Sehluko 3
EmaNefi lamaningi atfutsela eveni lelingasenyakatfo—Akha tindlu tasemende aphindze agcina imibhalo leminingi—Emashumi etinkhulungwane ayaphendvuka aphindze ayabhajatiswa—Livi laNkulunkulu liholela bantfu ensindzisweni—Nefi indvodzana yaHilamani utsatsa sihlalo sekwehlulela. Cishe ngemnyaka wa 49 kuya kuwa 39 ngaphambi kwekutalwa kwaKhristu.
1 Manje kwenteka kutsi ngemnyaka wemashumi lamane nakutsatfu wekubusa kwebehluleli, akutange kube khona umbango emkhatsini webantfu baNefi ngaphandle nje kwekutikhukhumeta lokuncane lobekusebandleni, lokwabanga kuphikisana lokuncane emkhatsini webantfu, futsi loku kuphikisana kwasombululeka ekupheleni kwemnyaka wemashumi lamane nakutsatfu.
2 Futsi akutange kube khona umbango emkhatsini webantfu ngemnyaka wemashumi lamane nakune; kanjalo akutange kube khona mbango longanani ngemnyaka wemashumi lamane nesihlanu.
3 Futsi kwenteka kutsi ngemnyaka wemashumi lamane nesitfupha, yebo, kwaba khona umbango lomkhulu kanye nekuhlubuka lokuningi; lokwaba yimbangela yekutsi labaningi kakhulu besuke baphume eveni laseZarahemla, bahambe baye eveni lelingasenyakatfo kute balitsatse lelive libe lifa.
4 Bahamba indlela lendze kakhulu, kangangekutsi bate befika emachibini lamakhulu emanti kanye nasemifuleni leminingi.
5 Yebo, basabalala kuto tonkhe tincenye telive, kuto tonkhe tincenye telive letatingakentiwa tabatindzala naletatingenamahlatsi, ngenca yebahlali labaningi labebahlala kulo.
6 Manje kwakute incenye yelive leyayingenalutfo, ngaphandle nje kwemahlatsi; kodvwa ngenca yekubhujiswa lokukhulu kwebantfu labebahlala kulo ngaphambilini labitwa ngekutsi ayinalutfo.
7 Futsi ngenca yekutsi kwakunemahlatsi lamancane kulo lonkhe live, noko bantfu labaya lapho baba tingcweti ekusebentiseni semende; ngako-ke bakha tindlu tasemende, labahlala kuto.
8 Futsi kwenteka kutsi bandza baphindze basabalala, besuka eveni lebelingaseningizimu baya eveni lebelingasenyakatfo, futsi basabalala kangangekutsi bacala kumbonya umhlaba wonkhe, kusukela elwandle loluseningizimu kuya elwandle lolusenyakatfo, kusukela elwandle lolusenshonalanga kuya elwandle lolusemphumalanga.
9 Bantfu labebaseveni lelingasenyakatfo bebahlala emathendeni, kanye nasetindlini tasemende, futsi bavumela noma ngusiphi sihlahla lesasimila kulo lonkhe live kutsi sikhule, kute nasekufike sikhatsi babe netingodvo tekwakha tindlu tabo, yebo, nemadolobha abo, nemathempeli abo, nemasinagoge abo, netindlu tabo letingcwele, kanye nato tonkhe tinhlobo tetakhiwo tabo.
10 Futsi kwenteka kutsi njengoba tingodvo tatiyindlala kakhulu eveni lelingasenyakatfo, batfumela letiningi ngemkhumbi.
11 Ngaleyondlela basita bantfu labebaseveni lelingasenyakatfo kutsi bakhe emadolobha lamaningi, ngetingodvo kanye nangasemende.
12 Futsi kwenteka kutsi bekukhona labaningi bantfu ba-Amoni, labebangemaLamani ngekutalwa, nabo ngalokunjalo bahamba baya kulelive.
