucurca Limhipaj sirvij runacunahuan.

22 Cárcelpi tauca punllacunata shitai tucushca cashpa micuna illa, riqui cárcelman yaicumurca paicuna llujchingapa huañuchingapa munashpa.

23 Yalishca jipa Nefi, Lehipash pillui tucushca carca ninahuan laya, shinashpa manllarca paicunapaj maquicunata churangapa paicunapa jahuapi rupana manllaimanda. Shina cajpipash, Nefi, Lehipash na ruparca; chaupi ninapi shayanajurca na ruparcapash.

24 Imaura ricushpa paicuna pillushca cashcata nina pilarhuan, paicunata na rupachijtapash, paicunapaj shungucuna na manllaita japirca.

25 Ricurca Lamanitacuna paicunapaj maquicunata churangapa manllajta; manllarcapash paicunapaman quimirinata, ashtahuangari shayanajurca manllarimanda upacunashna.

26 Yalishca jipa Nefi, Lehipash ñaupaman rirca paicunaman parlai callarirca, nishpa: Ama manllaichi, riqui, Dios can pimi cangunaman cai juyailla cuzasta ricuchishca, imapi cangunaman ricuchishca can, cangunapaj maquicunata na churai ushanguichichu ñucanchita huañuchingapa.

27 Riqui, imaura paicuna cai shimicunata nijpi, alpa mama ninanda chujchurca, cárcel pircacunapash cuyurca caicuna alpaman urmagrinajuj laya; ashtahuangari riqui, na urmarca. Riqui, maijan cárcelpi cajcuna Lamanitacuna, Nefitacuna carca picuna rishca carca.

28 Yalishca jipa paicuna quilpai tucushca carca yana yanapaj fuyuhuan, ninan jatun manllanayai manllai paicunapaman shamurca.

29 Yalishca jipa shuj shimi shamurca yana yana fuyu jahuamanda shamuj laya, nishpa: Arrepentirichi, arrepentirichi, ñuca sirvij runacunata ashtahuan ama tucuchingapa munaichichu picunata ñuca cangunaman cachamurcani ali mushujcunata villachun.

30 Yalishca jipa imaura cai shimita uyashpa, riqui cai na shinlli shimi carca, jatun bulla shimipash na carca, ashtahuangari riqui, cai carca alipacha alilla shimi, rinripilla parlan laya, almamanbacha yaicun laya—

31 Masqui alilla shimi cashpapash, riqui alpa mama ninanda chujchurca, cárcelpaj pircacuna cutin cuyurirca, alpaman urmagrin laya; riqui yana yanapaj fuyu, ima paicuna quilpashca carca, na anchurirca—

32 Riqui shimi cutin shamurca, nishpa: Arrepentirichi, arrepentirichi, jahua pachapaj reino ñami caipi; ñuca sirvij runacunata tucuchingapa ashtahuan ama munaichichu. Yalishca jipa alpa mama cutin chujchurca, pircacunapash cuyurirca.

33 Cutinbash quimsa viaje shimi shamurca, juyailla shimicunata paicunaman parlarca imata runa na nita ushan; pircacuna cutin cuyurca, alpa mama cutin chujchurca ña chaupirigrijuj laya.

34 Yalishca jipa Lamanitacuna na calpai usharca yana yanapaj fuyumanda ima paicunata quilparca; ari, na cuyuri ushashcacuna carca manllaimanda ima paicunapaman shamurca.

35 Cunan paicunapaj chaupipi tiarca shuj Nefita nacirishcamanda, pimi Diospaj iglesiaman shuj viaje tandanajurca ashtahuangari paicunamanda chaupirirca.

36 Yalishca jipa tigrarirca, riqui, pai ricurca yana yanapaj fuyu yalishpa Nefipaj, Lehipaj ñavicunata; riqui, paicuna ninan punchapamba carca, ángelcunapaj ñavicunashna: Pai ricurca paicunapaj ñavicunata jahua pachaman churashcata; parlanajun nacashpa paicunapaj shimicunata vichai cachanajun laya carca paicuna ricushca causajujman.

37 Yalishca jipa cai runa ashtacapacha tandanajushcacunaman yachachirca, paicunapash tigrarishpa, ricuchun. Riqui, paicunaman ushaita cushca carca tigrarichun, ricuchun; paicunapash Nefipaj, Lehipaj ñavicunata ricurca.

38 Runaman nirca: Riqui, imata canga tucui cai cuzascuna, pihuanda cai runacuna parlanajun?

39 Cunan cai runapaj shuti carca Aminadab. Aminadab nirca: Paicuna Diospaj ángelcunahuan parlanajun.

40 Yalishca jipa Lamanitacuna nirca: Imata rurana canchi, cai yana yanapaj fuyu ñucanchita quilpashcamanda anchurichu?

41 Aminadab nirca: Arrepentirinapacha canguichi shimi nijta mañana canguichi, imaura Cristopi feta charingacaman, pimanda Alma cangunaman yachachirca, Amulekpash, Zeezrompash; imaura cai rurajpi, yana yanapaj fuyu cangunata quilpashcamanda anchuringa.

42 Yalishca jipa tucuilla mañai callarirca chai shimita pimi alpa mamata chujchuchirca; ari, paicuna mañarca imaura yana yanapaj fuyu anchuringacaman.

43 Yalishca jipa muyundi ricujpi, ricurca paicunata quilpashca yana yanapaj fuyu anchurishca carca, riqui, paicuna ricurca paicuna pillushca cajta, ari shujllangaman almacuna, nina pilarhuan.

44 Nefi, Lehipash paicunapaj chaupipi carca; ari, paicuna rupajuj nina chaupipishna carca, cai na chugrichirca, cárcelpaj pircacunatapash na japichirca; paicuna cushijuihuan junda carca imami na parlai ushai can, cushijuipash junda.

45 Riqui, Diospaj Achil Espíritu jahua pachamanda shamurca, paicunapaj shungucunaman yaicurca, junda carca ninahuan laya, paicuna parlai usharca juyailla shimicunata.

46 Yalishca jipa shuj shimi paicunapaman shamurca, ari, sumaj shimi, rinripilla parlan laya, nishpa:

47 Sumaj causai, sumaj causai cangunapi cachun, cangunapaj femanda ñuca Ali Juyashcapi, pimi carca cai pachata rurashcamanda.

48 Cunan, paicuna caita uyashpa paicunapaj ñavicunahuan ricurca maimanda shimita shamujta; riqui, paicuna jahua pacha pascarijta ricurca; ángelcunapash urai shamurca jahua pachamanda paicunata achil yachachircapash.

49 Tiarca quimsa huaranga almacuna picuna ricurca, uyarcapash cai cuzascunata; richun mandarca ama manllarichun, ama dudachunbash.

50 Yalishca jipa paicuna rirca, llactapuracunaman achil yachachircapash, villashpa tucui muyundi llactacunaman tucui cuzascunata imata paicuna uyashcata, ricushcacunatapash, shinashpa tucuimanda yalishca Lamanitacuna paicunamanda crirca, jatunbacha caicunamanda imata paicuna chasquishcata.

51 Shina tauca crishcacuna paicunapaj macanajunacunata saquirca, napacha ricunayachinacunatapash, paicunapaj punda taitacunapaj yachachishcacunatapash.

52 Yalishca jipa Nefitacunaman tigrachirca paicunapaj charishca alpacunata.