Seksiyon 3
Pagpadayag nga gihatag ngadto ni Joseph Smith ang Propeta, didto sa Harmony, Pennsylvania, Hulyo 1828, nga may kalabotan sa pagkawala sa 116 ka pahina sa manuskrito nga gihubad gikan sa unang bahin sa Basahon ni Mormon, nga gitawag og basahon ni Lehi. Ang Propeta nagduhaduha sa pagtugot nga ipahulam kini nga mga pahina ngadto kang Martin Harris gikan sa iyang pag-atiman, kinsa nakaalagad sa mubo nga panahon isip tigsulat sa paghubad sa Basahon ni Mormon. Ang pagpadayag gihatag pinaagi sa Urim ug Thummim. (Tan-awa sa seksiyon 10.)
1–4, Ang katuyoan sa Ginoo nagsubay sa usa ka mahangtorong agianan nga walay pagkausab; 5–15, Si Joseph Smith kinahanglang maghinulsol o mawad-an sa gasa sa paghubad; 16–20, Ang Basahon ni Mormon motungha aron sa pagluwas sa binhi ni Lehi.
1 Ang mga buhat, ug mga laraw, ug ang mga katuyoan sa Dios dili gayod mapakyas, ni kini makawang.
2 Kay ang Dios dili molakaw sa hiwi nga mga dalan, ni siya moliko padulong sa tuo ni sa wala, ni siya mosimang gikan sa iyang nasulti, busa ang iyang mga dalan tul-id ug ang iyang katuyoan nagsubay sa usa ka mahangtorong agianan nga walay pagkausab.
3 Hinumdomi, hinumdomi nga dili ang buhat sa Dios ang mapakyas, apan ang buhat sa mga tawo;
4 Kay bisan pa kon ang tawo adunay daghang pagpadayag, ug adunay gahom sa pagbuhat sa daghang gamhanan nga mga buhat, apan kon siya manghambog sa iyang kaugalingong kusog, ug mobaliwala sa mga tambag sa Dios, ug mosunod sa mga mando sa iyang kaugalingong kabubut-on ug sa lawasnong mga tinguha, siya mapukan gayod ug mahiagom sa panimalos sa makiangayon nga Dios nganha kaniya.
5 Tan-awa, gitugyanan ikaw niini nga mga butang, apan pagkahigpit sa imong mga sugo; ug hinumdomi usab ang mga saad nga gihimo nganha kanimo, kon ikaw wala makalapas niini.
6 Ug tan-awa, pagkadaghang higayon nga ikaw nakalapas sa mga sugo ug sa mga balaod sa Dios, ug nadala sa mga pagdani sa mga tawo.
7 Kay, tan-awa, wala unta nimo kahadloki ang tawo kay sa Dios. Bisan pa kon ang mga tawo mibaliwala sa mga tambag sa Dios, ug mitamay sa iyang mga pulong—
8 Bisan pa, angay unta nga ikaw nagmatinud-anon; ug siya unta mitunol sa iyang bukton ug mitabang kanimo batok sa tanang nagdilaab nga mga pana sa kaaway; ug nakig-uban unta siya kanimo sa matag panahon sa kasamok.
9 Tan-awa, ikaw si Joseph, ug ikaw gipili sa pagbuhat sa buluhaton sa Ginoo, apan tungod sa kalapasan, kon dili ikaw magmabinantayon ikaw mapukan.
10 Apan hinumdomi, maluluy-on ang Dios; busa, hinulsoli kana nga imong nabuhat nga supak sa sugo nga akong gihatag kanimo, ug ikaw pinili sa gihapon, ug sa makausa pa tawagon ikaw ngadto sa buhat;
11 Gawas kon imo kining buhaton, ikaw pagabiyaan ug mahimo nga sama sa ubang mga tawo, ug dili na makabaton og gasa.
12 Ug kon itugyan nimo sa uban kini nga butang nga gipakita kanimo sa Dios ug gihatagan ka og gahom sa paghubad, imong gitugyan kanang butang nga sagrado ngadto sa mga kamot sa tawo nga daotan,
13 Kinsa nagbaliwala sa mga tambag sa Dios, ug nakalapas sa labing sagrado nga mga saad nga gihimo sa atubangan sa Dios, ug misalig sa iyang kaugalingong paghukom ug nagpasigarbo sa iyang kaugalingong kaalam.
14 Ug kini ang hinungdan nga ikaw nawad-an sa imong mga kahigayonan sulod sa usa ka panahon—
15 Kay imong gitugotan ang tambag sa imong magmamando nga pagatunob-tunoban gikan sa sinugdanan.
16 Bisan pa niana, ang akong buhat magpadayon, kay sama nga ang kahibalo sa Manluluwas miabot sa kalibotan, pinaagi sa pagpamatuod sa mga Judeo, sa samang paagi ang kahibalo mahitungod sa Manluluwas moabot sa akong katawhan—
17 Ug ngadto sa mga Nephita, ug sa mga Jacobita, ug sa mga Josephita, ug sa mga Zoramita, pinaagi sa pagpamatuod sa ilang mga amahan—
18 Ug kini nga pagpamatuod mahibaloan sa mga Lamanita, ug sa mga Lemuelita, ug sa mga Ishmaelita, kinsa mikunhod sa pagkawalay pagtuo tungod sa pagkadaotan sa ilang mga amahan, kinsa gitugotan sa Ginoo nga molaglag sa kaigsoonan nilang mga Nephita, tungod sa ilang mga pagkadaotan ug sa ilang mga pagkasalawayon.
19 Ug tungod niining piho nga katuyoan kining mga palid gitipigan, nga naglangkob niining mga talaan—nga ang mga saad sa Ginoo matuman, nga iyang gihimo ngadto sa iyang katawhan;
20 Ug nga ang mga Lamanita unta makaangkon og kasayoran mahitungod sa ilang mga amahan, ug nga sila mahibalo sa mga saad sa Ginoo, ug nga sila motuo sa ebanghelyo ug mosalig sa mga kamaayo ni Jesukristo, ug pagahimayaon pinaagi sa pagtuo sa iyang ngalan, ug nga pinaagi sa ilang paghinulsol maluwas sila. Amen.