13 Manje kukhona imibhalo leminingi legciniwe mayelana nenchubo talabantfu, ngebuningi balabantfu, lenemininingwane futsi leminingi kakhulu, mayelana nabo.
14 Kodvwa bukani, incenye yinye ekhulwini yencubo yalabantfu, yebo, umlandvo wemaLamani kanye nemaNefi, netimphi tabo, nembango, nekuphikisana, nekushumayela kwabo, netiphrofetho tabo, nekutfumela kwabo tintfo ngemkhumbi nekwakha kwabo imikhumbi, emathempeli, nemasinagoge, netindlu tabo letingcwele, nekulunga kwabo, nebubi babo, nekubulala kwabo, nekuphanga kwabo, nebugebengu babo, nato tonkhe tinhlobo tetinengiso tabo, bugwadla babo, angeke kufakwe kulomsebenti.
15 Kodvwa bukani, kukhona letiningi tincwadzi kanye naleminingi imibhalo yalo lonkhe luhlobo, futsi seloku yagcinwa ikakhulu ngemaNefi.
16 Futsi yendluliswa ngemaNefi kusukela esitukulwaneni kuya kulesinye, ate awela esiphambekweni aphindze abulawa, aphangwa, atingelwa, abuyiselwa emuva, abulawa, futsi asakatwa emhlabeni wonkhe, ahlangana nemaLamani ate angasabitwa ngekutsi ngemaNefi, asakhohlakele, angakhuteki, anebudlova, yebo, asangemaLamani.
17 Manje sengibuyela emlandvweni wami, ngako-ke loko lengikukhulumile kwenteke emvakwekutsi sekube nemibango lemikhulu, nekuphatamiseka, netimphi kanye nekuphikisana, emkhatsini webantfu baNefi.
18 Umnyaka wemashumi lamane nesitfupha wekubusa kwebehluleli waphela;
19 Futsi kwenteka kutsi wawusekhona umbango lomkhulu eveni, yebo, nangemnyaka wemashumi lamane nesikhombisa, kanjalo nangemnyaka wemashumi lamane nesiphohlongo.
20 Noko Hilamani wasitsatsa sihlalo sekwehlulela ngekulunga kanye nangebucotfo; yebo, wetama kugcina imitsetfo, netehlulelo, kanye nemiyaleto yaNkulunkulu; wenta loko lokwakulungille emehlweni aNkulunkulu njalo; wahamba etindleleni teyise, kangangekutsi waphumelela eveni.
21 Futsi kwenteka kutsi bekanemadvodzana lamabili. Lomdzala wamnika libito laNefi, kwatsi lomncane, libito laLehi. Futsi acala akhulela eNkhosini.
22 Futsi kwenteka kutsi timphi kanye nemibango kwacala kwaya ngekuphela, kancane kancane emkhatsini webantfu bemaNefi, ngasekupheleni kwemnyaka wemashumi lamane nesiphohlongo wekubusa kwebehluleli kubantfu baNefi.
23 Futsi kwenteka kutsi ngemnyaka wemashumi lamane nemfica wekubusa kwebehluleli, kwachubeka kwabanekuthula lokwacinisekiswa eveni, ngaphandle nje kwemacembu layimfihlo Gadiyanthoni sigebengu labewasungulile etincenyeni letiningi telive lokwakuhlalwa kuto, ngaleso sikhatsi labengatiwa ngulabo labebaphetse embusweni; ngako-ke awatange asuswe eveni.
24 Futsi kwenteka kutsi ngawo lowo mnyaka kwaba khona imphumelelo lenkhulu kakhulu ebandleni, kangangekutsi kwaba khona tinkhulungwane letaba malunga ebandleni, tabhajatiselwa ekuphendvukeni.
25 Yaba yinkhulu kakhulu imphumelelo ebandleni, netibusiso taba tiningi kakhulu letatfululwa kubantfu, kangangekutsi nebaphristi labakhulu kanye nebafundzisi bamangala kakhulu.
