Seksiyon 125
Pagpadayag nga gihatag pinaagi ni Joseph Smith ang Propeta, sa Nauvoo, Illinois, Marso 1841, kabahin sa mga Santos sa teritoryo sa Iowa.
1–4, Ang mga Santos magtukod og mga siyudad ug magpundok ngadto sa mga stake sa Zion.
1 Unsa man ang kabubut-on sa Ginoo kabahin sa mga santos sa Teritoryo sa Iowa?
2 Sa pagkatinuod, kini ang giingon sa Ginoo, sultihan ko kamo, kon kadto sila nga nagtawag sa ilang kaugalingon sa akong ngalan ug naningkamot nga mahimong akong mga santos, kon buhaton nila ang akong kabubut-on ug motuman sa akong mga sugo mahitungod kanila, papundoka sila sa ilang kaugalingon ngadto sa mga dapit nga akong pilion alang kanila pinaagi sa akong sulugoon nga si Joseph, ug patukora og mga siyudad sa akong ngalan, aron makapangandam sila alang nianang gitagana alang sa panahon nga moabot.
3 Patukora sila og siyudad sa akong ngalan diha sa yuta nga atbang sa siyudad sa Nauvoo, ug ang ngalan nga Zarahemla mao ang ipangalan niini.
4 Ug kadtong tanan nga moanhi gikan sa silangan, ug sa kasadpan, ug sa amihanan, ug sa habagatan, nga adunay mga tinguha nga mopuyo diha niini, makaangkon sa ilang mga kabilin diha niini, ingon usab sa siyudad sa Nashville, o sa siyudad sa Nauvoo, ug sa tanang stake nga akong gipili, miingon ang Ginoo.