Seksyion 118
Pagpadayag nga gihatag pinaagi ni Joseph Smith ang Propeta, sa Far West, Missouri, Hulyo 8, 1838, agi og tubag sa pangamuyo, “Pakit-a kami sa imong kabubut-on, O Ginoo, mahitungod sa Napulog Duha.”
1–3, Ang Ginoo mosangkap sa mga pamilya sa Napulog Duha; 4–6, Mga bakante sa Napulog Duha gipulihan.
1 Sa pagkatinuod, miingon ang Ginoo: Kinahanglan nga ang usa ka komperensiya ipahigayon dayon; ipaorganisar ang Napulog Duha ug pagpili og mga tawo nga mopuli sa dapit niadtong nakasala.
2 Kinahanglang magpabilin si Thomas sa mubo nga panahon diha sa yuta sa Zion, aron sa pagmantala sa akong pulong.
3 Ipapadayon sa nahibilin ang pagsangyaw gikan niana nga takna, ug kon sila mohimo niini sa tumang pagpaubos sa kasingkasing, sa kaaghop ug pagkamapainubsanon, ug pagkamainantoson, ako, ang Ginoo, mohatag kanila og usa ka saad nga ako mosangkap sa ilang mga pamilya; ug usa ka pultahan sa kahigayonan ang pagaablihan alang kanila, gikan karon.
4 Ug sa sunod nga tingpamulak kinahanglan silang mobiya aron moadto tabok sa lawod, ug didto mopahayag sa akong ebanghelyo, sa kahingpitan niini, ug magpamatuod sa akong ngalan.
5 Kinahanglan nga mobiya sila sa akong mga santos sa siyudad sa Far West, sa ikakawhaan ug unom nga adlaw sa sunod Abril, sa dapit diin tukoron ang akong balay, nag-ingon ang Ginoo.
6 Kinahanglan nga ang akong sulugoon nga si John Taylor, ug usab ang akong sulugoon nga si John E.Page, ug usab ang akong sulugoon nga si Wilford Woodruff, ug usab ang akong sulugoon nga si Willard Richards, matudlo aron mopuli sa mga dapit niadtong nakasala, ug opisyal nga mapahibalo sa ilang pagkatudlo.