1 Niining adlawa ang kinatibuk-ang konseho sa kawhaan ug upat ka high priest nagpundok sa balay ni Joseph Smith, Jun., pinaagi sa pagpadayag, ug nagpadayon sa pagtukod sa halangdong konseho sa simbahan ni Kristo, nga naglangkob sa napulog duha ka high priest, ug usa o tulo ka presidente sumala sa panginahanglan sa kahigayonan.

2 Ang halangdong konseho gipili pinaagi sa pagpadayag alang sa katuyoan sa paghusay sa mahinungdanong mga problema nga posibling motumaw sa simbahan, nga dili mahusay sa simbahan o sa konseho sa bishop ngadto sa katagbawan sa mga hingtungdan.

3 Sila si Joseph Smith, Jun., Sidney Rigdon ug Frederick G. Williams giila nga mga presidente pinaagi sa tingog sa konseho; ug sila si Joseph Smith, Sen., John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith, ug Luke Johnson, mga high priest, gipili nga mobarog isip konseho alang sa simbahan, pinaagi sa nagkahiusa nga tingog sa konseho.

4 Ang ginganlan sa ibabaw nga mga sakop sa konseho gipangutana kon gidawat ba nila ang ilang pagkapili, ug kon motuman ba sila sa mao nga katungdanan sumala sa balaod sa langit, diin silang tanan mitubag nga gidawat nila ang ilang pagkapili, ug motuman sa ilang mga katungdanan sumala sa grasya sa Dios nga gihatag nganha kanila.

5 Ang gidaghanon nga naglangkob sa konseho, nga miboto sa ngalan ug alang sa simbahan sa pagpili sa ginganlan sa ibabaw nga mga sakop sa konseho mga kap-atan ug tulo, sama sa mosunod: siyam ka high priest, napulo ug pito ka elder, upat ka priest, ug napulog tulo ka miyembro.

6 Nauyonan: nga ang halangdong konseho walay gahom sa paghimo kon wala ang pito nga ginganlan sa ibabaw nga mga sakop sa konseho, o dili motambong ang kasagarang gipili nga mga sumusunod.

7 Kining pito adunay gahom sa pagpili og laing mga high priest, nga ilang giisip nga takos ug makahimo sa paglihok puli sa mga sakop sa konseho nga wala makatambong.

8 Nabotohan: nga sa matag higayon nga adunay bakante nga mahitabo tungod sa kamatayon, pagpapahawa gikan sa katungdanan tungod sa kalapasan, o pagbalhin gikan sa mga utlanan sa pamunoan niini nga simbahan, ni bisan kinsa sa mga sakop sa konseho nga ginganlan sa ibabaw, pulihan kini pinaagi sa sugyot sa presidente, o mga presidente, ug tugotan pinaagi sa tingog sa kinatibuk-an nga konseho sa mga high priest, nga nagkatigom alang niana nga katuyoan, sa paglihok pinaagi sa ngalan sa simbahan.

9 Ang presidente sa simbahan, nga mao usab ang presidente sa konseho, gipili pinaagi sa pagpadayag, ug giila sa iyang pagdumala pinaagi sa tingog sa simbahan.

10 Ug kini sumala sa kahalangdon sa iyang katungdanan nga siya kinahanglang modumala sa konseho sa simbahan; ug kini mao ang iyang kahigayonan nga pagaabagan sa laing duha ka presidente, nga gipili sa samang paagi sa pagpili kaniya.

11 Ug kon dili motambong ang usa o duha nga gipili sa pagtabang kaniya, siya adunay gahom nga mangulo sa konseho nga walay tig-abag; ug kon siya mismo ang dili makatambong, ang laing mga presidente adunay gahom sa pagpangulo puli kaniya, ang duha o bisan hain kanila.

12 Sa matag higayon nga ang halangdong konseho sa simbahan ni Kristo hapsay na ang pagkaorganisar, sumala sa nahauna nga sumbanan, katungdanan sa napulog duha ka sakop sa konseho ang pagripa og mga numero, ug pinaagi niini matino kon kinsa sa napulog duha ang unang mosulti, sugod sa unang numero ug magsunod-sunod hangtod sa ikanapulog duha.

13 Sa higayon nga kining konseho magtigom aron sa paghusay og bisan unsa nga kaso, ang napulog duha ka sakop sa konseho maghunahuna kon lisod ba kini o dili; ug kon dili, duha lamang sa mga sakop sa konseho ang mosulti diha niini, sumala sa sumbanan nga nahisulat sa ibabaw.

14 Apan kon gihunahuna kini nga lisod, upat ang pilion; ug kon mas lisod pa, unom; apan dili mahitabo nga molabaw sa unom ang pilion aron mosulti.

15 Ang sinumbong, sa tanang kaso, adunay katungod sa katunga sa konseho, aron kapugngan ang pang-insulto o ang kadili makiangayon.

16 Ug ang mga sakop sa konseho nga gipili nga mosulti sa atubangan sa konseho mao ang mopahayag sa kaso, human masusi ang ebidensya, sa tinuod nga panghitabo sa atubangan sa konseho; ug ang matag tawo mosulti pinasubay sa patas nga paagi ug kaangayan.

