1 Sama sa akong gipamahayag kaninyo sa akong sulat sa wala pa ako mobiya sa akong dapit, nga mosulat ako kaninyo matag karon ug unya ug mohatag kaninyo og kasayoran kalabot sa daghang hilisgotan, karon akong ipadayon ang hilisgotan sa bunyag alang sa mga patay, kay kana nga hilisgotan ingon og anaa kanunay sa akong hunahuna, ug nakatandog kaayo kini sa akong mga pagbati, sukad nga gigukod ko sa akong mga kaaway.

2 Misulat ko og pipila ka pulong sa pagpadayag nganha kaninyo kabahin sa tigrekord. Ako adunay pipila ka dugang nga mga hunahuna kalabot niini nga butang, nga karon akong pamatud-an. Mao kini, gipahayag sa akong unang sulat nga kinahanglan nga adunay tigrekord, kinsa mao ang saksi nga nakakita mismo, ug usab nakadungog sa iyang dunggan mismo, aron siya mohimo og talaan sa kamatuoran sa atubangan sa Ginoo.

3 Karon, kalabot niining butanga, malisod sa usa lang ka tigrekord nga makatambong sa tanan nga higayon, ug mobuhat sa tanan nga buluhaton. Sa paglikay niini nga kalisod, mahimong adunay tigrekord nga pilion sa matag ward sa siyudad, kinsa takos sa paghimo sa tukmang talaan sa mga gihisgotan sa tigom; ug ipahimo kaniya ang detalyado ug tukma nga pagrekord sa tibuok nga kahimoan, magmatuod sa iyang talaan nga nakita niya mismo sa iyang mga mata, ug nadungog mismo sa iyang mga dunggan, mosulat sa petsa, ug mga ngalan, ug uban pa, ug sa kasaysayan sa tibuok kalihokan; mongalan usab og tulo ka tawo nga anaa, kon adunay bisan kinsa nga mitambong, kinsa makamatuod bisan kanus-a sa panahon nga tawgon aron pagmatuod niini, aron sa ba-ba sa duha o tulo ka saksi ang matag pulong mapamatud-an.

4 Dugang pa, himoa nga adunay kinatibuk-ang tigrekord, nga mao ang hatagan niining uban nga mga talaan, inubanan sa mga sertipiko nga may ilang kaugalingong mga pirma, nagmatuod nga ang talaan nga ilang gihimo tinuod. Dayon ang kinatibuk-ang tigrekord sa simbahan makabutang sa talaan ngadto sa kinatibuk-ang basahon sa simbahan, uban sa mga sertipiko ug sa tanang saksi, inubanan sa iyang kaugalingong pahayag nga sa pagkatinuod nagtuo siya nga kanang gihisgotan nga pahayag ug mga talaan tinuod, gikan sa iyang kahibalo sa kinatibuk-ang kinaiya ug sa pagpili sa simbahan niana nga mga tawo. Ug sa pagkahuman niini diha sa kinatibuk-ang basahon sa simbahan, ang talaan mahimong sama ka balaan, ug mopanghimatuod sa ordinansa nga sama ra nga nakita niya sa iyang mga mata mismo ug nadungog sa iyang mga dunggan mismo, ug mihimo og sama nga talaan diha sa kinatibuk-ang basahon sa simbahan.

5 Kamo tingali makahunahuna nga kini nga han-ay sa mga butang kuti kaayo; apan sultihan ko kamo nga pagtubag lamang kini sa kabubut-on sa Dios, pinasubay sa ordinansa ug pagpangandam nga gi-orden ug giandam sa Ginoo sa wala pa ang katukoran sa kalibotan, alang sa kaluwasan sa mga patay nga namatay nga walay kahibalo sa ebanghelyo.

6 Ug dugang pa, gusto nako nga mahinumdom kamo nga si Juan ang Tigpadayag namalandong niining mao nga hilisgotan kalabot sa mga patay, sa dihang mipahayag siya, sama sa inyong makita nga nahisulat sa Pinadayag 20:12—Ug ako nakakita sa mga patay, bantogan ug dili bantogan, nagtindog sa atubangan sa Dios; ug ang mga basahon gibuksan; ug lain nga basahon gibuksan, nga mao ang basahon sa kinabuhi; ug ang mga patay gihukman gikan sa mga butang nga nahisulat didto sa mga basahon, sumala sa ilang mga binuhatan.

