1 Yalishca jipa ricushpa chasquichijcunapaj reinado sujta chunga ishcai huata tucurijpi, tucui cai cuzascuna yalishca carca, Lamanitacuna tigrashca carca, tucuimanda yalishca paicunamanda, shuj ali ruraj llactapuracunaman, shinashpa paicunapaj rectitud Nefitacunapata yali carca, paicunapaj shinlli caimanda, fehuan catinajuimanda.

2 Riqui, tiarca tauca Nefitacuna maijanguna shinllicunaman tigrarca, na arrepentirijcuna, ninan na alita rurajcuna, shinashpa paicuna Diospaj achil shimita na cazurca, tucui yachachishcacunata, tucui achil villachinacuna paicunapaman shamujtapash.

3 Shina cajpipash, iglesiamanda llactapuracuna jatun cushijuita charirca Lamanitacunapaj crijman tigrashcamanda, ari, Diospaj iglesiamanda, imata paicunapapi shayachishca carca. Paicuna caishuhuan chaishuhuan catijpuracuna tandanajurca, caishuhuan chaishuhuan cushijurca, jatun cushijuita charirca.

4 Yalishca jipa tauca Lamanitacuna Zarahemla alpaman urai shamurca, yachachircapash Nefitacunapaj llactapuracunaman imashna paicunapaj crijman tigrashca cashcata, femanda, arrepentimientomandapash cutin yarichirca.

5 Ari, taucacuna ninan jatun ushaihuan, autoridadhuanbash yachachirca, paicunapamanda taucacunata apamushpa jatun humildadman, Diospaj, Llamagupa humilde catijcuna cachun.

6 Yalishca jipa tauca Lamanitacuna vichai alpacunaman rirca; Nefipash, Lehipash vichai alpacunaman rirca, llactapuracunaman yachachingapa. Shina sujta chunga quimsa huata tucurirca.

7 Riqui, sumaj causai tucui alpacunapi tiarca, shinashpa Nefitacuna maijan alpa pushtu munashcaman rirca, Nefitacunapaman, Lamanitacunapamanbash.

8 Yalishca jipa Lamanitacunapash maiman munashcaman rirca, Lamanitacunapaman, Nefitacunapamanbash; shina libre jatuicunata charirca randimanda, randina, jatuna, charijyangapa, paicunapaj munashca.

9 Yalishca jipa ninan charijcunaman tigrarca, ishcandi Lamanitacuna, Nefitacunapash; ninandapacha charirca curi, culqui, tucui laya juyailla jirrucunata, urai alpapipash, vichai alpapipash.

10 Cunan urai alpa shutichishca carca Lehi, vichai alpa shutichishca carca Mulek, Sedequíaspaj churimanda; imashpa Apunchij apamurca Mulekta vichai alpacunaman, Lehita urai alpacunaman.

11 Riqui, tucui laya curicuna ishcandi cai alpacunapi tiarca, culquicunapash, tucui laya juyailla mineralcuna; ali yachaj runacunapash tiarca, maijanguna tucui laya mineralcunata trabajarca, caita refinarcapash; shina charijcunaman tigrarca.

12 Ashtacatapacha murucunata tarpurca, ishcandi vichaipi, uraipipash; caicuna ninanda fucurca ishcandi vichaipipash, uraipipash. Huahuacuna mirarca, cai alpapi ninan shinllicuna carca. Viñachirca tauca ataju llamacunata, huagracunatapash, ari, tauca vira animalcunata.

13 Riqui, paicunapaj huarmicuna trabajarca, pucharcapash, tucui laya finducunata rurarca, finota ahuashca linohuan, tucui laya churajunacunata, paicunapaj churajuna illata quilpangapa. Shina sujta chunga chuscu huata yalirca sumaj causaihuan.

14 Sujta chunga picha huatapi charircapash jatun cushijuita, sumaj causaitapash, ari, ashtaca yachachishcacunata, tauca achil villachishcacunatapash pi shamunamanda. Shina sujta chunga picha huata yalirca.

15 Yalishca jipa ricushpa chasquichijcunapaj reinado sujta chunga sujta huatapi, riqui, Cezóram huañuchi tucurca na rijsishca maquihuan ricushpa chasquichina jatun tiarinapi tiajujpi. Yalishca jipa chai huatallata, paipaj churipash, paipaj pushtupa llactapuracuna ajllai tucushca carca, paipash huañuchitucushca carca. Shina sujta chunga sujta huata tucurirca.

