Seksiyon 28
Pagpadayag nga gihatag pinaagi ni Joseph Smith ang Propeta ngadto ni Oliver Cowdery, sa Fayette, New York, Septiyembre 1830. Si Hiram Page, usa ka miyembro sa Simbahan, adunay usa ka bato ug nangangkon nga nakadawat og mga pagpadayag pinaagi sa tabang niini kabahin sa pagtukod sa Zion ug sa paagi sa pag-organisar sa Simbahan. Daghang miyembro ang nalingla tungod niini nga mga pangangkon, ug gani si Oliver Cowdery nasaypan nga naimpluwensya niini. Sa wala pa moabot ang gitakda nga komperensiya, ang Propeta seryoso nga nangutana sa Ginoo mahitungod niini, ug kini nga pagpadayag misunod.
1–7, Si Joseph Smith naghupot sa mga yawe sa mga misteryo, ug siya lamang ang makadawat og mga pagpadayag alang sa Simbahan; 8–10, Si Oliver Cowdery kinahanglan mosangyaw ngadto sa mga Lamanita; 11–16, Si Satanas milingla ni Hiram Page ug mihatag kaniya og bakak nga mga pagpadayag.
1 Tan-awa, sultihan ko ikaw, Oliver, nga kini ihatag nganha kanimo aron ikaw patalinghogan sa simbahan sa tanang butang bisan unsa ang imong itudlo kanila pinaagi sa Maghuhupay, kabahin sa mga pagpadayag ug mga sugo nga akong gihatag.
2 Apan, tan-awa, sa pagkatinuod, sa pagkatinuod, sultihan ko ikaw, walay lain nga pagapilion nga makadawat og mga sugo ug mga pagpadayag niini nga simbahan gawas sa akong sulugoon nga si Joseph Smith, Jun., kay siya makadawat niini sama ni Moises.
3 Ug ikaw magmasulundon sa mga butang nga akong ihatag ngadto kaniya, bisan sama ni Aaron, sa pagpahayag nga matinud-anon sa mga sugo ug mga pagpadayag, uban ang gahom ug awtoridad ngadto sa simbahan.
4 Ug kon ikaw giyahan sa bisan unsa nga panahon sa Maghuhupay sa pagpamulong o pagtudlo, o sa tanang higayon pinaagi sa sugo ngadto sa simbahan, ikaw magbuhat niini.
5 Apan ikaw dili mosulat nga ipaagi sa usa ka sugo, apan pinaagi sa kaalam;
6 Ug ikaw dili mosugo kaniya kinsa imong pangulo, ug ang pangulo sa simbahan;
7 Kay gihatag nako kaniya ang mga yawe sa mga misteryo, ug mga pagpadayag nga giselyohan, hangtod nga ako motudlo ngadto kanila og lain puli sa iyang dapit.
8 Ug karon, tan-awa, sultihan ko ikaw nga moadto ka sa mga Lamanita ug mosangyaw sa akong ebanghelyo ngadto kanila; ug kon sila modawat sa imong mga pagtudlo imong tukoron ang akong simbahan didto kanila; ug ikaw makadawat og mga pagpadayag, apan ayaw kini isulat nga ipaagi sa usa ka sugo.
9 Ug karon, tan-awa, sultihan ko ikaw nga kini wala ipadayag, ug walay tawo nga nasayod asa tukoron ang siyudad sa Zion, apan ihatag kini sa dili madugay. Tan-awa, sultihan ko ikaw nga kini anaa sa mga utlanan sa mga Lamanita.
10 Kinahanglan nga dili ka mobiya niini nga dapit hangtod human sa komperensiya; ug ang akong sulugoon nga si Joseph matudlo nga mao ang modumala sa komperensiya pinaagi sa tingog niini, ug unsa ang iyang isulti kanimo mao ang imong isulti.
11 Ug usab, ikaw modala sa imong igsoon, si Hiram Page, tali kaniya ug kanimo lamang, ug sultihi siya nga kadtong mga butang nga iyang gisulat gikan niana nga bato dili gikan kanako ug nga si Satanas milingla kaniya;
12 Kay, tan-awa, kini nga mga butang wala pa ihatag ngadto kaniya, ni bisan unsa nga butang ihatag ngadto ni bisan kinsa niini nga simbahan nga supak sa mga pakigsaad sa simbahan.
13 Kay ang tanan nga butang kinahanglan gayod himoon sa kahusay, ug pinaagi sa pag-uyon sa tanan diha sa simbahan, pinaagi sa pag-ampo sa pagtuo.
14 Ug ikaw motabang sa paghusay niniing tanan nga butang, sumala sa mga pakigsaad sa simbahan, sa dili pa ikaw mobiyahe ngadto sa mga Lamanita.
15 Ug kini ihatag kanimo gikan sa higayon nga ikaw molakaw, hangtod sa higayon nga ikaw mobalik, unsa ang imong buhaton.
16 Ug ikaw kinahanglan nga moabli sa imong ba-ba sa tanan nga higayon, mopahayag sa akong ebanghelyo uban sa tingog sa pagmaya. Amen.