Seksiyon 14
Pagpadayag nga gihatag pinaagi ni Joseph Smith ang Propeta ngadto kang David Whitmer sa Fayette, New York, Hunyo 1829. Ang pamilyang Whitmer nainteresado kaayo sa paghubad sa Basahon ni Mormon. Ang Propeta mipuyo sa panimalay ni Peter Whitmer, Sr., diin nagpuyo siya hangtod nga ang buhat sa paghubad nakompleto ug ang katungod sa pagkopya sa umaabot nga basahon nakuha na. Ang tulo sa mga anak nga lalaki ni Whitmer, matag usa nga nakadawat og pagpamatuod kabahin sa katinuod sa buhat, nabalaka kaayo mahitungod sa ilang tagsa-tagsa nga katungdanan. Kini nga pagpadayag ug ang duha nga nagsunod nga (mga seksiyon 15 ug 16) gihatag agi og tubag sa pangutana pinaagi sa Urim ug Thummim. Si David Whitmer sa wala madugay nahimo nga usa sa Tulo ka Saksi sa Basahon ni Mormon.
1–6, Ang mga mamumuo sa ubasan makabaton og kaluwasan; 7–8, Ang kinabuhing dayon mao ang labing mahinungdanon sa mga gasa sa Dios; 9–11, Si Kristo ang naglalang sa kalangitan ug sa yuta.
1 Usa ka mahinungdanon ug katingalahan nga buhat hapit na moabot taliwala sa mga anak sa katawhan.
2 Tan-awa, ako ang Dios; paminaw sa akong pulong, nga buhi ug gamhanan, hait pa kaysa espada nga duhay suwab, ngadto sa pagbahin sa mga lutahan ug kauyokan; busa paminaw sa akong pulong.
3 Tan-awa, ang umahan puti na ug andam na aron anihon; busa, kadtong nagtinguha sa pag-ani, tugoti nga siya mohapos gamit ang iyang galab pinaagi sa iyang kusog, ug mag-ani samtang aduna pay panahon, nga siya motipig alang sa iyang kalag og walay kataposan nga kaluwasan sa gingharian sa Dios.
4 Oo, kinsa kadtong mohapos gamit ang iyang galab ug moani, ang maong tawo gitawag sa Dios.
5 Busa, kon ikaw mangayo kanako ikaw makadawat; kon ikaw motuktok ikaw pagaablihan.
6 Tinguhaa ang pagpatungha ug pagtukod sa akong Zion. Sunda ang akong mga sugo sa tanang butang.
7 Ug, kon sundon nimo ang akong mga sugo ug molahutay sa kataposan mabatonan nimo ang kinabuhing dayon, ang gasa nga labing mahinungdanon sa tanang gasa sa Dios.
8 Ug mahitabo, nga kon ikaw mangayo sa Amahan pinaagi sa akong ngalan, inubanan sa pagtuo, imong madawat ang Espiritu Santo, nga maoy modasig, aron ikaw mobarog isip saksi sa mga butang nga imong madungog ug makita, ug aron ikaw makapamahayag usab og paghinulsol ngadto niini nga henerasyon.
9 Tan-awa, ako si Jesukristo, ang Anak sa buhi nga Dios, nga naglalang sa kalangitan ug sa yuta, usa ka kahayag nga dili matago sa kangitngit;
10 Mao nga, kinahanglan nga akong dad-on ang kahingpitan sa akong ebanghelyo gikan sa mga Hentil ngadto sa balay ni Israel.
11 Ug tan-awa, ikaw si David, ug gitawag ikaw sa pagtabang; sa butang nga kon imong buhaton, ug magmatinud-anon, ikaw panalanginan sa espirituhanon ug temporal nga paagi, ug dako ang imong ganti. Amen.