26 Futsi kwenteka kutsi umsebenti weNkhosi waphumelela kangangoba bantfu labaningi babhajatiswa futsi bahlanganiswa ebandleni laNkulunkulu, yebo, emashumi etinkhulungwane.
27 Ngaleyondlela singabona kutsi iNkhosi inemusa kulabo, ngebucotfo betinhlitiyo tabo, lababita libito layo lelingcwele.
28 Yebo, ngaleyondlela siyabona kutsi lisango lasezulwini livulelwe bonkhe, ngisho nalabo labatawukholwa ebitweni laJesu Khristu, loyiNdvodzana yaNkulunkulu.
29 Yebo, siyabona kutsi noma ngubani lofunako angabambelela evini laNkulunkulu, leliphilako futsi lelinemandla, leliyawuhlukanisa ekhatsi inkhohliso nabosochaka kanye nebucili badeveli, liholele umlandzeli waKhristu endleleni lengumtjuntju nalencane awele kulowo mhosha waphakadze wekuhlupheka lolungiselwe kutsi ugwinye lababi—
30 Libeke imiphefumulo yabo, yebo, imiphefumulo yabo lengabhubhi, esandleni sangesekudla saNkulunkulu embusweni wasezulwini, kutsi ihlale phansi na-Abrahama, na-Isaka, naJakobe, nabo bonkhe bobabe betfu labangcwele, ingaphindzi nanini iphumele ngaphandle.
31 Futsi ngalowo mnyaka kwachubeka kwaba nekujabula eveni laseZarahemla, kanye nakuto tonkhe tifundza letitungeletile, nakulo lonkhe live lelalingelemaNefi.
32 Futsi kwenteka kutsi kwaba nekuthula kanye nekujabula lokukhulu esikhatsini lesasisele semnyaka wemashumi lamane nemfica; yebo, kanjalo kwachubeka kwaba nekuthula kanye nenjabulo lenkhulu ngemnyaka wemashumi lasihlanu wekubusa kwebehluleli.
33 Ngemnyaka wemashumi lasihlanu nakunye wekubusa kwebehluleli kwaba nekuthula futsi, ngaphandle kwekutikhukhumeta lokwacala kwangena ebandleni—hhayi ebandleni laNkulunkulu, kodvwa etinhlitiyweni tebantfu labebatibita ngekutsi belibandla laNkulunkulu.
34 Bebatikhukhumeta, bahlupha labaningi bebazalwane babo. Manje loku kwakububi lobukhulu, lobenta incenye yebantfu labatfobeke kakhulu kutsi beve kuhlushwa lokukhulu, futsi bendlule enhluphekweni lenkhulu.
35 Noko bazila baphindze bathandaza njalo, bakhula baba nemandla ekutitfobeni kwabo, baya ngekucina elukholweni lwaKhristu, yate imiphefumulo yabo yagcwala injabulo kanye nendvudvuto, yebo, tinhlitiyo tabo tahlantwa futsi tangcweliswa, kungcweliswa lokuta ngenca yekunikela tinhlitiyo tabo kuNkulunkulu.
36 Futsi kwenteka kutsi umnyaka wemashumi lasihlanu nakubili nawo waphela ngekuthula, ngaphandle kwekutikhukhumeta lokukhulu kakhulu lokwasekungene etinhlitiyweni tebantfu; lokwakungenca yengcebo yabo lenkhulu kakhulu kanye nekuphumelela kwabo eveni; futsi kwakhula kubo lusuku ngelusuku.
37 Futsi kwenteka kutsi ngemnyaka wemashumi lasihlanu nakutsatfu wekubusa kwebehluleli, Hilamani wafa, kwase kutsi indvodzana yakhe lendzala Nefi yacala kubusa esikhundleni sakhe, Futsi kwenteka kutsi yasitsatsa sihlalo sekwehlulela ngekulunga nangebucotfo; yebo, yayigcina imiyaleto yaNkulunkulu, yaphindze yahamba etindleleni teyise.