Seksiyon 123
Katungdanan sa mga Santos kabahin sa ilang mga manggugukod, nga gisulat ni Joseph Smith ang Propeta, samtang gibilanggo sa bilanggoan sa Liberty, Missouri. Kini nga seksiyon usa ka kinutlo gikan sa usa ka sulat alang sa Simbahan nga gipetsahan og Marso 20, 1839 (tan-awa sa ulohan sa seksiyon 121).
1–6, Ang mga Santos kinahanglan nga mokolekta ug momantala sa usa ka asoy sa ilang mga pag-antos ug sa mga pagpanggukod; 7–10, Ang sama nga espiritu nga naghimo sa bakak nga mga pamahayag mao usab ang nangulo sa pagpanggukod sa mga Santos; 11–17, Daghan diha sa tanang tinuohan ang modawat sa kamatuoran.
1 Ug usab, mosugyot kami alang sa inyong konsiderasyon kon angay ba sa tanang santos nga mopundok og kasayoran sa tanang importante nga impormasyon sa nahitabo, ug sa mga pag-antos ug mga pang-abuso nga gipahamtang kanila sa katawhan niini nga Estado;
2 Ug usab sa tanan nga kabtangan ug kantidad sa mga kadaot nga ilang nahiagoman, sa dungog ug sa personal nga mga kadaot, ingon man usab sa balay ug yuta.
3 Ug usab ang mga ngalan sa tanang tawo nga may kalabotan sa pagpanglupig, kutob sa ilang mahibaloan ug makita.
4 Ug tingali usa ka komitiba ang mahimong sangonan sa pagsusi niini nga mga butang, ug aron pagkuha ug mga pamahayag ug mga gipanumpaan nga kalig-onan; ug usab sa pagpundok sa makauulaw nga mga pamahayag nga gihungihong;
5 Ug ang tanan nga anaa sa mga magasin, ug sa mga ensayklopedya, ug ang tanan nga makauulaw nga kasaysayan nga gimantala, ug mga sinulat, ug pinaagi kaniya, ug ipakita ang kinatibuk-ang sunod-sunod nga yawan-ong mga buhat ug pagkadaotan ug sa gihimong mga pagpatay nga maoy naandan niini nga katawhan—
6 Nga dili kay imantala lang namo ngadto sa tibuok kalibotan, apan ipakita kini ngadto sa mga pangulo sa panggamhanan sa ilang tanan nga daotan ug yawan-ong tinguha, isip ang kataposang paningkamot nga mao ang gikinahanglan gikan kanato sa atong Langitnong Amahan, sa dili pa kita sa kinatibuk-an ug sa hingpit makaangkon niana nga saad nga magtawag kaniya gikan sa iyang tagoanan nga dapit; ug usab aron ang tibuok nasod walay ikabalibad sa dili pa siya mopadala sa gahom sa iyang gamhanan nga bukton.
7 Mao kini ang usa ka dili malikayan nga katungdanan nga utang nato sa Dios, sa mga anghel, kang kinsa kita pagadad-on aron mobarog, ug usab sa atong mga kaugalingon, sa atong mga asawa ug mga anak, nga nag-antos sa kaguol, kasakit, ug kabalaka, ubos sa labing daotan nga kamot sa pagpatay, pagpanlupig, ug pagpangdaog-daog, nga gisuportahan ug giawhag ug gituboy pinaagi sa impluwensya niana nga espiritu nga nakagamot pag-ayo sa mga tinuohan sa mga amahan, nga nagbilin og mga bakak, diha sa mga kasingkasing sa mga anak, ug mipuno sa kalibotan sa kalibog, ug nag-anam og kalig-on, ug karon mao ang tinubdan sa tanang pagkadaotan, ug ang tibuok yuta nag-agulo nga nagpas-an sa kabug-at sa pagkadaotan niini.
8 Kini mao ang puthaw nga yugo, lig-on kini nga higot; mao kini ang mga posas ug mga kadena, ug mga talikala, ug mga higot sa impyerno.
9 Busa mao kini ang dili malikayan nga katungdanan nga atong nautang, dili lamang sa atong kaugalingong mga asawa ug mga anak, apan sa mga biyuda ug sa walay mga amahan, kansang mga bana ug mga amahan gipamatay ubos sa puthaw nga kamot;
10 Diin ang kangitngit ug itom nga mga binuhatan igo na aron makapakurog sa impyerno, ug makapabarog nga nahadlok ug nangluspad, ug ang mga kamot sa mao nga yawa mokuray ug mangurog.
11 Ug usab mao kini ang dili malikayan nga katungdanan nga atong nautang sa tanan nga nagtubo nga henerasyon, ug sa tanan nga putli og kasingkasing—
12 Kay aduna pay daghan sa ibabaw sa yuta sa tanang tinuohan, mga pundok, ug mga pundok sa relihiyon, nga nabutaan sa malipoton nga paglingla sa mga tawo, diin sila naghulat aron makapangilad, ug kinsa natago gikan sa kamatuoran tungod kay wala sila masayod asa kini pangitaa—
13 Busa, kinahanglan nga kita mohalad ug motugyan sa atong kinabuhi sa pagpadayag sa tanang tinago nga butang sa kangitngit, nga atong nahibaloan; ug kini sa pagkatinuod gipadayag gikan sa langit—
14 Kinahanglan nga atimanon kini uban sa dakong kakugi.
15 Ayaw itugot nga dunay tawo nga moisip niini nga walay hinungdan nga mga butang; kay aduna pay daghan nga umaabot, kalabot sa mga santos, nga nagsalig niining mga butanga.
16 Nasayod kamo, kaigsoonan, nga ang dako kaayo nga barko matabangan gayod sa usa ka gamay kaayo nga timon sa panahon sa unos, pinaagi sa pagpaubay-ubay sa hangin ug sa mga balod.
17 Busa, minahal nga kaigsoonan, maglipay kita nga mobuhat sa tanang butang nga anaa sa atong gahom; ug dayon kita magmalinawon, uban ang labing dako nga kaseguroan, nga makasaksi sa kaluwasan sa Dios, ug aron ang iyang mga bukton ipadayag.