7 Inyong makita dinhi niini nga kinutlo nga ang mga basahon gibuksan; ug lain nga basahon gibuksan, nga mao ang basahon sa kinabuhi; apan ang mga patay gihukman gikan niadtong mga butang nga nahisulat didto sa mga basahon, sumala sa ilang mga binuhatan; busa, ang mga basahon nga gipamulong mao ang mga basahon nga naglangkob sa talaan sa ilang mga binuhatan, ug nagpasabot sa mga talaan nga gitipigan sa ibabaw sa yuta. Ug ang basahon nga mao ang basahon sa kinabuhi mao ang talaan nga gitipigan sa langit; ang baroganan tukma nga nahiuyon sa doktrina nga gisugo kaninyo diha sa pagpadayag nga nalakip sa sulat nga akong gisulat kaninyo sa wala pa ang akong pagbiya sa akong dapit—aron ang tanan nga inyong itala kini matala didto sa langit.

8 Karon, ang kinaiyahan niini nga ordinansa anaa sa gahom sa pagkapari, pinaagi sa pagpadayag ni Jesukristo, diin gitugot nga bisan unsa ang inyong bugkoson dinhi sa yuta, pagabugkoson didto sa langit, ug bisan unsa ang inyong luagan dinhi sa yuta pagaluagan didto sa langit. O, sa laing pagkasulti, kon sabton sa laing paagi ang paghubad, bisan unsa ang inyong itala dinhi sa yuta mahitala didto sa langit, ug bisan unsa ang dili ninyo itala dinhi sa yuta dili mahitala didto sa langit; kay gikan sa mga basahon ang inyong mga patay pagahukman, sumala sa ilang kaugalingong binuhatan, kon sila ba nakapahigayon sa mga ordinansa sa ilang kaugalingon propria persona, o pinaagi sa ilang kaugalingong mga tinugyanan, sumala sa ordinansa nga giandam sa Dios alang sa ilang kaluwasan gikan sa wala pa matukod ang kalibotan, sumala sa mga talaan nga ilang gitipigan kalabot sa ilang mga patay.

9 Kini maingon ngadto sa uban nga usa ka mapangahason nga doktrina nga atong gihisgotan—ang gahom nga motala o mobugkos dinhi sa yuta ug mobugkos didto sa langit. Bisan pa niana, sa tanang panahon sa kalibotan, sa matag higayon nga ang Ginoo naghatag og dispensasyon sa pagkapari ngadto ni bisan kinsang tawo pinaagi sa tinuod nga pagpadayag, o ni bisan kinsang pundok sa mga tawo, kini nga gahom kanunay nga gihatag. Busa, bisan unsa ang gibuhat niadto nga mga tawo pinaagi sa awtoridad, sa ngalan sa Ginoo, ug mibuhat niini nga matinuoron ug matinud-anon, ug mitipig og tukma ug matinud-anon nga talaan niini, nahimo kining balaod sa ibabaw sa yuta ug sa langit, ug dili na mabakwi, sumala sa mga sugo sa halangdong Jehova. Tinuod kini nga panultihon. Kinsa may makadawat niini?

10 Ug usab, alang sa panig-ingnan, Mateo 16:18, 19: Ug ako moingon usab nganha kanimo, ikaw mao si Pedro, ug sa ibabaw niini nga bato ako motukod sa akong simbahan; ug ang mga ganghaan sa impyerno dili makabuntog batok niini. Ug ako mohatag nganha kanimo sa mga yawe sa gingharian sa langit: ug bisan unsa ang imong bugkoson dinhi sa yuta pagabugkoson didto sa langit; ug bisan unsa ang imong luagan dinhi sa yuta pagaluagan didto sa langit.

