Seksiyon 39
Pagpadayag nga gihatag pinaagi ni Joseph Smith ang Propeta ngadto kang James Covel, sa Fayette, New York, Enero 5, 1831. Si James Covel, kinsa ministro kanhi sa Methodist sulod sa kap-atan ka tuig, mipakigsaad sa Ginoo nga mosunod siya sa bisan unsang sugo nga ihatag kaniya sa Ginoo pinaagi ni Joseph ang Propeta.
1–4, Ang mga Santos adunay gahom nga mahimong mga anak sa Dios, 5–6, Ang pagdawat sa ebanghelyo mao ang pagdawat ni Kristo; 7–14, Si James Covel gimandoan nga magpabunyag ug maghago sa ubasan sa Ginoo; 15–21, Ang mga sulugoon sa Ginoo kinahanglan nga magsangyaw sa ebanghelyo sa dili pa moabot ang Ikaduhang Pag-anhi; 22–24, Kadtong modawat sa ebanghelyo pagapundokon karon ug sa kahangtoran.
1 Patalinghog, ug paminaw sa tingog kaniya nga nagagikan sa tanang kahangtoran ngadto sa tanang kahangtoran, ang Halangdon nga Ako Mao, gani si Jesukristo—
2 Ang kahayag ug ang kinabuhi sa kalibotan; kahayag nga nagdan-ag sa kangitngit ug ang kangitngit wala makasabot niini;
3 Ang mao gihapon nga miabot sa kinatung-an sa panahon ngadto sa akong katawhan, ug ang akong katawhan wala modawat kanako;
4 Apan kutob sa midawat kanako, Akong gihatagan og gahom nga mahimong akong mga anak; ug bisan pa niana Ako mohatag kutob sa modawat kanako, og gahom nga mahimong akong mga anak.
5 Ug sa pagkatinuod, sa pagkatinuod, sultihan ko kamo, siya nga modawat sa akong ebanghelyo modawat kanako; ug siya nga wala modawat sa akong ebanghelyo wala modawat kanako.
6 Ug mao kini ang akong ebanghelyo—paghinulsol ug bunyag pinaagi sa tubig, ug dayon moabot ang bunyag sa kalayo ug sa Espiritu Santo, gani ang Maghuhupay, nga nagpakita sa tanang butang, ug nagtudlo sa malinawong mga butang sa gingharian.
7 Ug karon, tan-awa, sultihan ko kamo, akong sulugoong James, nagtan-aw ako sa imong mga buhat ug nakaila ako kanimo.
8 Ug sa pagkatinuod sultihan ko ikaw, ang imong kasingkasing karon matarong sa akong atubangan niini nga panahon; ug, tan-awa, nagtugyan ako og dagkong mga panalangin diha sa imong ulo;
9 Bisan pa niana, ikaw nakakita og dagko nga kagul-anan, kay imo akong gisalikway sa daghang higayon tungod sa garbo ug kabalaka sa kalibotan.
10 Apan, tan-awa, ang adlaw sa imong kaluwasan moabot, kon ikaw mopatalinghog sa akong tingog, nga nag-ingon nganha kanimo: Bangon ug pagpabunyag, ug hugasi ang imong mga sala, motawag sa akong ngalan, ug ikaw makadawat sa akong Espiritu, ug sa panalangin nga hilabihan ka mahinungdanon nga wala pa nimo mahibaloi sukad.
11 Ug kon imo kining buhaton, giandam ko ikaw alang sa mas mahinungdanon nga buhat. Ikaw mosangyaw sa kahingpitan sa akong ebanghelyo, nga akong gipadala niining kataposang mga adlaw, ang pakigsaad nga akong gipadala aron sa pagpahibalik sa akong katawhan, nga naggikan sa balay ni Israel.
12 Ug mahitabo nga ang gahom maanaa kanimo; ikaw makaangkon og talagsaong pagtuo, ug ako mag-uban kanimo ug mag-una sa imong atubangan.
13 Ikaw gitawag sa paghago sa akong ubasan, ug sa pagpalig-on sa akong simbahan, ug sa pag-ugmad sa Zion, nga kini magmaya sa ibabaw sa mga bungtod ug molambo.
14 Tan-awa, sa pagkatinuod, sa pagkatinuod, sultihan ko ikaw, ikaw wala tawaga sa pag-adto sa silangan nga mga nasod, apan ikaw gitawag sa pag-adto sa Ohio.
15 Ug tungod kay ang akong katawhan magpundok didto sa Ohio, nag-andam ako og panalangin nga labaw pa kay sa nahibaloan sa mga anak sa katawhan, ug ibu-bo kini diha sa ilang mga ulo. Ug gikan diha ang mga tawo moadto sa tanang kanasoran.
16 Tan-awa, sa pagkatinuod, sa pagkatinuod, sultihan ko kamo, nga ang katawhan sa Ohio nagtawag kanako uban sa hilabihang pagtuo, naghunahuna nga akong pugngan ang akong kamot sa paghukom diha sa mga nasod, apan dili ako makalimod sa akong pulong.
17 Mao nga sugdi ang buluhaton gamit ang imong gahom ug pagtawag og matinud-anong mga mamumuo ngadto sa akong ubasan, nga kini mapul-ongan sa kataposang higayon.
18 Ug tungod kay naghinulsol sila ug modawat sa kahingpitan sa akong ebanghelyo, ug mahimong balaan, Akong pugngan ang akong kamot sa pagpahamtang og silot.
19 Mao nga, lakaw, magsangyaw pinaagi sa kusog nga tingog, nga mag-ingon: Ang gingharian sa langit haduol na; magsinggit og: Hosanna! bulahan ang ngalan sa Labing Halangdon nga Dios.
20 Padayon sa pagpamunyag pinaagi sa tubig, mag-andam sa dalan alang kanako alang sa takna sa akong pag-abot;
21 Kay ang panahon haduol na; ang adlaw o ang takna nga walay tawo nga nasayod; apan moabot gayod kini.
22 Ug siya nga modawat niining mga butanga modawat kanako; ug pagapundokon sila ngari kanako karon ug sa kahangtoran.
23 Ug sa gihapon, mahitabo nga kutob sa inyong mabunyagan pinaagi sa tubig, inyong pandongan sa inyong mga kamot, ug madawat nila ang gasa sa Espiritu Santo, ug maghulat sa mga timailhan sa akong pag-anhi, ug makaila kanako.
24 Tan-awa, ako kalit lang nga moabot. Ug ingon niana ang mahitabo. Amen.