1 Manje kwenteka kutsi ngemnyaka wemashumi lasikhombisa nakubili wekubusa kwebehluleli imibango yakhula, kangangekutsi kwaba khona timphi kulo lonkhe live emkhatsini wabo bonkhe bantfu baNefi.

2 Futsi bekungulelicembu leliyimfihlo letigebengu lelachubeka nalomsebenti wembubhiso kanye nenkhohlakalo. Lemphi yachubeka wonkhe lowo mnyaka; yaphindze yachubeka nangemnyaka wemashumi lasikhombisa nakutsatfu.

3 Futsi kwenteka kutsi ngalomnyaka Nefi wakhala eNkhosini, watsi:

4 Awu Nkhosi, ungavumi kutsi labantfu babulawe ngenkemba; kodvwa Awu Nkhosi, esikhundleni saloku yenta kube khona indlala eveni, kute ibaphehlele ekukhumbuleni iNkhosi Nkulunkulu wabo, mhlawumbe batawuphendvuka baphindze babuyele kuwe.

5 Futsi loko kwenteka, njengekwemavi aNefi. Kwaba khona indlala lenkhulu eveni, emkhatsini wabo bonkhe bantfu baNefi. Futsi ngenca yaloko ngemnyaka wemashumi lasikhombisa nakune indlala yachubeka, umsebenti wekubulala ngenkemba waphela kodvwa kwaba kubi kakhulu ngendlala.

6 Futsi lomsebenti wekubulala waphindze wachubeka nangemnyaka wemashumi lasikhombisa nesihlanu. Ngoba umhlaba washaywa kangangoba woma, wangakhiphi lokuyinhlavu ngesikhatsi saloko lokuyinhlavu; futsi umhlaba wonkhe washaywa, ngisho nasemkhatsini wemaLamani kanjalo nasemkhatsini wemaNefi, kangangekutsi bashaywa kangangekutsi bafa ngetinkhulungwane kuleto tincenye telive lebetinebubi lobukhulu.

7 Futsi kwenteka kutsi bantfu babona kutsi bese batawufa ngenca yendlala, bacala kukhumbula iNkhosi Nkulunkulu wabo; baphindze bacala bawakhumbula emavi aNefi.

8 Futsi bantfu bacala kuncenga behluleli babo labakhulu kanye nebaholi babo, kutsi batsi kuNefi: Buka, siyati kutsi wena ungumuntfu waNkulunkulu, ngako-ke khala eNkhosini Nkulunkulu wetfu kutsi ayisuse kitsi lendlala, hleze onkhe emavi lowawakhuluma mayelana nekubhujiswa kwetfu afezeke.

9 Futsi kwenteka kutsi behluleli basho kuNefi, njengekwemavi labebanesifiso sawo. Futsi kwenteka kutsi ngesikhatsi Nefi abona kutsi bantfu bese baphendvukile baphindze batitfoba ngetingubo temasaka, waphindze wakhala eNkhosini watsi:

10 Awu Nkhosi, buka labantfu baphendvukile; futsi sebalisusile licembu laGadiyanthoni emkhatsini wabo kangangekutsi selite laphela nya, futsi sebawafihlile emasu alo layimfihlo phansi.

11 Manje, Awu Nkhosi, ngenca yaloku kutfobeka kwabo ngicela ususe intfukutselo yakho, bese wenta intfukutselo yakho yeneliswe ngekubhujiswa kwalabo bantfu lababi losewuvele ubabulele.

12 Awu Nkhosi, ngicela kutsi ususe intfukutselo yakho, yebo, intfukutselo yakho lenkhulu kakhulu, futsi wente kutsi lendlala iphele kulelive.

13 Awu Nkhosi, ngicela kutsi ungive, futsi wente kutsi kwenteke njengekwemavi ami, utfumele imvula emhlabeni wonkhe, kute ukhiphe titselo tawo, kanye nalokuyinhlavu kwawo ngesikhatsi salokuyinhlavu.

14 Awu Nkhosi, waweva emavi ami ngesikhatsi ngitsi, Akube khona indlala, kute mashayabhuce wenkemba aphele; futsi ngiyati kutsi, ngisho nangalesi sikhatsi, utaweva emavi ami, ngoba watsi: Uma labantfu baphendvuka ngitawubaphephisa.

15 Yebo, Awu Nkhosi, futsi uyabona kutsi sebaphendvukile, ngenca yendlala namashayabhuce wesifo kanye nembubhiso lokute kubo.

16 Manje, Awu Nkhosi, ungayisusa yini intfukutselo yakho, ubalinge futsi kutsi batawukusebentela na? Uma kunjalo, Awu Nkhosi, ungababusisa ngekwemavi akho lowashito.

17 Futsi kwenteka kutsi ngemnyaka wemashumi lasikhombisa nesitfupha iNkhosi yayisusa intfukutselo yayo kubantfu, yenta kutsi imvula ine emhlabeni, kangangekutsi watikhipha titselo tawo ngesikhatsi setitselo tawo. Futsi kwenteka kutsi wakukhipha lokuyinhlavu kwawo ngesikhatsi salokuyinhlavu kwawo.

18 Futsi buka, bantfu batfokota baphindze bamdvumisa Nkulunkulu, live lonkhe lagcwala injabulo; abatange basafuna nanini kumbulala Nefi, kodvwa bamtsatsa njengemphrofethi lomkhulu, kanye nemuntfu waNkulunkulu, lonemandla lamakhulu kanye neligunya laliniketiwe lelivela kuNkulunkulu.

