Seksiyon 33
Pagpadayag nga gihatag pinaagi ni Joseph Smith ang Propeta ngadto kang Ezra Thayre ug Northrop Sweet, didto sa Fayette, New York, Oktubre 1830. Sa pagpaila niini nga pagpadayag, ang kasaysayan ni Joseph Smith nagpamatuod nga “ang Ginoo … kanunay nga andam sa pagtudlo niadtong makugihon nga nangita pinaagi sa pagtuo.”
1–4, Ang mga mamumuo gitawag sa pagpahayag sa ebanghelyo sa ikanapulo ug usa nga takna; 5–6, Ang Simbahan natukod, ug ang mga pinili pagapundokon; 7–10, Paghinulsol kay ang gingharian sa langit haduol na; 11–15, Ang Simbahan gitukod diha sa bato sa ebanghelyo; 16–18, Pag-andam alang sa pag-anhi sa Pamanhonon.
1 Tan-awa, sultihan ko kamo, akong mga sulugoong Ezra ug Northrop, ablihi ang inyong mga dalunggan ug patalinghogi ang tingog sa Ginoo nga inyong Dios, kansang pulong buhi ug makagagahom, mas hait pa kay sa duhay suwab nga espada, ngadto sa pagkabulagbulag sa lain-laing bahin sa mga lutahan ug uyok sa bukog, sa kalag ug espiritu; ug tigpasabot sa mga hunahuna ug mga tinguha sa kasingkasing.
2 Kay sa pagkatinuod, sa pagkatinuod, sultihan ko kamo nga kamo gitawag aron ipalanog ang inyong mga tingog sama sa tingog sa trumpeta, sa pagpahayag sa akong ebanghelyo ngadto sa hiwi ug masinupakon nga kaliwatan.
3 Kay tan-awa, puti na ang umahan ug andam na nga anihon; ug kini ang ikanapulo og usa nga takna, ug ang kataposang higayon nga ako motawag og mga mamumuo sa akong ubasan.
4 Ug ang akong ubasan nahimong dili maayo sa tanang bahin; ug walay nahibilin nga nagbuhat og maayo gawas sa pipila lamang; ug nasayop sila sa daghang higayon tungod sa mga panapi sa mga kaparian, ang tanan adunay daotang mga hunahuna.
5 Ug sa pagkatinuod, sa pagkatinuod, sultihan ko kamo, nga kini nga simbahan akong gitukod ug gitawag gikan sa kamingawan.
6 Ug bisan pa niana akong pundokon ang akong mga pinili gikan sa upat ka suok sa yuta, gani kutob sa motuo kanako, ug mopatalinghog sa akong tingog.
7 Oo, sa pagkatinuod, sa pagkatinuod, sultihan ko kamo, nga puti na ang umahan ug andam na nga anihon; mao nga, igalab ang inyong mga sanggot, ug mag-ani sa tibuok ninyong gahom, hunahuna ug kusog.
8 Bukha ang inyong mga ba-ba ug kini mapuno, ug kamo mahisama kang Nephi sa karaan, kinsa mipanaw gikan sa Jerusalem ngadto sa kamingawan.
9 Oo, bukha ang inyong mga ba-ba ug ayaw pagpanagana, ug kamo magpas-an og mga binugkos sa inyong mga likod, kay tan-awa, ubanan ko kamo.
10 Oo, bukha ang inyong mga ba-ba ug kini mapuno, nga mag-ingon: Paghinulsol, paghinulsol, ug andama ninyo ang agianan sa Ginoo, ug himoa nga tul-id ang iyang mga agianan; kay ang gingharian sa langit haduol na;
11 Oo, paghinulsol ug pagpabunyag, matag usa kaninyo, alang sa kapasayloan sa inyong mga sala; oo, pagpabunyag gani sa tubig, ug unya moabot ang pagbunyag sa kalayo ug sa Espiritu Santo.
12 Tan-awa, sa pagkatinuod, sa pagkatinuod, sultihan ko kamo, kini ang akong ebanghelyo; ug hinumdomi nga sila kinahanglan adunay pagtuo kanako o dili gayod sila maluwas sa laing paagi;
13 Ug sa ibabaw niini nga bato akong itukod ang akong simbahan; oo, sa ibabaw niini nga bato kamo gitukod, ug kon magpadayon kamo, ang mga ganghaan sa impyerno dili makabuntog batok kaninyo.
14 Ug kinahanglan hinumdoman ninyo ang mga artikulo ug mga pakigsaad sa simbahan aron sundon kini.
15 Ug kinsa kadtong adunay pagtuo inyong kompirmahan sa akong simbahan, pinaagi sa pagpandong sa mga kamot, ug akong itugyan ang gasa sa Espiritu Santo diha kanila.
16 Ug ang Basahon ni Mormon ug ang balaang mga kasulatan akong gihatag alang sa inyong instruksiyon; ug ang gahom sa akong Espiritu mopalihok sa tanan nga butang.
17 Mao nga, pagmatinud-anon, pag-ampo kanunay, nga ang inyong mga lampara maandam ug magsiga, ug may dala kamo nga lana, nga kamo andam sa pag-anhi sa Pamanhonon—
18 Kay tan-awa, sa pagkatinuod, sa pagkatinuod, sultihan ko kamo, nga ako moabot sa kalit lang. Ug ingon niana ang mahitabo. Amen.