Seksiyon 30
Pagpadayag nga gihatag pinaagi ni Joseph Smith ang Propeta ngadto kang David Whitmer, Peter Whitmer Jr., ug John Whitmer, sa Fayette, New York, Septiyembre 1830, human sa tulo ka adlaw nga komperensiya sa Fayette, apan sa wala pa magbulag ang mga elder sa Simbahan. Sa sinugdanan kini nga materyal gimantala isip tulo ka pagpadayag; kini giusa sa Propeta ngadto sa usa ka seksiyon alang sa 1835 nga edisyon sa Doktrina ug mga Pakigsaad.
1–4, Si David Whitmer gikasab-an tungod sa pagkapakyas sa pagserbisyo nga makugihon; 5–8, Si Peter Whitmer Jr. mokuyog ni Oliver Cowdery sa usa ka misyon ngadto sa mga Lamanita; 9–11, Si John Whitmer gitawag sa pagsangyaw sa ebanghelyo.
1 Tan-awa, sultihan ko ikaw, David, nga ikaw nahadlok sa tawo ug wala mosalig kanako alang sa kalig-on nga imong gitinguha.
2 Apan ang imong hunahuna anaa sa mga butang sa kalibotan labaw sa mga butang nga anaa kanako, ang imong Magbubuhat, ug sa pagpangalagad diin ikaw gitawag; ug ikaw wala maminaw sa akong Espiritu, ug niadtong gipahimutang labaw kanimo, apan nakabig niadtong kinsa wala nako sugoa.
3 Mao nga, ikaw magpabilin nga mangutana alang sa imong kaugalingon gikan kanako, ug mamalandong sa mga butang nga imong nadawat.
4 Ug ang imong pinuy-anan anha sa balay sa imong amahan, hangtod ako mohatag kanimo og dugang pa nga mga sugo. Ug ikaw moatiman sa pagpangalagad sa simbahan, ug sa kalibotan, ug sa palibot nga mga rehiyon. Amen.
5 Tan-awa, sultihan ko ikaw, Peter, nga ikaw mobiyahe kauban sa imong igsoon nga si Oliver; kay ang panahon miabot na nga angay na ngari kanako nga ikaw moabli sa imong ba-ba sa pagpahayag sa akong ebanghelyo; busa, ayaw kahadlok, apan paminawa ang mga pulong ug tambag sa imong igsoon, nga iyang ihatag kanimo.
6 Ug ikaw mag-antos sa iyang tanang kasakitan, kanunay nga itumong ang imong kasingkasing ngari kanako pinaagi sa pag-ampo ug sa pagtuo, alang kaniya ug sa imong kaluwasan; kay gihatag nako kaniya ang gahom sa pagtukod sa akong simbahan taliwala sa mga Lamanita;
7 Ug walay usa nga akong gitudlo nga mahimo nga iyang magtatambag labaw kaniya sa simbahan, mahitungod sa mga butang sa simbahan, gawas sa iyang igsoon, si Joseph Smith, Jun.
8 Mao nga, paminawa kining mga butanga ug pagmakugihon sa pagtuman sa akong mga sugo, ug ikaw panalanginan og kinabuhing dayon. Amen.
9 Tan-awa, sultihan ko ikaw, akong sulugoon nga John, nga mosugod ikaw gikan niini nga panahon sa pagpahayag sa akong ebanghelyo, uban sa tingog sa trumpeta.
10 Ug ang imong paghago anha sa imong igsoon nga si Philip Burroughs, ug sa palibot niana nga rehiyon, oo, bisan asa ikaw nga madunggan, hangtod nga ako momando kanimo sa paglakaw gikan dinha.
11 Ug ang imong tibuok nga kahago anaa sa Zion, uban sa imong tibuok nga kalag, gikan karon; oo, ikaw gayod mobuka sa imong ba-ba alang kanako, nga walay kahadlok kon unsay buhaton sa tawo, kay ako mag-uban kanimo. Amen.