Seksiyon 53
Pagpadayag nga gihatag pinaagi ni Joseph Smith ang Propeta ngadto kang Algernon Sidney Gilbert, sa Kirtland, Ohio, Hunyo 8, 1831. Sa hangyo ni Sidney Gilbert, ang Propeta nangutana sa Ginoo kabahin sa buluhaton ug sa pagkatudlo ni Igsoong Gilbert diha sa Simbahan.
1–3, Ang balaan nga tawag ug pagkapili ni Sidney Gilbert diha sa Simbahan mao nga ma-orden nga usa ka elder; 4–7, Siya moalagad usab isip usa ka tinugyanan sa bishop.
1 Tan-awa, sultihan ko ikaw, akong sulugoong Sidney Gilbert, nga nakadungog ako sa imong mga pag-ampo; ug ikaw nagtawag kanako nga ipahibalo kini nganha kanimo, sa Ginoo nga imong Dios, ang mahitungod sa imong balaan nga tawag ug pagkapili sa simbahan, diin ako, ang Ginoo, mao ang nagtukod niining kataposang mga adlaw.
2 Tan-awa, ako, ang Ginoo, nga gilansang sa krus alang sa mga sala sa kalibotan, naghatag kanimo og sugo nga imong isalikway ang kalibotan.
3 Dawata ang akong pag-orden, gani niana nga pagka-elder, sa pagsangyaw og pagtuo ug paghinulsol ug kapasayloan sa mga sala, sumala sa akong pulong, ug sa pagdawat sa Balaang Espiritu pinaagi sa pagpandong sa mga kamot;
4 Ug usab sa pagkahimong tinugyanan niini nga simbahan sa dapit nga pilion sa bishop, sumala sa mga sugo nga ihatag human niini.
5 Ug usab, sa pagkatinuod sultihan ko ikaw, magsugod ka sa imong panaw uban sa akong mga sulugoon nga si Joseph Smith, Jun., ug si Sidney Rigdon.
6 Tan-awa, mao kini ang unang mga ordinansa nga imong madawat; ug ang nahibilin ipahibalo sa usa ka panahon nga moabot, sumala sa imong paghago sa akong ubasan.
7 Ug usab, gusto ko nga imong mahibaloan nga ang maluwas siya lamang nga molahutay ngadto sa kataposan. Ug mao gayod kana. Amen.