17 Kadtong mga sakop sa konseho nga nakahulbot sa mga pares nga numero, nga mao ang, 2, 4, 6, 8, 10 ug 12, mao ang mobarog alang sa sinumbong, ug mopugong sa pang-insulto ug kadili makiangayon.

18 Sa tanang kaso ang nagsumbong ug ang sinumbong adunay kahigayonan sa pagsulti alang sa ilang kaugalingon sa atubangan sa konseho, human madungog ang mga ebidensya ug ang mga sakop sa konseho nga gipili nga maoy mosulti bahin sa kaso nakahuman na sa ilang pagpamahayag.

19 Human mapaminaw ang mga ebidensya, ug ang mga sakop sa konseho, ang nagsumbong ug ang sinumbong nakasulti na, ang presidente mohatag sa hukom sumala sa pagsabot nga iyang nakuha sa kaso, ug motawag sa napulog duha ka sakop sa konseho aron uyonan ang hukom pinaagi sa ilang pagboto.

20 Apan kon ang nahibilin nga mga sakop sa konseho, nga wala pa makasulti, o bisan hain kanila, human madungog ang mga ebidensya ug mga paghangyo nga walay pagdapig, nakakita og sayop sa hukom sa presidente, mahimo nila kining isulti, ug ang kaso sublion sa paghusay.

21 Ug kon, human sa mainampingong pagsubli nga paghusay, adunay nadugang nga katin-awan nga nakita sa kaso, ang hukom mahimo nga usbon pinasubay niana.

22 Apan kon walay nahatag nga dugang nga katin-awan, ang una nga hukom ang mopatigbabaw, ang kinadaghanan sa konseho mao gihapon ang adunay gahom sa paghukom.

23 Kon may problema sa paghukom bahin sa doktrina o baroganan, kon dili igo ang sinulat aron makahatag og katin-awan sa kaso ngadto sa mga hunahuna sa konseho, ang presidente magpakisayod ug mangayo sa hunahuna sa Ginoo pinaagi sa pagpadayag.

24 Ang mga high priest, kon anaa sila sa layong dapit, adunay gahom sa pagtawag ug paghimo og konseho sama sa gihisgotan sa ibabaw, sa paghusay sa mga problema, kon ang mga hingtungdan o bisan hain kanila mohangyo niini.

25 Ug ang gihisgotan nga konseho sa mga high priest adunay gahom sa pagpili og usa sa kaugalingon nila nga pundok nga modumala sa mao nga konseho sa makadiyot.

26 Katungdanan sa gihisgotan nga konseho ang pagpadala, diha dayon, og kopya sa ilang mga gipanghimo, uban sa kinatibuk-ang pamahayag sa pagpamatuod inubanan sa ilang hukom, ngadto sa halangdong konseho sa buhatan sa Unang Kapangulohan sa Simbahan.

27 Kon ang mga hingtungdan o bisan hain kanila wala kaayo mahimuot sa hukom sa gihisgotan nga konseho, mahimo silang mohangyo sa halangdong konseho sa buhatan sa Unang Kapangulohan sa Simbahan, ug himoon ang pagsubli nga paghusay, kansang kaso pagadumalahon, sumala sa nahauna nga sumbanan nga nahisulat, sama og wala pay hukom nga nahitabo.

28 Kini nga konseho sa mga high priest nga anaa sa layong dapit ipatawag lamang atol sa labing lisod nga mga kaso nga may kalabotan sa simbahan; ug ang komon o ordinaryo nga kaso dili angay nga ipatawag sa ingon niana nga konseho.

29 Ang tigbiyahe o anaa sa layong dapit nga mga high priest adunay gahom sa pagsulti kon gikinahanglan ba nga magtawag og ingon niini nga konseho o dili.

30 Adunay kalainan tali sa halangdong konseho o tigbiyahe nga mga high priest sa laing nasod, ug sa tigbiyahe nga halangdong konseho nga gilangkoban sa napulog duha ka apostoles, sa ilang mga hukom.

31 Gikan sa hukom sa nag-una mahimo nga adunay usa ka pag-apela; apan sa hukom sa naulahi wala na.

32 Ang naulahi mahimo lamang nga mapangutana sa kinatibuk-ang mga awtoridad sa simbahan kon adunay nalambigit nga kalapasan.

33 Gikasabotan: nga ang presidente o mga presidente sa buhatan sa Unang Kapangulohan sa Simbahan adunay gahom sa pagtino kon ang ingon niana nga kaso, nga iapela, angay ba nga sublion sa paghusay, human masuta ang hangyo ug ang mga ebidensya ug mga pamahayag nga gilakip niini.

34 Ang napulog duha ka sakop sa konseho human niana nagpadayon sa paghimo og mga ripa o mga balota, aron sa pagtino kon kinsa ang unang mosulti, ug ang mosunod mao ang resulta, nga ginganlan: 1, Oliver Cowdery; 2, Joseph Coe; 3, Samuel H. Smith; 4, Luke Johnson; 5, John S. Carter; 6, Sylvester Smith; 7, John Johnson; 8, Orson Hyde; 9, Jared Carter; 10, Joseph Smith, Sen.; 11, John Smith; 12, Martin Harris.Human sa pag-ampo ang komperensiya natapos.