16 Sujta chunga canchis huata callaripi llactapuracuna ninan na alita ruraicunapi cutin mirai callarirca.

17 Riqui, Apunchij paicunata achilyachishca carca ashtaca punllacunata cai pachapaj charijyaicunahuan shinamanda paicuna na tangai shina carca fiñaiman, macanajuicunaman, yahuarta jichanaman; chaimanda paicunapaj shungucunata charijyanacunapi churai callarirca; ari, mishashpa charijyanata mascai callarirca shujmanda cutishujta ashtahuan yalishca cangapa; chaimanda pacalla huañuchicunata rurai callarirca, shuhuana, shujpata japina, charijyangapa.

18 Cunan riqui, chai huañuchijcuna, shujpata japijnacuna carca tandanajushcacuna picunata Kishkumen, Gadiantónpash callarichishca carca. Cunan yalishca jipa taucacuna tiarca, Nefitacunapapi, Gadiantónpaj tandanajushcacuna. Ashtahuangari riqui, ashtahuan taucapacha carca na alita ruraj Lamanitacunamanda. Paicuna shutichishca carca Gadiantónpaj shuhuacuna, huañuchijcuna.

19 Cai carca pimi huañuchirca ricushpa chasquichijcunapaj yali mandaj Cezóramda, paipaj churi, jatun tiarinapi cajpi; riqui, paicuna na tupai tucurca.

20 Cunan yalishca jipa Lamanitacuna paipuracunapi shuhuacuna tiajta yachashpa ninanda llaquirirca; paicunapaj ushaipi ima layata rurarca tucuchingapa paicunata alpa jahuamanda.

21 Ashtahuangari riqui, Satanás tucuimanda yalishca Nefitacunapaj shungucunata tangarca, shinashpa paicuna tandanajurca chai shuhua tandanajushcacunaman, paicunapaj pactachicunata rurarca, juramentocunatapash, huacaichiringapa, caishu chaishu alchishpa charingapa ima llaquicunapi cashpapash maipi cashpapash, ama llaquichichun paicunapaj huañuchicunamanda, shuhuaicunamanda, shujcunapata japinacunamandapash.

22 Yalishca jipa paicuna charirca señalcunata, ari, paicunapaj pacalla señalcunata, pacalla shimicunatapash; cai carca rijsingapa shuj huauqui pimi pactachinata rurajta, ima na alita rurajpipash paipaj huauqui ama chugrichishca cachun paipaj huauquihuan, maijanguna paipaj tandanajushcata catij, pimi cai pactachinata rurashca can.

23 Shina usharian huañuchita, shujpata japina, shuhuana fornicacióncunata tucui laya na ali ruraicunatapash, paicunapaj llactapaj catichunbacha saquishcacunapaj contra, paicunapaj Diospaj catichunbacha saquishcacunatapash contra.

24 Maijanbash chai tandanajushcamanda cajcuna runacunaman villajpi paicunapaj na ali ruraicunata, paicunapaj millanayaicunata, ricushpa chasquichi tucushca cana carca, na llactapaj catichunbacha saquishcacunahuan, ashtahuangari paicunapaj na ali ruraicunapaj catichunbacha saquishcacunahuan, imata cushca carca Gadiantón, Kishkumenbash.

25 Cunan riqui, cai pacalla juramentocuna, pactachinacuna imata Alma paipaj churita mandarca runacunapaman nimaurapash ama villachun, cai ama shuj laya cachun llactapuracunata tucuchingapa apana.

26 Cunan riqui, chai pacalla juramentocuna, pactachicuna Gadiantónpaman na chayamurcachu tandachishca quilcashcacunamanda imata Helamánman cushca carca; ashtahuangari riqui, churarca Gadiantónpaj shungupi paillata pimi munachirca ñucanchi callari taitacunata na saquishca fucushcata micuchun—

27 Ari, paillata pimi pacalla planda rurarca Caínhuan, paipaj huauqui Abelta huañuchijpica pipash na yachachun. Pai pacalla planda rurarca Caínhuan paipaj catijcunahuanbash chaimandapacha.

