Sehluko 5
Nefi naLehi batinikela ekushumayeleni—Emabito abo abakhutsata kutsi timphilo tabo batente tifane netabokhokho babo—Khristu uhlenga labo labaphendvukako—Nefi naLehi bagucula labaningi futsi bayaboshwa, batungeletwa ngumlilo—Lifu lebumnyama limbonya bantfu labangemakhulu lamatsatfu—Umhlaba uyatamatama, futsi livi liyaleta bantfu kutsi baphendvuke—Nefi naLehi bakhuluma netingilosi, nesicuku situngeletwa ngumlilo. Cishe ngemnyaka wa 30 ngaphambi kwekutalwa kwaKhristu.
1 Futsi kwenteka kutsi kuwo lowo mnyaka, bukani, Nefi wanika sihlalo sekwehlulela endvodzeni libito layo lokwakunguSezoramu.
2 Ngoba njengoba imitsetfo yabo kanye nemibuso yabo kwakumiswe ngelivi lebantfu, futsi labo labebakhetsa bubi bebabaningi kakhulu kunalabo labebakhetsa lokuhle, ngako-ke besebalungele kubhujiswa, ngoba imitsetfo bese yonakele.
3 Yebo, bekungasiko loku kuphela, besebabantfu lababonhlokolukhuni, kangangekutsi besebangasakwati kuphatfwa ngemtsetfo noma kulunga, ngaphandle kwekutsi kubangele kubhujiswa kwabo.
4 Futsi kwenteka kutsi Nefi besekakhatsele ngenca yebubi babo; wadzela sihlalo sekwehlulela, wakubeka etikwemahlombe akhe kutsi ashumayele livi laNkulunkulu tonkhe tinsuku takhe lebesetisele, kanjalo nemnakabo Lehi, tonkhe tinsuku takhe lebesetisele.
5 Ngoba bakhumbula emavi uyise Hilamani lawakhuluma kubo. Lawa ngemavi lawakhuluma:
6 Bukani, madvodzana ami, ngifisa kutsi nikhumbule kugcina imiyaleto yaNkulunkulu; futsi ngifuna kutsi niwamemetele kubantfu lamavi. Bukani, ngininikete emabito ebatali betfu bekucala labaphuma eveni laseJerusalema; loku ngikwente ngenhloso yekutsi uma nikhumbula emabito enu nibakhumbule; futsi uma nibakhumbula niyikhumbule nemisebenti yabo; nekutsi uma nikhumbula imisebenti yabo nati kutsi kukhulunyiwe, futsi kubhaliwe, kutsi bebalungile.
7 Ngako-ke madvodzana ami, ngifisa kutsi nente loko lokuhle, kute kukhulunywe ngani, kuphindze kubhalwe ngani, njengoba kukhulunyiwe kwaphindze kwabhalwa ngabo.
8 Nyalo madvodzana ami, bukani nginalokunye lokutsite lengikufisa kini, lokungukutsi, ningatenti letintfo kute nitikhukhumete, kodvwa nitente kute nitibekele ingcebo ezulwini, yebo, lokungeyaphakadze, futsi lengashabalali; yebo, kute nitfole sipho lesiligugu sekuphila lokuphakadze, lesinesizatfu sekucabanga kutsi siniketwe bobabe betfu
9 Awu khumbulani, khumbulani, madvodzana ami, emavi inkhosi Bhenjamini leyawakhuluma kubantfu bayo; yebo, khumbulani kutsi kute lenye indlela noma lisu umuntfu langasindziswa ngalo, ngaphandle kwengati lehlawulako yaJesu Khristu, lotawukuta; yebo, khumbulani kutsi uta kutawuhlenga umhlaba.
10 Futsi khumbulani emavi Amulekhi lawakhuluma kuZeziromu, edolobheni lase-Amoniha; ngoba washo kuye kutsi iNkhosi ngempela itawukuta kute itawuhlenga bantfu bayo, kodvwa angeke ite kutawubahlenga basetonweni tabo, kodvwa kubahlenga etonweni tabo
11 Futsi inemandla lanikwe yona lavela kuBabe kutsi ibahlenge etonweni tabo ngenca yekuphendvuka; ngako-ke itfumele tingilosi tayo kutsi timemetele tindzaba temibandzela yekuphendvuka, lokuletsa bantfu emandleni eMhlengi, kute kusindziswe imiphefumulo yabo.
12 Manje, madvodzana ami, khumbulani, khumbulani kutsi kusetikwelidvwala leMhlengi wetfu, longuKhristu, iNdvodzana yaNkulunkulu, lapho kufanele nakhele khona sisekelo senu; kute kutsi uma develi atfumela imimoya yakhe lenemandla, yebo, imibane yakhe esivunguvungwini, yebo, uma sonkhe sangcotfo sakhe nesiphepho sakhe lesinemandla siwela kini, singabi nemandla etikwenu kutsi sinihudvulele phansi emhosheni wekuhlupheka kanye naselusizini lolungapheli ngenca yelidvwala lenakhele etikwalo, lelisisekelo lesicinile, sisekelo lapho uma bantfu bakhela kuso angeke bawe.