11 Karon ang mahinungdanon ug labing dako nga tinagoan sa tanang butang, ug ang summum bonum sa tibuok nga hilisgotan nga anaa sa atong atubangan, gilangkob diha sa pag-angkon sa mga gahom sa Balaang Pagkapari. Alang kaniya nga gihatagan niini nga mga yawe dili malisod ang pagbaton og kahibalo sa mga kamatuoran kalabot sa kaluwasan sa mga anak sa katawhan, alang sa mga patay ingon man sa mga buhi.

12 Dinhi niini anaa ang himaya ug dungog, ug imortalidad ug kinabuhing dayon—Ang ordinansa sa bunyag pinaagi sa tubig, aron ipaunlod niini aron mahimong sama sa patay, aron ang usa ka baroganan mahiuyon ngadto sa laing baroganan; aron ipaunlod sa tubig ug motunga gikan sa tubig nga nagsimbolo sa pagkabanhaw sa mga patay pinaagi sa pagbangon gikan sa ilang mga lubnganan; busa, kini nga ordinansa gihimo aron sa pagpakita og relasyon ngadto sa ordinansa sa bunyag alang sa mga patay, tungod kay nagsimbolo kini sa pagkamatay.

13 Busa, ang bunyaganan gihimo nga sama sa lubnganan, ug gimando nga ipabutang sa usa ka dapit sa ilawom diin ang mga buhi naanad nga magpundok, aron sa pagpakita og panig-ingnan sa mga buhi ug sa mga patay, ug aron ang tanang butang adunay kasusama, ug aron kini magkauyon sa usag usa—aron ang kalibotanon mapahiuyon niana nga langitnon, sama sa gipahayag ni Pablo, diha sa 1 Mga Taga-Corinto 15:46, 47, ug 48:

14 Hinuon ang nahauna dili ang espirituhanon, apan ang kinaiyanhon; ug human niana ang espirituhanon. Ang unang tawo gikan sa yuta, yutan-on; ang ikaduhang tawo mao ang Ginoo gikan sa langit. Sila nga yutan-on, sama usab kanila nga yutan-on; ug sila nga langitnon, sama usab kanila nga langitnon. Ug sama sa mga talaan sa yuta kalabot sa inyong mga patay, nga gitala sa tukmang paagi, mao usab ang mga talaan sa langit. Busa, kini, mao ang gahom sa pagselyo ug pagbugkos, sa laing pagsabot, ang mga yawe sa gingharian, nga naglangkob sa yawe sa kahibalo.

15 Ug karon, akong hinigugmang mga igsoon nga lalaki ug babaye, ipasalig ko kaninyo nga kini ang mga baroganan kalabot sa mga patay ug sa mga buhi nga dili mahimong hatagan lamang og gamay nga pagtagad, kalabot sa atong kaluwasan. Kay ang ilang kaluwasan gikinahanglan ug mahinungdanon sa atong kaluwasan, sama sa gisulti ni Pablo kabahin sa mga amahan—nga sila kon wala kita dili mahingpit—ni kita kon wala ang atong mga patay mahimong hingpit.

16 Ug karon, kalabot sa bunyag alang sa mga patay, ako mohatag kaninyo og laing kinutlo ni Pablo, 1 Mga Taga-Corinto 15:29: Kon dili pa, unsa may ilang mahimo niadtong mga tawo nga gibunyagan alang sa mga patay, kon ang mga patay dili man ugaling mabanhaw? Ngano man nga gibunyagan sila alang sa mga patay?

17 Ug usab, agi og sumpay niini nga kinutlo mohatag ako kaninyo og kinutlo gikan sa usa sa mga propeta, kinsa mitumong sa iyang panan-aw ngadto sa pagpahiuli sa pagkapari, sa mga himaya nga ipadayag sa kataposang mga adlaw, ug sa talagsaong paagi kini nga labing mahimayaon sa tanang hilisgotan nga nahiapil sa walay kataposang ebanghelyo, nga gitawag nga, ang bunyag alang sa mga patay; kay si Malaquias nag-ingon, sa kataposang kapitulo, mga bersikulo 5 ug 6: Tan-awa, ako mopadala kaninyo ni Elijah ang propeta sa dili pa moabot ang mahinungdanon ug makalilisang nga adlaw sa Ginoo: Ug siya mopabalik sa kasingkasing sa mga amahan ngadto sa mga anak, ug ang kasingkasing sa mga anak ngadto sa ilang mga amahan, basin unya ako moabot ug mohampak sa yuta uban sa tunglo.

