1 Manje, bomnaketfu labatsandzekako, bukani, ngimemetela kini kutsi ngaphandle kwekutsi niphendvuke imiti yenu iyawusala ingenamuntfu.

2 Yebo, ngaphandle kwekutsi niphendvuke, besifazane benu bayawuba nesizatfu lesikhulu sekulila ngelusuku lapho bayawube bamunyisa khona; ngoba niyawetama kubaleka kodvwa kuyawube kute indzawo yekukhosela; yebo, futsi maye kulabo labayawube batetfwele, ngoba bayawube besindvwa bangakwati kubaleka; ngako-ke, bayawugcotjwagcotjwa phansi bashiywe kutsi bafe.

3 Yebo, maye kulabantfu lababitwa ngekutsi bantfu baNefi ngaphandle kwekutsi baphendvuke, uma babona tonkhe letibonakaliso netimangaliso labayawukhonjiswa tona; ngoba bukani, bebabantfu labakhetsiwe beNkhosi; yebo, bantfu baNefi beyibatsandza, ngetulu kwaloko ibajezisile; yebo, ngetinsuku tebubi babo ibajezisile ngenca yekutsi beyibatsandza.

4 Kodvwa bukani bomnaketfu, beyiwazonda emaLamani ngenca yekutsi tento tawo betitimbi njalo, futsi loku kungenca yebubi bemasiko aboyise. Kodvwa bukani, insindziso ite kuwo ngekushumayela kwemaNefi; ngalesi sizatfu iNkhosi itandzisile tinsuku tawo

5 Futsi ngifuna kutsi nibone kutsi incenye lenkhulu yawo iphila ngendlela yemiyalo yawo, futsi ahamba ngekucophelela phambi kwaNkulunkulu, ayetama kugcina imiyaleto yakhe nemitsetfo yakhe kanye netehlulelo takhe ngekwemtsetfo waMosi.

6 Yebo, ngitsi kini, incenye lenkhulu yawo yenta loku, futsi yetama ngekukhutsala lokungakhatsali kutsi iletse bomnakabo labasele ekwatini liciniso; ngako-ke baningi labangeta sibalo sawo nsuku tonkhe.

7 Bukani, niyatatela nine, ngoba nikubonile loku, kutsi ngebuningi balabo labaletfwa ekwatini liciniso, nekwati ngemasiko lamabi nalanengekile aboyise, futsi baholelwa kutsi bakholwe yimibhalo lengcwele, yebo, tiphrofetho tebaphrofethi labangcwele, letibhaliwe, letibaholela ekukholweni eNkhosini, nasekuphendvukeni, kukholwa loko nekuphendvuka lokuletsa kugucuka kwenhlitiyo yabo—

8 Ngako-ke, ngebuningi balabo labete kuloku, niyatatela kutsi bacinile futsi basimile elukholweni, nakuyo leyontfo labakhululwe ngayo.

9 Ngetulu kwaloko niyati kutsi batingcwabile tikhali tabo temphi, futsi bayesaba kutitsatsa hleze ngandlela tsite bone; yebo, niyabona kutsi bayesaba kona—ngoba bukani batawuvumela kutsi bagcotjwagcotjwe phansi baphindze babulawe titsa tabo, futsi angeke baphakamise tinkemba tabo ngalokumelene nabo, loku kungenca yelukholo lwabo kuKhristu.

10 Manje, ngenca yekusima kwabo uma sebakholwa kuleyontfo labakholwa kuyo, ngoba ngenca yekucina kwabo uma sebakhanyiselwe, bukani, iNkhosi iyawubabusisa iphindze yandzise tinsuku tabo, nanoma kungenca yebubi babo—

11 Yebo, noma bangancishelwa lukholo iNkhosi iyawubandzisela tinsuku tabo, kute kufike sikhatsi labakhulume ngaso bobabe betfu, kanjalo nemphrofethi Zenoshe, nalabanye baphrofethi labaningi, mayelana nekubuyiselwa kwabomnaketfu, emaLamani, ekwatini liciniso futsi—

12 Yebo, ngitsi kini, ngetikhatsi tekugcina tetsembiso teNkhosi telulelwe kubomnaketfu, emaLamani; futsi nanoma kungenca yetinhlupheko letiningi labayawuba nato, futsi nanoma bayawujikiswa bayiswe emuva nasembili emhlabeni wonkhe, batingelwe, bashaywe, basakatwe ngephandle, bete indzawo yekukhosela, iNkhosi iyawuba nemusa kubo.

13 Futsi loku kungekwesiphrofetho, kutsi bayawuphindze baletfwe ekwatini liciniso, lokulwati lweMhlengi wabo, kanye nemelusi wabo lomkhulu neweliciniso, babalwe netimvu takhe.

14 Ngako-ke ngitsi kini, kuyawuba ncono kubo kunani ngaphandle kwekutsi niphendvuke.

15 Ngoba bukani, kube imisebenti lemikhulu bakhonjiswa yona lenikhonjiswe yona, yebo, kubo labo labancishelwa kukholwa ngenca yemasiko aboyise, niyatibonela kutsi bebangeke nanini baphindze bancishelwe lukholo.

16 Ngako-ke, iNkhosi itsi: Angeke ngibabhubhise baphele nya, kodvwa ngitawenta kutsi ngelusuku lwekuhlakanipha kwami babuyele kimi futsi, kusho iNkhosi.

17 Manje bukani, itsi iNkhosi, mayelana nebantfu bemaNefi: Uma bangeke baphendvuke, baphindze betame kwenta intsandvo yami, ngitawubabhubhisa baphele nya, kusho iNkhosi, ngenca yekungakholwa kwabo nanoma kungemisebenti leminingi lemikhulu lengiyentile emkhatsini wabo, futsi ngempela njengoba iNkhosi iphila letintfo tiyawuba njalo, kusho iNkhosi.