Seksiyon 46
Pagpadayag nga gihatag pinaagi ni Joseph Smith ang Propeta ngadto sa Simbahan, sa Kirtland, Ohio, Marso 8, 1831. Niining bag-ong kapanahonan sa Simbahan, ang hiniusa nga sumbanan alang sa pagdumala sa mga tulomanon sa Simbahan wala pa mahimo. Hinuon, ang naandan nga ang mga miyembro ug ang sinserong mga tigsusi lamang ang dawaton sa mga panagtigom alang sa sakramento ug sa ubang mga panagtigom sa Simbahan ingon og komon ra. Kini nga pagpadayag nagpahayag sa kabubut-on sa Ginoo kalabot sa pagdumala ug pagpahigayon og mga miting ug sa Iyang direksyon sa pagtinguha ug pag-ila sa mga gasa sa Espiritu.
1–2, Ang mga elder mao ang mopahigayon sa mga miting sumala sa giya sa Balaan nga Espiritu; 3–6, Ang mga tigpangita sa kamatuoran kinahanglan iapil sa mga tulomanon sa sakramento; 7–12, Pangutana sa Dios ug tinguhaa ang mga gasa sa Espiritu; 13–26, Ang mga ngalan sa uban niini nga mga gasa gihatag; 27–33, Ang mga lider sa Simbahan gihatagan og gahom sa pag-ila sa mga gasa sa Espiritu.
1 Patalinghog, O kamo nga katawhan sa akong simbahan; kay sa pagkatinuod sultihan ko kamo nga kining mga butanga gipamulong nganha kaninyo alang sa inyong kaayohan ug pagkat-on.
2 Apan bisan pa sa mga butang nga nahisulat, gihatag kini kanunay ngadto sa mga elder sa akong simbahan gikan sa sinugdanan, ug sa tanan nga panahon, sa pagpahigayon sa tanang miting sumala sa direksyon ug giya sa Balaang Espiritu.
3 Bisan pa niana gisugo kamo sa dili pagsalikway ni bisan kinsa gikan sa inyong mga miting sa publiko, nga gihimo alang sa tanang katawhan.
4 Gisugo usab kamo nga dili mosalikway ni bisan kinsa nga sakop sa simbahan gikan sa inyong mga panagtigom alang sa sakramento; bisan pa niana, kon si bisan kinsa nga nakalapas, ayaw siya tugoti nga moambit hangtod siya mohimo og pakig-uli.
5 Ug usab sultihan ko kamo, ayaw ninyo isalikway si bisan kinsa gikan sa inyong mga panagtigom alang sa sakramento ang sinsero nga nangita sa gingharian—naghisgot ako niini mahitungod niadtong dili miyembro sa simbahan.
6 Ug usab sultihan ko kamo, mahitungod sa inyong mga miting sa pagkompirma, nga kon adunay bisan kinsa nga dili sakop sa simbahan, nga sinserong nagtinguha sa gingharian, ayaw ninyo sila isalikway.
7 Apan gimandoan kamo sa tanan nga butang sa pagpangayo sa Dios, kinsa naghatag nga walay pagpugong; ug kana nga gipamatuod sa Espiritu diha kaninyo bisan pa niana ako nanghinaot nga kamo magbuhat uban sa tanan nga pagkabalaan sa kasingkasing, maglakaw nga matarong diha sa akong atubangan, mamalandong sa sangpotanan sa inyong kaluwasan, magbuhat sa tanang butang uban sa pag-ampo ug pagpasalamat, nga kamo dili matental sa daotang mga espiritu, o sa mga doktrina sa mga yawa, o sa mga sugo sa mga tawo; kay ang uban naggikan sa mga tawo, ug ang uban naggikan sa mga yawa.
8 Mao nga, pagbantay kay tingali unya og kamo malimbongan; ug aron kamo dili malimbongan pangitaa sa matinguhaon nga paagi ang labing maayo nga mga gasa, ug kanunay nga maghinumdom kon alang sa unsa ang gihatag;
9 Kay sa pagkatinuod sultihan ko kamo, gihatag kini alang sa kaayohan niadtong nahigugma kanako ug nagtuman sa tanan nakong mga sugo, ug siya nga nagtinguha sa pagbuhat; aron ang tanan makaangkon og kaayohan nga nangita o nangayo gikan kanako, nga nangayo ug dili alang sa timailhan aron sila mogamit niini alang sa ilang mga hinakog nga pagpangibog.
