1 Akong kabubut-on nga ang akong sulugoon nga si Warren A. Cowdery tawagon sa katungdanan ug ordinahan nga tigdumalang high priest sa akong simbahan, sa yuta sa Freedom ug sa palibot nga mga rehiyon;

2 Ug mosangyaw sa akong walay kataposang ebanghelyo, ug mopataas sa iyang tingog ug mopasidaan sa katawhan, dili lamang sa iyang kaugalingong dapit, apan sa kasikbit nga mga lalawigan;

3 Ug mohalad sa iyang tibuok nga panahon niining halangdon ug balaan nga tawag, nga karon akong ihatag ngadto kaniya, makugihong mangita sa gingharian sa langit ug sa pagkamatarong niini, ug ang tanang butang nga gikinahanglan madugang ngadto niini; kay ang mamumuo takos sa iyang suhol.

4 Ug usab, sa pagkatinuod sulithan ko kamo, ang pag-anhi sa Ginoo nagkaduol na, ug mopahikurat sa kalibotan sama sa usa ka kawatan sa kagabhion—

5 Busa, baksi ang inyong mga bat-ang, aron kamo mahimo nga mga anak sa kahayag, ug kana nga adlaw dili mopahikurat kaninyo sama sa kawatan.

6 Ug usab, sa pagkatinuod sultihan ko kamo, dihay kamaya sa langit sa dihang ang akong sulugoon nga si Warren miyukbo sa akong gahom, ug mibulag gikan sa mga panikas sa mga tawo;

7 Busa, bulahan ang akong sulugoon nga si Warren, kay may kaluoy ako kaniya; ug, bisan pa sa garbo sa iyang kasingkasing, ituboy nako siya kon ugaling magpaubos siya sa iyang kaugalingon sa akong atubangan.

8 Hatagan nako siya og grasya ug kasegurohan bisan asa siya mobarog; ug kon magpadayon siya nga matinud-anon nga saksi ug kahayag ngadto sa simbahan nag-andam ako og korona alang kaniya sa mga mansyon sa akong Amahan. Ug mao gayod kana. Amen.