Seksiyon 51
Pagpadayag nga gihatag pinaagi ni Joseph Smith ang Propeta, sa Thompson, Ohio, Mayo 20, 1831. Niini nga panahon ang mga Santos nga nanglangyaw gikan sa silangan nga mga estado nagsugod sa pagpangabot sa Ohio, ug gikinahanglan na nga mohimo og piho nga mga pagpahimutang sa ilang kapuy-an. Tungod kay kini nga buluhaton iya sa buhatan sa bishop, si Bishop Edward Partridge nagtinguha og mga panudlo niining butanga, ug ang Propeta nangutana sa Ginoo.
1–8, Si Edward Partridge gipili nga maoy modumala sa pagkatinugyanan ug sa mga kabtangan; 9–12, Ang mga Santos kinahanglan nga magmatinuoron sa ilang mga kasabotan ug patas usab ang madawat; 13–15, Gikinahanglan nga makatukod sila og balay tipiganan sa bishop ug iorganisar ang mga kabtangan sumala sa balaod sa Ginoo; 16–20, Ang Ohio maoy temporaryo nga dapit pundokanan.
1 Patalinghog ngari kanako, miingon ang Ginoo nga inyong Dios, ug ako mamulong ngadto sa akong sulugoon nga si Edward Partridge, ug mohatag ngadto kaniya og mga direksyon; kay gikinahanglan gayod nga makadawat siya og mga direksyon unsaon sa pag-organisar kini nga katawhan.
2 Kay gikinahanglan gayod nga maorganisar sila sumala sa akong mga balaod; kay kon dili, sila pagalaglagon.
3 Mao nga, tugoti nga ang akong sulugoon nga si Edward Partridge, ug kadtong iyang napili, kinsa akong gikahimuot kaayo, mohatag niini nga katawhan sa ilang mga bahin, matag tawo patas mag-agad sa gidak-on sa iyang pamilya, ug sumala sa iyang mga kahimtang ug sa mga tinguha ug sa panginahanglan.
4 Ug itugot nga ang akong sulugoon nga si Edward Partridge, kon siya mohatag ngadto sa tawo sa iyang bahin, mohatag kaniya og kasulatan nga maghatag kaniya og kasegurohan sa iyang bahin, nga siya motipig niini, gani niini nga katungod ug niini nga kabilin diha sa simbahan, gawas kon siya makalapas ug dili na pagaisipon nga takos pinaagi sa tingog sa simbahan, sumala sa mga balaod ug mga pakigsaad sa simbahan, nga mahimong sakop sa simbahan.
5 Ug kon siya makalapas, ug dili na maisip nga takos nga mahisakop sa simbahan, siya wala nay katungod sa pag-angkon niana nga bahin nga iyang gipahinungod ngadto sa bishop alang sa kabos ug sa timawa sa akong simbahan; busa, dili siya makaangkon sa gasa, apan makapangangkon lamang niana nga bahin nga gihatag kaniya sumala sa balaod.
6 Ug sa ingon niana ang tanang butang himoon nga segurado, sumala sa mga balaod sa yuta.
7 Ug himoa nga kanang gipanag-iya niini nga katawhan ihatag niana nga katawhan.
8 Ug ang kwarta nga nahibilin niini nga katawhan—tugoti nga adunay tinugyanan nga pilion ngadto niini nga katawhan, sa pagkuha sa kwarta aron isangkap og pagkaon ug sinina, sumala sa mga tinguha niini nga katawhan.
9 Ug itugot nga ang matag tawo magmatinuoron, ug makigsama niini nga katawhan, ug pareha nga makadawat, aron kamo magkahiusa, gani sumala sa akong gisugo kaninyo.
10 Ug tugoti nga kana nga gipanag-iya niini nga katawhan dili kuhaon ug ihatag sa laing simbahan.
11 Mao nga, kon ang laing simbahan makadawat og kwarta gikan niini nga simbahan, pabayra sila ngadto niini nga simbahan pag-usab sumala sa ilang gikauyonan;
12 Ug kini pagahimoon pinaagi sa bishop o sa tinugyanan, nga itudlo pinaagi sa tingog sa simbahan.
13 Ug usab, itugot nga ang bishop maghimo og usa ka balay tipiganan niini nga simbahan; ug itugot nga ang tanang butang kwarta man ug karne, nga mas daghan kay sa gikinahanglan nga gitinguha niini nga katawhan, tipigan diha sa mga kamot sa bishop.
14 Ug itugot nga siya usab mag-andam alang sa iyang kaugalingon nga panginahanglan, ug alang sa mga panginahanglan sa iyang pamilya, samtang siya apil niini nga patigayon.
15 Ug sa ingon niana ihatag nako niini nga katawhan ang pribilihiyo sa pag-organisar sa ilang mga kaugalingon sumala sa akong mga balaod.
16 Ug akong ipahinungod kanila kini nga yuta sulod sa mubo nga panahon, hangtod nga ako, ang Ginoo, mosangkap kanila sa lain nga paagi, ug mosugo kanila sa paglakaw gikan dinhi;
17 Ug ang oras ug ang adlaw dili ipahibalo ngadto kanila, mao nga himoa nga sila magbinuotan niini nga yuta sa tanang katuigan, ug makahatag kini kanila og kaayohan.
18 Tan-awa, mahimo kining panig-ingnan ngadto sa akong sulugoon nga si Edward Partridge, sa laing mga dapit, sa tanang simbahan.
19 Ug kadtong makita nga matinud-anon, makiangayon, ug maalamon nga tinugyanan makasulod ngadto sa kamaya sa iyang Ginoo, ug makadawat og kinabuhing dayon.
20 Sa pagkatinuod, sultihan ko kamo, ako si Jesukristo, nga moabot dayon, sa oras nga wala ninyo hunahunaa. Ug mao gayod kana. Amen.