10 Ug usab, sa pagkatinuod sultihan ko kamo, manghinaot ko nga kamo sa kanunay mahinumdom, ug ipabilin kanunay sa inyong mga hunahuna unsa kadto nga mga gasa, ang gihatag ngadto sa simbahan.
11 Kay dili tanan ang aduna sa matag gasa nga ihatag ngadto kanila; kay adunay daghan nga gasa, ug ngadto sa matag tawo gihatag ang usa ka gasa pinaagi sa Espiritu sa Dios.
12 Ngadto sa uban gihatag ang usa, ug ngadto sa uban gihatag ang lain, aron ang tanan makaangkon og kaayohan pinaagi niana.
13 Ngadto sa uban gihatag kini pinaagi sa Espiritu Santo aron makahibalo nga si Jesukristo mao ang Anak sa Dios, ug nga siya gilansang sa krus alang sa mga sala sa kalibotan.
14 Ngadto sa uban gihatag kini aron motuo sa ilang mga pulong, aron usab makabaton sila og kinabuhing dayon kon sila padayon nga matinud-anon.
15 Ug usab, ngadto sa uban gihatag kini pinaagi sa Espiritu Santo sa pagkahibalo sa mga kalainan sa pagdumala, nga kini makapahimuot sa sama nga Ginoo, sumala sa kabubut-on sa Ginoo, nga nagpahiangay sa iyang mga kaluoy sumala sa mga kahimtang sa katawhan.
16 Ug usab, gihatag kini pinaagi sa Espiritu Santo ngadto sa uban aron makahibalo sa nagkalain-laing mga paagi, kon kini gikan ba sa Dios, nga ang mga pagpakita sa Espiritu mahimong ihatag ngadto sa matag tawo sa iyang kaayohan.
17 Ug usab, sa pagkatinuod sultihan ko kamo, ngadto sa uban gihatag, pinaagi sa Espiritu sa Dios, ang pulong sa kaalam.
18 Ngadto sa uban gihatag ang pulong sa kahibalo, nga ang tanan matudloan nga magmaalamon ug magbaton og kahibalo.
19 Ug usab, ngadto sa uban gihatag kini aron makabaton og pagtuo nga mamaayo;
20 Ug ngadto sa uban gihatag kini sa pagbaton og pagtuo aron makaayo.
21 Ug usab, ngadto sa uban gihatag ang pagbuhat og mga milagro;
22 Ug ngadto sa uban kini gihatag aron makapanagna;
23 Ug ngadto sa uban ang pag-ila sa mga espiritu.
24 Ug usab, gihatag kini ngadto sa uban aron makasulti og laing mga pinulongan;
25 Ug ngadto sa lain gihatag ang paghubad og mga pinulongan.
26 Ug kining tanang gasa naggikan sa Dios, alang sa kaayohan sa mga anak sa Dios.
27 Ug ngadto sa bishop sa simbahan, ug siya nga pilion sa Dios ug i-orden sa pagbantay sa simbahan ug himoong mga elder sa simbahan, ihatag ngadto kanila ang pag-ila sa tanang gasa basin unya og adunay uban diha kaninyo nga nagpakaaron-ingnon apan dili gikan sa Dios.
28 Ug mahitabo nga siya nga mangayo pinaagi sa Espiritu makadawat pinaagi sa Espiritu;
29 Nga ngadto sa uban kini ikahatag aron maangkon kadtong tanan nga gasa, aron adunay usa ka pangulo, aron ang matag miyembro mahatagan og kaayohan pinaagi niana.
30 Siya nga nangayo pinaagi sa Espiritu nangayo sumala sa kabubut-on sa Dios; mao nga mahitabo kon unsa man ang iyang gipangayo.
31 Ug usab, sultihan ko kamo, ang tanang butang kinahanglan himoon pinaagi sa ngalan ni Kristo, bisan unsa ang inyong buhaton pinaagi sa Espiritu;
32 Ug kamo kinahanglan nga magpasalamat ngadto sa Dios pinaagi sa Espiritu alang sa bisan unsa nga panalangin nga gipanalanginan kaninyo.
33 Ug kinahanglan mopalambo kamo og kaligdong ug pagkabalaan sa akong atubangan kanunay. Mao gayod kana. Amen.