Seksiyon 108
Pagpadayag nga gihatag pinaagi ni Joseph Smith ang Propeta, sa Kirtland, Ohio, Disyembre 26, 1835. Kini nga seksiyon nadawat sa hangyo ni Lyman Sherman, kinsa giordinahan kanhi nga usa ka seventy ug kinsa miduol sa Propeta nga naghangyo og pagpadayag aron ipahibalo ang iyang katungdanan.
1–3, Si Lyman Sherman gipasaylo sa iyang mga sala; 4–5, Pagaisipon siya nga kauban sa nag-unang mga elder sa Simbahan; 6–8, Gitawag siya sa pagsangyaw sa ebanghelyo ug sa pag-lig-on sa iyang kaigsoonan.
1 Sa pagkatinuod nagsulti ang Ginoo nganha kanimo, akong sulugoong Lyman: Ang imong mga sala gipasaylo na, tungod kay ikaw nagsunod sa akong tingog nga moanhi niini nga kabuntagon aron modawat og tambag gikan kaniya nga akong gipili.
2 Busa,papahulaya ang imong kalag kalabot sa imong espirituhanong kahimtang, ug ayaw na supaka ang akong tingog.
3 Ug barog ug dugangi ang imong pagmatngon gikan karon sa pagsunod sa imong mga panumpa, nga imong nahimo ug gibuhat, ug mapanalanginan ka og daghan kaayong panalangin.
4 Pagmapailobon sa paghulat hangtod ang maligdong nga katigoman pagahimoon pinaagi sa akong mga sulugoon, dayon ikaw mahinumdoman kauban sa nag-una sa akong mga elder, ug modawat og katungod pinaagi sa pag-orden uban sa nahibilin sa akong mga elder nga akong napili.
5 Tan-awa, mao kini ang saad sa Amahan nganha kanimo kon ikaw mopadayon nga matinud-anon.
6 Ug matuman kini diha kanimo sa adlaw nga ikaw makabaton og katungod sa pagsangyaw sa akong ebanghelyo bisan asa man ako mopadala kanimo, sukad karon ug sukad niana nga higayon.
7 Busa, lig-ona ang imong kaigsoonan sa tanan ninyong panagsultihanay, sa tanan ninyong pag-ampo, sa tanan ninyong pagdasig, ug sa tanan ninyong buhat.
8 Ug tan-awa, ug sud-onga, magauban ako kanimo aron sa pagpanalangin kanimo ug pagpalingkawas kanimo sa kahangtoran. Amen.