18 Tingali makahatag unta ko og mas yano nga paghubad niini, apan igo na ang pagkayano niini aron mahiangay sa akong katuyoan niini karon. Igo na nga masayod, niini nga sitwasyon, nga ang yuta hampakon sa tunglo gawas kon adunay makatakdo nga sumpay sa bisan unsa nga matang tali sa mga amahan ug sa mga anak, mahitungod sa pipila o ubang hilisgotan—ug tan-awa unsa kana nga hilisgotan? Mao kana ang bunyag alang sa mga patay. Kay kita kon wala sila dili mahimo nga hingpit; ni sila kon wala kita mahimong hingpit. Wala kanila ni kanato ang mahingpit kon wala kadtong nangamatay usab diha sa ebanghelyo; kay gikinahanglan kini alang sa pagpasiuna sa dispensasyon sa kahingpitan sa mga panahon, diin nga dispensasyon karon nagsugod na, nga ang tibuok ug kompleto ug hingpit nga pagkahiusa, ug lig-on nga pagtakdo sa mga dispensasyon, ug mga yawe, ug mga gahom, ug mga himaya kinahanglan nga mahitabo, ug ipadayag gikan sa mga adlaw ni Adan bisan hangtod karon nga panahon. Ug dili lamang kini, apan kadtong mga butang nga wala pa gayod mapadayag gikan sa pagtukod sa kalibotan, apan gitagoan gikan sa maalamon ug mabuot, ipadayag ngadto sa mga bata ug mga masuso karon, ang dispensasyon sa kahingpitan sa mga panahon.

19 Karon, unsa pa ang atong nadungog mahitungod sa ebanghelyo nga atong nadawat? Ang tingog sa kalipay! Ang tingog sa kaluoy gikan sa langit; ug tingog sa kamatuoran gikan sa yuta; malipayong mga balita alang sa mga patay; ang tingog sa kalipay alang sa mga buhi ug sa mga patay; malipayon nga mga balita sa dakong kamaya. Pagkatahom sa ibabaw sa kabukiran sa mga tiil niadtong nanagdala sa mga maayong balita, nga nanagmantala sa pakigdait, nga nanagdala og mga maayong balita sa kaayohan, nga nanagmantala sa kaluwasan, nga nanag-ingon sa Zion: Ang imong Dios nagahari! Sama sa mga yamog sa Carmel, ang kahibalo mahitungod sa Dios mokunsad usab diha kanila!

20 Ug usab, unsa ang atong nadungog? Malipayong mga balita gikan sa Cumorah! Si Moroni, ang anghel gikan sa langit, nga nagpadayag sa katumanan sa mga propeta—ang basahon nga ipadayag. Ang tingog sa Ginoo sa kamingawan sa Fayette, lalawigan sa Seneca, nga nagpahayag sa tulo ka saksi nga mopamatuod sa basahon! Ang tingog ni Miguel sa mga baybayon sa Susquehanna, nga nagpaila sa yawa sa diha nga nagpakita siya nga sama sa anghel sa kahayag! Ang tingog nila ni Pedro, Santiago, ug Juan didto sa kamingawan taliwala sa Harmony, lalawigan sa Susquehanna, ug sa lungsod sa Colesville, lalawigan sa Broome, sa suba sa Susquehanna, nga nagpahayag sa ilang kaugalingon ingon nga naghupot sa mga yawe sa gingharian, ug sa dispensasyon sa kahingpitan sa panahon!

