Seksiyon 24
Pagpadayag nga gihatag ngadto ni Joseph Smith ang Propeta ug ngadto ni Oliver Cowdery, didto sa Harmony, Pennsylvania, sa Hulyo 1830. Bisan tuod og wala pa molabay ang upat ka bulan sukad natukod ang Simbahan, ang pagpanggukod migrabe pag-ayo, ug ang mga lider kinahanglan mangita og seguridad pinaagi sa pagpalayo gikan sa mga tawo. Ang mosunod nga tulo ka pagpadayag gihatag niini nga panahon aron sa paglig-on, pagdasig, ug pagtudlo kanila.
1–9, Si Joseph Smith gitawag sa paghubad, pagsangyaw, ug pagpasabot sa mga kasulatan; 10–12, Si Oliver Cowdery gitawag sa pagsangyaw sa ebanghelyo; 13–19, Ang balaod gipadayag kalabot sa mga milagro, mga pagtunglo, pagtaktak sa abog sa tiil, ug pagbiyahe nga walay dala nga puntil o balon.
1 Tan-awa, ikaw gitawag ug gipili sa pagsulat sa Basahon ni Mormon, ug sa akong pangalagad; ug ikaw akong gibayaw gikan sa imong mga kasakit, ug mitambag kanimo, nga ikaw giluwas gikan sa imong tanan nga kaaway, ug ikaw giluwas gikan sa mga gahom ni Satanas ug gikan sa kangitngit!
2 Bisan pa niana, ikaw dili mapasaylo sa imong mga kalapasan; bisan pa niana, padayon ug ayaw na pagpakasala.
3 Palamboa ang imong katungdanan; ug human ikaw makapugas sa imong umahan ug makanalipod niini, lakaw dayon ngadto sa simbahan sa Colesville, Fayette, ug Manchester, ug sila mosuporta kanimo; ug ako mopanalangin kanila sa espirituwal ug sa temporal nga paagi;
4 Apan kon sila dili modawat kanimo, akong ipadala ngadto kanila ang tunglo imbes panalangin.
5 Ug ikaw mopadayon sa pagtawag sa Dios pinaagi sa akong ngalan, ug mosulat sa mga butang nga ihatag kanimo pinaagi sa Maghuhupay, ug mopasabot sa tanang kasulatan ngadto sa simbahan.
6 Ug ihatag diha kanimo niana gayod nga higayon unsay imong ipamulong ug isulat, ug maminaw sila niini, o ako mopadala ngadto kanila og tunglo imbes panalangin.
7 Kay ikaw mohalad sa imong tanan nga pagserbisyo diha sa Zion; ug tungod niini ikaw makabaton og kusog.
8 Pagpailob sa mga kasakit, kay ikaw makasinati og daghan; apan antosa kini, kay, tan-awa, magauban ako kanimo, gani hangtod sa kataposan sa imong mga adlaw.
9 Ug sa temporal nga mga paghago ikaw dili makabaton og kusog, kay kini dili imong balaan nga tawag. Buhata ang imong balaan nga tawag ug maangkon nimo unsay imong gikinahanglan sa imong katungdanan, ug sa pagpasabot sa tanang kasulatan, ug pagpadayon sa pagpandong sa mga kamot ug pagpalig-on sa mga simbahan.
10 Ug ang imong igsoon nga si Oliver mopadayon sa pagpamatuod sa akong ngalan sa atubangan sa kalibotan, ug usab sa simbahan. Ug dili siya magdahom nga makasulti siya og daghan mahitungod sa akong kawsa; ug tan-awa, magauban ako kaniya hangtod sa kataposan.
11 Ngari kanako siya makabaton og himaya, ug dili sa iyang kaugalingon, bisan sa kahuyang o sa kalig-on, bisan sa pagkaulipon o pagkagawasnon;
12 Ug sa tanang panahon, ug sa tanang dapit, siya mobuka sa iyang ba-ba ug mopahayag sa akong ebanghelyo sama sa tingog sa usa ka trumpeta, sa adlaw ug gabii. Ug hatagan ko siya og kusog nga wala pa mahibaloi taliwala sa katawhan.
13 Ayaw pangayo og mga milagro, gawas kon ako mosugo kaninyo, gawas sa paghingilin sa mga yawa, pagpang-ayo sa mga masakiton, ug batok sa makahilo nga mga bitin, ug batok sa makapatay nga mga hilo;
14 Ug kining mga butanga dili ninyo buhaton, gawas kon kini gikinahanglan gikan kaninyo sa mga tawo nga nagtinguha niini, nga ang mga kasulatan matuman; kay kamo magbuhat sumala niana nga nahisulat.
15 Ug bisan asa nga dapit kamo mosulod, ug sila dili modawat kaninyo sa akong ngalan, kamo mobilin og tunglo imbes panalangin, pinaagi sa pagtaktak sa mga abog sa inyong mga tiil batok kanila isip usa ka pagpamatuod, ug paglimpyo sa inyong mga tiil diha sa daplin sa agianan.
16 Ug mahitabo nga si bisan kinsa ang mobakyaw sa ilang mga kamot diha kaninyo pinaagi sa kapintas, kamo momando nga pagahampakon pinaagi sa akong ngalan; ug, tan-awa, ako mosilot kanila sumala sa inyong mga pulong, sa akong kaugalingong tukma nga panahon.
17 Ug si bisan kinsa nga modangop sa balaod uban kaninyo pagatunglohon pinaagi sa balaod.
18 Ug kamo dili modala og puntil ni putos sa pagkaon, ni mga sungkod, ni duha ka kupo, kay ang simbahan mohatag kaninyo niana gayod nga takna unsa ang inyong gikinahanglan nga pagkaon ug sapot, ug mga sapatos ug kwarta, ug balon.
19 Kay kamo gitawag sa pagpul-ong sa akong ubasan uban sa gamhanan nga pagpul-ong, oo, gani alang sa kataposan nga higayon; oo, ug usab ngadto sa tanan nga inyong i-orden, ug sila mohimo sumala niini nga paagi. Amen.