Seksiyon 16
Pagpadayag nga gihatag pinaagi ni Joseph Smith ang Propeta ngadto kang Peter Whitmer Jr., sa Fayette, New York, Hunyo 1829 (tan-awa ang ulohan sa seksiyon 14). Si Peter Whitmer Jr. sa wala madugay nahimong usa sa Walo ka Saksi sa Basahon ni Mormon.
1–2, Ang gahom sa Ginoo anaa sa tibuok yuta; 3–6, Ang pagsangyaw sa ebanghelyo ug pagluwas sa mga kalag mao ang butang nga labing bililhon.
1 Patalinghog, akong sulugoon nga Peter, ug paminaw sa mga pulong ni Jesukristo, ang imong Ginoo ug imong Manunubos.
2 Kay tan-awa, ako mamulong kanimo uban sa kahait ug uban sa gahom, kay ang akong gahom anaa sa tibuok yuta.
3 Ug sultihan ko ikaw og butang nga walay laing tawo nga nasayod gawas kanako ug kanimo lamang—
4 Kay sa makadaghang higayon nagtinguha ka gikan kanako nga masayod nianang labing bililhon kanimo.
5 Tan-awa, bulahan ka tungod niini nga butang, ug tungod sa pagpahayag sa akong mga pulong nga akong gihatag kanimo sumala sa akong mga sugo.
6 Ug karon, tan-awa, sultihan ko ikaw, nga ang butang nga labing bililhon kanimo mao ang pagpahayag og paghinulsol niini nga katawhan, nga makadala ka og mga kalag ngari kanako, nga ikaw makapahulay uban kanila sa gingharian sa akong Amahan. Amen.