Seksiyon 113
Mga tubag sa pipila ka pangutana sa mga sinulat ni Isaias, gihatag pinaagi ni Joseph Smith ang Propeta, didto o duol sa Far West, Missouri, Marso 1838.
1–6, Ang Kaliwat ni Jese, ang saha nga naggikan niini, ug ang gamot ni Jese nailhan; 7–10, Ang mga nagkatibulaag nga salin sa Zion adunay katungod sa gahom sa pagkapari ug gitawag sa pagbalik ngadto sa Ginoo.
1 Kinsa ang Kaliwat ni Jese nga gihisgotan sa una, ikaduha, ikatulo, ikaupat, ug ikalima nga mga bersikulo sa ikanapulog usa nga kapitulo sa Isaias?
2 Sa pagkatinuod sa ingon niini misulti ang Ginoo: Kini si Kristo.
3 Unsa ang saha nga gipamulong sa unang bersikulo sa ikapulo og usa nga kapitulo sa Isaias, nga kinahanglan moabot sa Kaliwat ni Jese?
4 Tan-awa, sa ingon niini miingon ang Ginoo: Mao kini ang usa ka sulugoon ubos sa gahom ni Kristo, kinsa mao ang usa ka bahin sa kaliwat ni Jese ingon usab ni Ephraim, o sa balay ni Jose, kang kinsa adunay gitugyan nga dakong gahom.
5 Unsa ang gamot ni Jese nga gipamulong diha sa ika-10 nga bersikulo sa ika-11 nga kapitulo?
6 Tan-awa, sa ingon niini miingon ang Ginoo, mao kini ang usa ka kaliwat ni Jese, ingon usab ni Jose, kinsa adunay katungod sa pagkapari, ug sa mga yawe sa gingharian, alang sa usa ka bandila, ug alang sa pagpundok sa akong katawhan sa kataposang mga adlaw.
7 Mga pangutana ni Elias Higbee: Unsa ang buot ipasabot sa sugo diha sa Isaias, ikakalim-an ug duha nga kapitulo, unang bersikulo, nga nag-ingon: Isul-ob ang imong kusog, O Zion—ug kinsa nga katawhan ang gipasabot ni Isaias?
8 Siya nagpasabot niadtong kinahanglan nga pagatawgon sa Dios sa kataposang mga adlaw, nga kinahanglang maghupot sa gahom sa pagkapari aron sa pagpabalik sa Zion, ug sa katubsanan sa Israel; ug ang pagsul-ob sa iyang kusog mao ang pagsul-ob sa awtoridad sa pagkapari, nga siya, ang Zion, adunay katungod pinaagi sa kaliwatan; usab sa pagpabalik niana nga gahom nga iyang nawala.
9 Unsa ang atong angay nga masabtan sa Zion nga nagbadbad sa iyang kaugalingon gikan sa mga higot sa iyang liog; ikaduha nga bersikulo?
10 Kinahanglan natong masabtan nga ang mga nagkatibulaag nga salin giawhag sa pagbalik ngadto sa Ginoo gikan sa ilang pagkapukan; nga kon sila mohimo, ang saad sa Ginoo mao nga siya makigsulti kanila, o mohatag kanila og pagpadayag. Tan-awa sa ika-6, ika-7, ug ika-8 nga mga bersikulo. Ang mga higot sa iyang liog mao ang mga tunglo sa Dios nganha kaniya, o ang mga salin sa Israel sa ilang nagkatibulaag nga kahimtang diha sa mga Hentil.