Seksiyon 41
Pagpadayag nga gihatag pinaagi ni Joseph Smith ang Propeta ngadto sa Simbahan, didto sa Kirtland, Ohio, Pebrero 4, 1831. Kini nga pagpadayag nagsugo kang Propeta Joseph Smith ug sa mga elder sa Simbahan sa pag-ampo aron makadawat sa “balaod” sa Dios (tan-awa sa seksiyon 42). Si Joseph Smith bag-o lang miabot sa Kirtland gikan sa New York, ug si Leman Copley, sakop sa Simbahan sa kasikbit nga Thompson, Ohio, “mihangyo nga si Igsoong Joseph ug si Sidney [Rigdon] … mopuyo uban kaniya ug iya silang andaman og mga balay ug mga panginahanglan.” Ang mosunod nga mga pagpadayag naghatag og katin-awan kon asa magpuyo si Joseph ug si Sidney ug mitawag usab ni Edward Partridge nga mahimong una nga obispo sa Simbahan.
1–3, Ang mga elder modumala sa Simbahan pinaagi sa espiritu sa pagpadayag; 4–6, Ang tinuod nga mga tinun-an makadawat ug motuman sa balaod sa Ginoo; 7–12, Si Edward Partridge gitawag nga obispo sa Simbahan.
1 Patalinghog ug paminaw, O kamo akong katawhan, nag-ingon ang Ginoo ug inyong Dios, kamo nga gikahimut-an nako nga panalanginan sa labing mahinungdanon sa tanang panalangin, kamo nga naminaw kanako; ug kamo nga wala maminaw kanako, nga nangangkon sa akong ngalan, akong tunglohon sa labing bug-at sa tanang pagtunglo.
2 Patalinghog, O kamong mga elder sa akong simbahan kinsa akong gitawag, tan-awa hatagan ko kamo og usa ka sugo, nga kamo magpundok aron magkauyon mahitungod sa akong pulong;
3 Ug pinaagi sa inyong matuohon nga pag-ampo makadawat kamo sa akong balaod, aron masayod kamo kon unsaon sa pagdumala ang akong simbahan ug sa pagbuhat sa tanang butang sa tukmang paagi sa akong atubangan.
4 Ug Ako ang inyong magmamando kon ako moabot na; ug tan-awa, moabot ako sa kalit lang, ug makita ninyo nga ang inyong balaod pagatumanon.
5 Siya nga nakadawat sa akong balaod ug nagbuhat niini, siya akong disipulo; ug siya nga moingon nga nakadawat siya niini ug wala magbuhat niini, dili siya akong disipulo, ug kinahanglang ipalayo gikan kaninyo;
6 Kay dili angay nga ang mga butang nga gipanag-iya sa mga anak sa gingharian ihatag ngadto kanila nga dili takos, o ngadto sa mga iro, o ang mga perlas aron isabwag sa atubangan sa baboy.
7 Ug usab, angay nga ang akong sulugon nga si Joseph Smith, Jun., patukoran og balay, diin didto magpuyo ug maghubad.
8 Ug usab, angay nga ang akong sulugoon nga si Sidney Rigdon magpuyo sumala sa iyang gilantaw nga makaayo kaniya, kutob sa panahon nga siya magtuman sa akong mga sugo.
9 Ug usab, akong gitawag ang akong sulugoon nga si Edward Partridge; ug mohatag ako og sugo, nga kinahanglan siyang ibutang sa katungdanan pinaagi sa tingog sa simbahan, ug iorden nga obispo sa simbahan, sa pagbiya sa iyang pagpamaligya ug igahin ang iyang tanang panahon sa mga buluhaton sa simbahan;
10 Sa pag-atiman sa tanang butang sumala sa ihatag kaniya nga katungdanan sa akong mga balaod sa panahon nga Ako mohatag niini.
11 Ug tungod kini kay ang iyang kasingkasing putli sa akong atubangan, kay sama siya ni Nathanael sa karaan, kinsa walay pagpanglimbong.
12 Kini nga mga pulong gihatag nganha kaninyo, ug putli kini sa akong atubangan; mao nga, pagbantay unsaon ninyo kini sa paggamit, kay ang inyong mga kalag mao ang manubag niini sa adlaw sa paghukom. Ug ingon niana ang mahitabo. Amen.