Seksiyon 27
Pagpadayag nga gihatag ngadto ni Joseph Smith ang Propeta, sa Harmony, Pennsylvania, Agosto 1830. Agi og pagpangandam alang sa relihiyoso nga mga tulumanon diin ang pan ug bino sa sakramento ipangalagad, si Joseph milakaw aron sa pagkuha og bino. Gisugat siya sa usa ka langitnon nga mensahero ug nakadawat niini nga pagpadayag, ang tipik nga gisulat niana nga panahon ug ang nahibilin sa Septiyembre nga misunod. Tubig na karon ang gigamit imbes nga bino sa mga pangalagad sa sakramento sa Simbahan.
1–4, Ang mga simbolo nga gamiton sa pag-ambit sa sakramento gipasabot; 5–14, Si Kristo ug ang Iyang mga sulugoon gikan sa tanan nga dispensasyon kinahanglan nga moambit sa sakramento; 15–18, Isul-ob ang tibuok nga taming sa Dios.
1 Paminawa ang tingog ni Jesukristo, imong Ginoo, imong Dios, ug imong Manunubos, kansang mga pulong buhi ug gamhanan.
2 Kay, tan-awa, sultihan ko kamo, nga dili importante unsay inyong kan-on o unsay inyong imnon kon ikaw moambit sa sakramento, kon kamo mobuhat niini uban sa bug-os nga tinguha ngadto sa akong himaya—maghinumdom sa Amahan sa akong lawas nga gitugyan alang kaninyo, ug sa akong dugo nga gipaagas alang sa kapasayloan sa inyong mga sala.
3 Mao nga, usa ka sugo akong ihatag kaninyo, nga kamo dili mopalit og bino ni maisog nga ilimnon gikan sa inyong mga kaaway;
4 Mao nga, dili kamo moambit gawas kon kini gihimo nga bag-o diha kaninyo; oo, ug niini ang gingharian sa akong Amahan pagatukoron dinhi sa yuta.
5 Tan-awa, kini kaalam ngari kanako; mao nga, ayaw kahibulong, kay ang takna moabot nga ako moinom sa bunga sa ubas uban kaninyo ibabaw sa yuta, ug uban ni Moroni, nga akong gipadala nganha kaninyo sa pagpadayag sa Basahon ni Mormon, nga naglakip sa kahingpitan sa akong walay kataposan nga ebanghelyo, nga akong gitugyanan sa mga yawe sa rekord sa sungkod ni Ephraim;
6 Ug usab uban ni Elias, nga akong gitugyanan sa mga yawe sa pagpahitabo sa pagpahiuli sa tanan nga butang nga gipamulong sa ba-ba sa tanang balaan nga mga propeta sukad sa sinugdanan sa kalibotan, mahitungod sa kataposang mga adlaw;
7 Ug usab ni Juan ang anak nga lalaki ni Zacarias, kinsang Zacarias nga iyang (si Elias) giduaw ug gisaaran nga makabaton og usa ka anak nga lalaki, ug ang iyang ngalan mao si Juan, ug siya mapuno sa espiritu ni Elias;
8 Diin nga Juan gipadala nako nganha kaninyo, akong mga sulugoon, Joseph Smith, Jun., ug Oliver Cowdery, sa pag-orden kaninyo ngadto sa unang pagkapari nga inyong nadawat, nga kamo pagatawagon ug ordinahan sama ni Aaron;
9 Ug usab ni Elijah, nga akong gitugyanan sa mga yawe sa gahom sa pagpabalik sa mga kasingkasing sa mga amahan ngadto sa mga anak, ug sa mga kasingkasing sa mga anak ngadto sa ilang mga amahan, aron ang tibuok kalibotan dili unta hampakon sa usa ka tunglo;
10 Ug usab uban ni Jose ug Jacob, ug Isaac, ug Abraham, ang inyong mga amahan, diin ang mga saad nagpabilin;
11 Ug usab uban ni Miguel, o Adan, ang amahan sa tanan, ang prinsipe sa tanan, ang labing tigulang sa tanan;
12 Ug usab uban ni Pedro, ug Santiago, ug Juan, nga akong gipadala nganha kaninyo, nga pinaagi kanila ako mi-orden kaninyo ug mikompirma kaninyo nga mahimong apostoles, ug talagsaong mga saksi sa akong ngalan, ug naggunit sa mga yawe sa inyong pangalagad ug sa samang mga butang nga akong gipadayag ngadto kanila;
13 Ngadto kanila nga akong gitugyanan sa mga yawe sa akong gingharian, ug sa dispensasyon sa ebanghelyo sa kataposang higayon; ug alang sa kahingpitan sa mga panahon, niana akong pundokon sa usa ka dapit ang tanan nga butang, nga anaa sa langit, ug anaa sa yuta;
14 Ug usab uban niadtong tanan nga gihatag sa akong Amahan kanako gikan sa kalibotan.
15 Mao nga, lipaya ang inyong mga kasingkasing ug pagmaya, ug baksi ang inyong mga bat-ang, ug isul-ob ninyo ang akong tibuok nga taming, aron kamo makasugakod sa daotan nga adlaw, human makabuhat sa tanan, nga kamo makahimo sa pagbarog.
16 Busa, barog, nga binaksan ang inyong mga bat-ang sa kamatuoran, nga gisul-oban sa taming sa pagkamatarong, ug ang inyong mga tiil hinapinan pinaagi sa pagpangandam sa ebanghelyo sa kalinaw, nga akong gipadala sa akong mga anghel aron isalig diha kaninyo;
17 Magdala sa panagang sa pagtuo diin inyong mabuntog ang tanang nagdilaab nga mga pana sa daotan;
18 Ug dad-a ang helmet sa kaluwasan, ug ang espada sa akong Espiritu, nga akong ibu-bo kaninyo, ug ang akong pulong nga akong ipadayag kaninyo, ug pagauyonan kabahin sa tanang bisan unsa nga butang nga inyong pangayoon kanako, ug pagmatinud-anon hangtod nga ako moanhi, ug kamo pagadad-on, nga kon hain ako kamo atua usab. Amen.