28 Paillata can pimi llactapuracunapaj shungucunapi churarca ninan jatun torreta shayachichun jahua pachaman chayachun. Cai carca paillata pimi umarca llactapuracunata maijan cai chai torremanda cai alpaman shamushcacunata; pimi caiman chaiman jichan yanallapaj ruranacunata, millanayaicunatapash tucui alpa jahuacunapi, imaura pai llactapuracunata tucuilla tucuchinaman aisangacaman, mana tucurina ucu pachaman.

29 Ari, cai paillata can pimi Gadiantónpaj shungucunapi churarca catichun yallapaj ruranacunata, pacalla huañuchitapash; pai apamushca cai pacha callarimanda cai punllacunacaman.

30 Riqui, pai can pimi tucui juchacunata rurachij. Riqui, catichinra paipaj yanallapaj ruranacunata, pacalla huañuchina, paicunapaj plangunata yalichin maquin maquin, paicunapaj juramentocuna, paicunapaj pactachicuna, paicunapaj manllanayai na ali ruraicunapaj planguna, shuj miraimanda cutishuj miraiman imashna runacunapaj huahuacunapaj shungucunata mishai ushashcapi.

31 Cunan riqui, Nefitacunapaj shungucunata ninanda mishashca carca; ari, shinashpa ninan na alicunaman tigrarca; ari, tucuimanda yalishca ali rurana ñanmanda anchurishca carca, Diospaj rurachunbacha saquishcacunata paicunapaj chaquicunahuan sarurca, paicunapaj propio ñangunaman tigrarca, paicunapaj yanga dioscunata rurarca paicunapaj curihuan, paicunapaj culquihuan.

32 Yalishca jipa tucui cai na ali ruraicuna shamurca na tauca huatacunapi, shinashpa tucuimanda yalishca shamurca, ricushpa chasquichijcunapaj reinado sujta chunga canchis huatacunapi Nefipaj llactapuracunapa jahuapi.

33 Paicunapaj na ali ruraicunapi mirarca sujta chunga pusaj huatacunapipash, ali rurajcunapaj jatun llaquiripa, quijaripapash.

34 Shina ñucanchi ricunchi Nefitacuna na crishpa asha asha chingari callarirca, na ali ruraicunapi mirashpa, millanayaicunapipash, Lamanitacuna ninanda mirai callarirca paicunapaj Diospaj yachanacunapi; ari, paipaj catinacunata, rurachunbacha saquishcacunatapash alichi callarirca, ciertopachapi purirca, ali ruranapipash paipaj ñaupapi.

35 Shina ñucanchi ricunchi Apunchijpaj Espíritu Nefitacunapamanda llujshi callarin, na ali ruraicunamanda, paicunapaj shungucunapaj shinlliyaimandapash.

36 Shina ñucanchi ricunchi Apunchij paipaj Espírituta Lamanitacunapa jahuapi jichai callarin, quimirina yaimanda, ruranayachimandapash paipaj shimicunapi crishpa.

37 Yalishca jipa Lamanitacuna Gadiantónpaj shuhuacunapaj tandanajushcacuna mascashpa catirca; yachachirca Diospaj achil shimita ashtahuan na alicunaman, shinashpa cai tandanajushcapaj shuhuacuna tucuilla tucuchishca carca Lamanitacunapi.

38 Yalishca jipa shuj ladoman, Nefitacuna tandanajurca, shinllichircapash, ashtahuan na alicunamanda callarishpa, imaura Nefitacunapaj tucui alpacunaman jicharingacaman, pandachishcarcapash tucuimanda yalishca alicunata imaura paicunapaj ruraicunata crishpa catingacaman paicunapaj plangunapi cangacaman, paicuna pacalla huañuchinacunapi, tandanajuicunapi paicunahuan tandanajuchun.

39 Shina gobiernopaj shujlla mandanata japirca, shinashpa paipaj chaquicunahuan sarurca, huajtarca, macarca paicunapaj huashacunata tigrachirca huajchacunata, manso, humilde Diosta catijcunatapash.

40 Shina ñucanchi ricunchi paicuna manllanayai canapi carca, fucushpa mana tucurina tucuchinaman.

41 Yalishca jipa shina ricushpa chasquichijcunapaj reinado sujta chunga pusaj huata tucurirca Nefipaj llactapuracunapa jahuapi.