Seksiyon 15
Pagpadayag nga gihatag pinaagi ni Joseph Smith ang Propeta ngadto ni John Whitmer, sa Fayette, New York, Hunyo 1829 (tan-awa sa ulohan sa seksiyon 14). Ang mensahe hilabihan ka personal nga niana gisulti sa Ginoo ang butang nga si John Whitmer lang ug Siya Mismo ang nahibalo. Si John Whitmer sa kaulahian nahimong usa sa Walo ka Saksi sa Basahon ni Mormon.
1–2, Ang gahom sa Ginoo anaa sa tibuok yuta; 3–6, Ang pagsangyaw sa ebanghelyo ug pagluwas sa mga kalag mao ang butang nga labing bililhon.
1 Patalinghog, akong sulugoon nga John, ug paminaw sa mga pulong ni Jesukristo, nga imong Ginoo ug imong Manunubos.
2 Kay tan-awa, namulong ako kanimo uban sa kahait ug sa gahom, kay ang akong gahom anaa sa tibuok yuta.
3 Ug sultihan ko ikaw og butang nga walay tawo nga nasayod gawas kanako ug kanimo lamang—
4 Kay sa makadaghang higayon nagtinguha ka gikan kanako nga masayod nianang labing bililhon kanimo.
5 Tan-awa, bulahan ka tungod niini nga butang, ug tungod sa pagpahayag sa akong mga pulong nga akong gihatag kanimo sumala sa akong mga sugo.
6 Ug karon, tan-awa, sultihan ko ikaw, nga ang butang nga labing bililhon kanimo mao ang pagpahayag og paghinulsol niini nga katawhan, nga imong madala ang mga kalag ngari kanako, nga ikaw makapahulay uban kanila sa gingharian sa akong Amahan. Amen.