Seksiyon 100
Pagpadayag nga gihatag ngadto ni Joseph Smith ang Propeta ug ni Sidney Rigdon, sa Perrysburg, New York, Oktubre 12, 1833. Ang duha ka igsoon, kay dugay nang nawala gikan sa ilang mga pamilya, mibati og kabalaka mahitungod kanila.
1–4, Si Joseph ug Sidney mosangyaw sa ebanghelyo alang sa kaluwasan sa mga kalag; 5–8, Ihatag ngadto kanila sa takna gayod kon unsa ang ilang isulti; 9–12, Si Sidney mao ang tigpama-ba ug si Joseph mao ang tigpadayag ug gamhanan sa pagpamatuod; 13–17, Ang Ginoo mopasanay og usa ka putli nga katawhan, ug ang masulundon maluwas.
1 Sa pagkatinuod, kini ang gisulti sa Ginoo nganha kaninyo, akong mga higala nga Sidney ug Joseph, ang inyong mga pamilya anaa sa maayo nga kahimtang; ania sila sa akong mga kamot, ug akong himoon alang kanila kon unsa ang akong gibati nga maayo; kay ania kanako ang tanang gahom.
2 Busa, sunod kanako, ug paminaw sa mga tambag nga akong ihatag kaninyo.
3 Tan-awa, ug sud-onga, ako adunay daghang katawhan niini nga dapit, sa naglibot nga mga rehiyon; ug ang usa ka mahinungdanon nga pultahan pagaablihan diha sa naglibot nga mga rehiyon niining silangan nga bahin sa yuta.
4 Busa, ako, ang Ginoo, nagtugot kaninyo sa pag-anhi niini nga dapit; kay alang kanako mahinungdanon kini alang sa kaluwasan sa mga kalag.
5 Busa, sa pagkatinuod sultihan ko kamo, ipataas ang inyong mga tingog ngadto niini nga katawhan; ipamulong ang mga hunahuna nga akong ibutang sa inyong mga kasingkasing, ug kamo dili pagalibogon sa atubangan sa mga tawo;
6 Kay igahatag ra kini kaninyo sa takna gayod, oo, niana gayod nga higayon, kon unsa ang inyong isulti.
7 Apan usa ka sugo ang akong ihatag kaninyo, nga kamo mopahayag sa bisan unsang butang nga inyong ipahayag pinaagi sa akong ngalan, sa kaligdong sa kasingkasing, pinaagi sa espiritu sa kaaghop, sa tanang butang.
8 Ug ihatag ko kaninyo kini nga saad, nga kon ugaling buhaton ninyo kini ang Espiritu Santo igabu-bo aron sa pagpamatuod sa tanang butang bisan unsa ang inyong isulti.
9 Ug mahinungdanon alang kanako nga ikaw, akong sulugoon nga Sidney, mahimong tigpama-ba ngadto niini nga katawhan; oo, sa pagkatinuod, ako moordina kanimo niini nga katungdanan, gani nga mamahimong tigpama-ba sa akong sulugoon nga si Joseph.
10 Ug hatagan ko siya og gahom nga mamahimong gamhanan sa pagpamatuod.
11 Ug hatagan ko ikaw og gahom nga mahimong gamhanan sa pagpasabot sa tanang kasulatan, nga mahimo ikaw nga tigpama-ba ngadto kaniya, ug siya mahimo nga usa ka tigpadayag nganha kanimo, nga ikaw gayod masayod sa katiunay sa tanang butang kalabot sa mga butang sa akong gingharian dinhi sa yuta.
12 Busa, padayon sa inyong panaw ug himoa ang inyong kasingkasing nga magmaya; kay tan-awa ug sud-onga, mag-uban ako kaninyo gani ngadto sa kataposan.
13 Ug karon hatagan ko kamo og usa ka pulong mahitungod sa Zion. Ang Zion pagatubson, bisan tuod og gipanton siya sulod sa mubo nga panahon.
14 Ang inyong mga igsoong lalaki, ang akong mga sulugoon nga sila si Orson Hyde ug si John Gould, ania sa akong mga kamot; ug tungod kay naghupot sila sa akong mga sugo pagaluwason sila.
15 Busa, tugoti ang inyong mga kasingkasing nga mahupay; kay ang tanang butang magkatambayayong alang kanila nga maglakaw nga matarong, ug sa pagkahimong balaan sa simbahan.
16 Kay mopasanay ako ngari kanako og usa ka putli nga katawhan, aron moalagad kanako diha sa pagkamatarong;
17 Ug ang tanan nga motawag sa ngalan sa Ginoo, ug magtuman sa iyang mga sugo, pagaluwason. Ug mao gayod kana. Amen.