13 Futsi kwenteka kutsi lawa bekungemavi Hilamani lawafundzisa emadvodzana akhe; yebo, wawafundzisa tintfo letiningi letingakabhalwa, netintfo letiningi letibhaliwe.
14 Futsi awakhumbula emavi akhe; ngako-ke ahamba, agcina imiyaleto yaNkulunkulu, yekufundzisa livi laNkulunkulu emkhatsini wabo bonkhe bantfu baNefi, acala edolobheni iNala.
15 Kusuka lapho ahamba aya edolobheni laGidi; kusuka edolobheni laGidi aya edolobheni laMulekhi;
16 Ahamba esuka kulelo dolobha aya kulelinye, ate ahamba emkhatsini wabo bonkhe bantfu baNefi labebaseveni lelingaseningizimu; kusuka lapho aya eveni laseZarahemla, emkhatsini wemaLamani.
17 Futsi kwenteka kutsi ashumayela ngemandla lamakhulu, kangangekutsi atfobisa emahlubuka lamaningi labekahlubuke kumaNefi, kangangekutsi eta ngaphambili ativuma tono tawo aphindze abhajatiselwa ekuphendvukeni, masinyane abuyela kumaNefi kuyawukwetama kulungisa lokungakalungi labekakwentile.
18 Futsi kwenteka kutsi Nefi kanye naLehi bashumayela kumaLamani ngemandla kanye nangeligunya lelikhulu, ngoba bebanemandla neligunya lebebaniketwe lona kutsi bakhulume, kanjalo baniketwa naloko lokwakufanele bakukhulume—
19 Ngako-ke bakhuluma kumaLamani lokwawamangalisa kakhulu, kutsi akholiswe, kangangekutsi kwabakhona tinkhulungwane letisiphohlongo temaLamani letatiseveni laseZarahemla kanye nasetindzaweni letitungeletile letabhajatiselwa ekuphendvukeni, futsi takholiswa ngebubi bemasiko aboyise.
20 Futsi kwenteka kutsi Nefi kanye naLehi bachubeka kusukela lapho baya eveni laNefi.
21 Futsi kwenteka kutsi batsatfwa libutfo lemaLamani labaphonsa ejele; yebo, kulo kanye lelo jele Amoni nabomnakabo labebaphonswe kulo tinceku taLimhayi.
22 Emvakwekutsi sebaphonswe ejele tinsuku letiningi ngaphandle kwekudla, buka, ahamba aya ejele kuyawubatsatsa kute ababulale.
23 Futsi kwenteka kutsi Nefi naLehi batungeletwa ngulokungatsi ngumlilo, kangangekutsi akatange alinge abeke tandla tawo kubo ngekwesaba hleze ashe. Noko, Nefi naLehi abatange bashe, futsi kwakungatsi beme ekhatsi nekhatsi nemlilo kodvwa abatange bashe.
24 Ngesikhatsi babona kutsi bebatungeletwe yinsika yemlilo, nekutsi beyingabashisi, tinhlitiyo tabo tema sibindzi.
25 Ngoba bebabona kutsi emaLamani abengeke alinge abeke tandla tawo kubo; noma alinge ete edvute nabo, kodvwa ema shengatsi ashaywe aba timungulu ngenca yekumangala.
26 Futsi kwenteka kutsi Nefi naLehi basondzela ngembili bacala kukhuluma nawo, batsi: Ningesabi, ngoba bukani, nguNkulunkulu lonikhombise lentfo lemangalisako, leyo leboniswa kini kutsi angeke nikwati kubeka tandla tenu kitsi nisibulale.
27 Futsi bukani, sebawashito lamavi, umhlaba watamatama kamatima, netindvonga telijele tatamatama kwangatsi titowela phansi; kodvwa bukani, atiwanga. Futsi bukani labo labebasejele bekungemaLamani kanye nemaNefi labekangemahlubuka.
28 Futsi kwenteka kutsi bambonywa ngelifu lelimnyama, kwesaba lokubi lokumatima kweta etikwabo.
29 Futsi kwenteka kutsi kwefika livi lokwakungatsi lingetulu kwelifu lelimnyama, litsi: Phendvukani, phendvukani, ningabe nisafuna nanini kubulala tinceku tami lengititfumele kini kutsi timemetele tindzaba letimnandzi.
30 Futsi kwenteka kutsi ngesikhatsi aliva lelivi, aphindze abona kutsi kwakungasilo livi lekudvuma noma livi lesiphitsiphitsi semsindvo lomkhulu, kodvwa bukani, kwakulivi lelalikhulumela phansi lipholile ngalokuphelele, lokwakungatsi lalihleba, futsi lahlaba kuwo kanye umphefumulo—
31 Nanoma lelivi lalipholile, bukani umhlaba watamatama kamatima, netindvonga telijele taphindze tatamatama, shengatsi titawuwela phansi; futsi bukani nelifu lebumnyama, lelalibambonyile alitange lisuke—
32 Bukani livi laphindze leta, litsi: Phendvukani, phendvukani, ngoba umbuso welizulu sewusondzele; ningabe nisafuna kubulala tinceku tami nanini. Futsi kwenteka kutsi umhlaba waphindze watamatama, netindvonga tatamatama.