21 Ug usab, ang tingog sa Dios didto sa lawak sa tigulang nga si Amahang Whitmer, sa Fayette, lalawigan sa Seneca, ug sa nagkalainlaing panahon, ug sa nagkalainlaing dapit latas sa tanang panaw ug kalisdanan niini nga Ang Simbahan ni Jesukristo sa mga Santos sa Ulahing mga Adlaw! Ug ang tingog ni Miguel, ang arkanghel; ang tingog ni Gabriel, ug ni Rafael, ug sa nagkalain-lain nga mga anghel, gikan ni Miguel o ni Adan hangtod niini nga panahon, ang tanan nga nagpahayag sa ilang dispensasyon, sa ilang mga katungod, ilang mga yawe, ilang mga dungog, ilang pagkaharianon ug himaya, ug sa gahom sa ilang pagkapari; naghatag niini sa hinayhinay nga mga lakang, pagtulun-an human sa usa ka pagtulun-an; gamay dinhi, ug gamay didto; naghatag kanato og kahupayan pinaagi sa paglaom nianang moabot, nagpalig-on sa atong paglaom!

22 Kaigsoonan, dili ba kita mopadayon sa hilabihan ka mahinungdanon nga katuyoan? Padayon ug ayaw pagsibog. Pagmaisogon, kaigsoonan; ug padayon, padayon ngadto sa kadaogan! Pasadyaa ang inyong mga kasingkasing, ug paglipay sa hilabihan. Paawita og kalit ang yuta. Pasultiha ang mga patay sa mga awit sa walay kataposang pagdayeg ngadto ni Hari Immanuel, kinsa mi-orden, sa wala pa ang kalibotan, nianang makapahimo kanato sa pagtubos kanila gikan sa ilang bilanggoan; kay ang mga binilanggo mahimong gawasnon.

23 Pasinggita ang mga kabukiran sa kamaya, ug tanan kamo nga mga walog singgit og kusog; ug tanan kamo nga mga dagat ug uga nga mga yuta isulti ang mga kahibulongan sa inyong Mahangtoron nga Hari! Ug kamong mga suba, ug mga sapa, ug mga sapa-sapa, pagbaha kamo sa kalipay. Ang mga kalasangan ug ang tanang kakahoyan sa umahan padayega sa Ginoo; ug kamong lig-on nga mga bato mohilak sa kamaya! Ug ang adlaw, buwan, ug mga bitoon sa kabuntagon paawita nga magdungan, ug ang tanang anak sa Dios pasinggita sa kamaya! Ug ang mahangtorong mga nilalang pasangyawa sa iyang ngalan hangtod sa kahangtoran! Ug usab ako moingon, pagkamahimayaon sa tingog nga atong nadungog gikan sa langit, nga nagpahayag sa atong mga dunggan, himaya, ug kaluwasan, ug dungog, ug imortalidad, ug kinabuhing dayon; mga gingharian, kayutaan, ug mga kagamhanan!

24 Tan-awa, ang mahinungdanon nga adlaw sa Ginoo nagkaduol na; ug kinsa ang makalahutay sa adlaw sa iyang pag-anhi, ug kinsa ang makaharong sa panahon nga magpakita na siya? Kay sama siya sa kalayo sa magtutunaw, ug sama sa sabon sa maglalaba; ug molingkod siya sama sa magtutunaw ug tiglunsay sa pilak, ug himoon niyang lunsay ang mga anak ni Levi, ug hinloan sila sama sa bulawan ug pilak, aron mohalad sila sa Ginoo og usa ka halad sa pagkamatarong. Busa, kita, isip simbahan ug katawhan, ug isip mga Santos sa Ulahing mga Adlaw, mohalad sa Ginoo og usa ka halad sa pagkamatarong; ug mogasa kita sa sulod sa iyang balaan nga templo, sa panahon nga mahuman na kini, og usa ka basahon nga naglangkob sa mga talaan sa atong mga patay, nga takos alang sa tanang pagdawat.

25 Kaigsoonan, ako adunay daghang butang nga isulti kaninyo mahitungod sa maong hilisgotan; apan sa pagkakaron taposon, ug ipadayon ang hilisgotan sa laing higayon. Ako, sa kanunay, ang inyong mapainubsanon nga sulugoon ug matinud-anong higala,