19 Futsi bukani, Lehi, umnakabo, bekangekho ngisho nakancane emvakwakhe ngekwetintfo letiphatselene nekulunga.

20 Futsi ngaleyondlela kwenteka kutsi bantfu baNefi bacala baphindze baphumelela eveni, bacala kwakha tindzawo tabo lebese titindzala, bacala kutalana bandza, bate bagcwala live lonkhe, ngasenyakatfo kanye nangaseningizimu, kusukela elwandle lolusenshonalanga kuya elwandle lolusemphumalanga.

21 Futsi kwenteka kutsi umnyaka wemashumi lasikhombisa nesitfupha waphela ngekuthula. Umnyaka wemashumi lasikhombisa nesikhombisa wacala ngekuthula; nelibandla landza lagcwala live lonkhe; nencenye lenkhulu yebantfu, emaNefi kanye nemaLamani, baba belibandla; futsi baba nekuthula lokukhulu kakhulu eveni; waphela kanjalo-ke umnyaka wemashumi lasikhombisa nesikhombisa.

22 Futsi baphindza baba nekuthula ngemnyaka wemashumi lasikhombisa nesiphohlongo, ngaphandle kwemibango lemincane mayelana nemaphuzu etimfundziso lebetibekwe baphrofethi.

23 Futsi ngemnyaka wemashumi lasikhombisa nemfica kwacala kwaba khona kungevani lokukhulu. Kodvwa kwenteka kutsi Nefi naLehi, kanye nalabaningi babomnakabo labebati mayelana nemaphuzu laliciniso etimfundziso, batfola netembulo letiningi etinsukwini tonkhe, ngako-ke bashumayela kubantfu, kangangekutsi bakucedza kungevani kwabo kuwo lowo mnyaka.

24 Futsi kwenteka kutsi ngemnyaka wemashumi lasiphohlongo wekubusa kwebehluleli kubantfu baNefi, kwabakhona lidlanzana lelitsite lemahlubuka lebelisuka kubantfu baNefi, lokwase kuneminyaka ngaphambilini lahamba laya kumaLamani, futsi latibita ngemaLamani, kanjalo nelidlanzana lelitsite lebelilesitukulwane sangempela semaLamani, liphehlelwe entfukutselweni ngiwo, noma ngulawo mahlubuka, ngako-ke lasusa imphi nabomnakabo.

25 Futsi bebabulala baphindze baphanga; emvakwaloko bebabuyela emuva etintsabeni, futsi baya ehlane kanye nasetindzaweni letifihlakele, babhaca kute bangatfolakali, batfola kwengetwa esibalweni sabo emalanga onkhe, kangangoba bekuba khona emahlubuka lahamba aya kubo.

26 Futsi ngenca yaloku ngekuhamba kwesikhatsi, yebo, ngisho ngesikhatsi lesingasiyo iminyaka lemingakhi, bese balicembu lelikhulu kakhulu letigebengu; bawacwaninga onkhe lamasu layimfihlo aGadiyanthoni; futsi ngaleyondlela baba tigebengu taGadiyanthoni.

27 Manje buka, letigebengu tenta incushuncushu lenkhulu, yebo, ngisho nekubhujiswa lokukhulu emkhatsini webantfu baNefi, kanjalo nasemkhatsini webantfu bemaLamani.

28 Futsi kwenteka kutsi kwadzingeka kutsi ucedvwe lomsebenti wekubhujiswa; ngako-ke batfumela libutfo lemadvodza lanemandla ehlane kanye nasetintsabeni kuyawufuna lelicembu letigebengu, kutsi libulawe.

29 Kodvwa buka, kwenteka kutsi ngawo kanye lowo mnyaka bachutjwa babuyiselwa emuva emaveni abo. Futsi waphela kanjalo-ke umnyaka wemashumi lasiphohlongo wekubusa kwebehluleli kubantfu baNefi.

30 Futsi kwenteka kutsi ekucaleni kwemnyaka wemashumi lasiphohlongo nakunye bahamba bayawukulwa nalelicembu letigebengu, babulala letiningi; kanjalo nabo bavakashelwa ngekubhujiswa lokukhulu.

31 Futsi baphoceleleka kutsi baphume futsi ehlane nasetintsabeni babuyele emaveni abo, ngenca yesibalo lesikhulu kakhulu saleto tigebengu lebesetigcwele etintsabeni kanye nasehlane.

32 Futsi kwenteka kutsi waphela kanjalo-ke lomnyaka. Netigebengu tachubeka nekwandza takhula tacina, kangangekutsi tawedzelela emabutfo emaNefi, kanjalo newemaLamani; tadala kwesaba lokukhulu kubantfu eveni lonkhe.

33 Yebo, ngoba tavakashela tincenye letiningi telive, tenta imbubhiso lenkhulu kakhulu kubantfu; yebo tabulala labaningi, tatfwala labanye tayobatfumbela ehlane ikakhulukati bafati kanye nebantfwana babo.

34 Manje lobubi lobungaka, lobeta ebantfwini ngenca yebubi babo, kwabaphehlela futsi ekukhumbuleni iNkhosi Nkulunkulu wabo.

35 Futsi waphela kanjalo-ke umnyaka wemashumi lasiphohlongo nakunye wekubusa kwebehluleli.

36 Futsi ngemnyaka wemashumi lasiphohlongo nakubili bacala futsi bayikhohlwa iNkhosi Nkulunkulu wabo. Ngemnyaka wemashumi lasiphohlongo nakutsatfu bacala bakhula bacina ebubini. Ngemnyaka wemashumi lasiphohlongo nakune abatange batilungise tindlela tabo.

37 Futsi kwenteka ngemnyaka wemashumi lasiphohlongo nesihlanu bakhula baya ngekucina ekutikhukhumeteni kwabo, nasebubini babo; futsi ngaleyondlela babese balungela kubhujiswa futsi.

38 Futsi waphela kanjalo-ke umnyaka wemashumi lasiphohlongo nesihlanu.