33 Futsi ngetulu kwaloko laphindze leta kwesitsatfu livi, lakhuluma kubo emavi lamangalisako langeke akhulunywe ngumuntfu; netindvonga taphindze tatamatama, nemhlaba watamatama shengatsi wawutawuhlukana ekhatsi.
34 Futsi kwenteka kutsi emaLamani akakhonanga kubaleka ngenca yelifu lelimnyama lelalibambonyile; yebo, ngetulu kwaloko bebangakhoni kunyakata ngenca yekwesaba lokwafika etikwabo.
35 Manje bekukhona munye emkhatsini wabo lobekangumNefi ngekwekutalwa, lobekake waba ngewelibandla laNkulunkulu kodvwa wahlubuka kubo.
36 Futsi kwenteka kutsi wagucuka, bukani, wabona efini lelimnyama buso baNefi banaLehi; futsi bukani, bebukhatimula kakhulu, njengebuso betingilosi. Wabona kutsi bebaphakamisele emehlo abo ezulwini; basesimeni sekungatsi bakhuluma noma baphakamisela emavi abo emuntfwini lotsite labebambona.
37 Futsi kwenteka kutsi lendvodza yamemeta esicukwini, kute naso sigucuke sibuke. Bukani, kwaba nemandla lesaniketwa wona kutsi sigucuke sibuke, nembala sabubona buso baNefi naLehi.
38 Futsi satsi kulendvodza: Buka, ngabe tisho kutsini tonkhe letintfo, futsi ngubani lona lawa madvodza lakhuluma naye?
39 Manje libito lalendvodza bekungu-Aminadabu. Aminadabu watsi kubo: Bakhuluma netingilosi taNkulunkulu.
40 Futsi kwenteka kutsi emaLamani atsi kuye: Siyawukwenta njani, kute lelifu lebumnyama lisuswe ekusimbonyeni na?
41 Aminadabu watsi kubo: Kumele niphendvuke, niphindze nikhale kulo lelivi, nite nibe nelukholo kuKhristu, lenafundziswa ngaye ngu-Alima, na-Amulekhi, kanye naZeziromu; uma nitawukwenta loku, lelifu lebumnyama litawususwa ekunimbonyeni.
42 Futsi kwenteka kutsi bonkhe bacala kukhala evini lakhe loyo lobekatamatamise umhlaba; yebo, bakhala late lifu lebumnyama lesuswa.
43 Futsi kwenteka kutsi ngesikhatsi baphonsa emehlo abo ngala nangala, babona kutsi lifu lebumnyama laselisusiwe ekubambonyeni, bukani, babona kutsi bebatungeletiwe, yebo wonkhe muntfu, yinsika yemlilo.
44 Nefi kanye naLehi bebasekhatsi kuwo; yebo, bebatungeletiwe; yebo, bekungatsi basekhatsi nekhatsi elangabini lemlilo, kodvwa alitange libashise, noma lishise tindvonga telijele; futsi bagcwaliswa ngaleyo njabulo lengachazeki nalegcwele inkhatimulo.
45 Bukani, Moya loNgcwele waNkulunkulu wehlela phansi uvela ezulwini, wangena etinhlitiyweni tabo, futsi kwakungatsi bagcwaliswe ngemlilo, bakwati kukhuluma emavi lamangalisako.
46 Futsi kwenteka kutsi kweta livi kubo, yebo, livi lelitfokotisako, lokwakungatsi kuhleba, litsi:
47 Kuthula, kuthula akube kini, ngenca yelukholo lwenu kuloTsandziwe Kakhulu wami, lobekakhona kusukela ekusekelweni kwemhlaba.
48 Manje, ngesikhatsi bakuva loku baphonsa emehlo abo shengatsi bafuna kubona kutsi laliphuma kuphi lelivi; bukani, babona emazulu avuleka; netingilosi tehlela phansi tiphuma ezulwini tabasita.
49 Futsi bekubantfu cishe labangemakhulu lamatsatfu lababona baphindze beva letintfo; futsi batjelwa kutsi bahambe bangamangali, noma bangabate.
50 Futsi kwenteka kutsi bahamba, bafundzisa bantfu, bamemetela etifundzeni tonkhe letitungeletile tonkhe tintfo labebativile nalebebatibonile, kangangekutsi incenye leningi yemaLamani yakholiswa, ngenca yebukhulu bebufakazi labebabutfolile.
51 Futsi ngebuningi balabo labakholiswa batibeka phansi tikhali tabo temphi, kanjalo nenzondo yabo kanye nemasiko aboyise.
52 Futsi kwenteka kutsi babuyisela kumaNefi emave lokwakungewabo.